Iƹibraniyen 9 - Ṯarifiṯ 2020

Lƹibada ṯamezwarut ḏeg Uqiḍun Ameqqran

¹ Ȓƹaheḏ nni amezwaru tuɣa ɣares can n lqawanin n lƹibada u ḏ ijjen n umcan amqeddes ḏi ddunect-a.

² Iƹni sewjaḏen ijjen n Uqiḍun Ameqqran ḏayes ṯnayen n ixammen. Ḏeg uxxam amezwaru ggin ḏayes ȓqendiȓ ḏ ṭṭabȓa mani srusan aɣrum nni itqeddamen ḏ ṣṣeḏqeṯ i Arebbi. Axxam nni qqaren-as

³ Ṯumma ḏinni ijjen n arrwaq, ɣar ḏeffar nnes ḏinni ijjen n uxxam wis ṯnayen qqaren-as

⁴ Ḏayes ȓmejmar n tbaxur icellel s ddheb, u ḏ tabut n ȓƹaheḏ marra iɣezḏisen nnes u ḏ ṯisi nnes celllen s ddheb. Ḏi tabut-a ḏayes aqnuc itwaṣenneƹ s ddheb, aqnuc nni ḏayes aɣrum umi qqaren lmanna. Tabut-a ƹaweḏ ḏayes ṯaɣȓiṯ n Harun ṯnewwar, ḏ ṯeȓwiḥin n ƹecra n ȓuṣiyaṯ.

⁵ Ṯaqebbarṯ n tabut-a xas ṯnayen n lmexluqaṯ n lƹaḍama ggin am munikuṯ ɣarsen afriwen. Ṯiȓi n wafriwen nsen ṯɣeṭṭa ṯaqebbarṯ-a ṯanita n arraḥmeṯ. Walakin neccin ḏi ȓweqṯ-a war nzemmar a nweṣṣef ṯimesȓayin-a ṯa s ṯa.

⁶ Wami swejḏen marra ṯimesȓayin-a ammu, tuɣa taḏfen ȓfuqaha ɣar uxxam amezwaru kuȓ nhar ḏi lʼawqat nnes, teggen ccɣeȓ nsen.

⁷ Walakin axxam nni wis ṯnayen itraḥ ḏinni ɣir ȓefqi ameqqran, ijjen n ṯwaȓa ḏi lƹam u ṣafi. Wa labud akiḏes yawi ca n iḏammen bac aṯen iqeddem x yixef nnes u x ddnub iy ggin ccaƹb bȓa ma ṯent ssnen.

⁸ Min ḏaneɣ d isbiyyen Arruḥ iqeddsen ḏi manaya? Isbiyyen-aneɣ-d meȓa ƹaḏ iqqim Uqiḍun nni Ameqqran, ataf war innurzem ca ubriḏ ɣar min iǧan ḏ amqeddes aṭṭas.

⁹ Marra manaya iticc ijjen lmiṯal i ȓweqṯ-a iy ḏi neǧa ȓexxu. Ccɣeȓ nni iy tuɣa teggen ḏinni xmi tqeddamen ṣṣeḏqeṯ ḏ dbiḥaṯ war izemmar ca aḏ issiṣfa ḍḍamir n wenni iƹebbḏen.

¹⁰ Manaya ɣir ḏayes can n lqawanin n ccariƹa x lmakla ḏ ṯsessi ḏ ȓuḍu. Lqawanin-a war ǧin ca x wuȓawen n bnaḏem, xeddmen ḥetta ȓweqṯ n ȓƹaheḏ ḏ jḏiḏ u ṣafi.

¹¹ Fa Lmasiḥ wami d iḥḍar ḏ ȓefqi ameqqran n ṯmesȓayin-a iy d yusin, iƹni yuḏef aqiḍun nni iǧan ƹaḍim war ḏas inqis walu war ṯ bnin ca ifassen n bnaḏem, war iǧi ca zi min d itwaxeȓqen ḏi ddunect-a.

¹² Yuḏef ijjen n ṯwaȓa u ṣafi ɣar Uxxam Amqeddes Aṭṭas. Netta war yuḏif ca s iḏammen n iɣayḏen niɣ ḏ iyenduzen; Lla, yuḏef s iḏammen nnes nniṯ ixeǧes xaneɣ lfidya bac a nenjem i ȓebda.

¹³ Cuf, iḏammen n iɣayḏen ḏ iyenduzen ḏ yiɣɣeḏ n ṯfunast truccan zzaysen yinni ixenzen issiṣfa-ṯen bac aḏ ḏewȓen ḏ imenqawiyen.

¹⁴ Meȓa amenni, mecḥaȓ iy ḏaneɣ ɣa ssiṣfan iḏammen n Lmasiḥ ktar! Netta iruḥ s Arruḥ nni itduman i ȓebda iqeddem ixef nnes bȓa ȓƹib i Arebbi, iḏammen nnes aḏaneɣ ssiṣfan ḍḍamir nneɣ zi ssayiʼaṯ bac a neƹbeḏ Arebbi iddaren.

¹⁵ Falihaḏa netta Lmasiḥ itcafaƹ jaraneɣ ḏ Arebbi s yijjen n ȓƹaheḏ ḏ jḏiḏ bac yinni umi d iȓaɣa Arebbi ataf aḏ awin lwareṯ iy zi ṯen iwƹeḏ itduman i ȓebda. Liʼanna Lmasiḥ immuṯ ḏ lfidya ḥima aḏasen iḍȓeq aḏ iȓin ḥurr zi ȓmuƹṣiyaṯ iy ggin swadday i ȓƹaheḏ nni amezwaru.

¹⁶ Cuf, ƹlaḥsab lwaṣiya labud aḏ d awin chada n lwafat n wenni iggin lwaṣiya.

¹⁷ Liʼanna lwaṣiya war ṯṣeǧeḥ ca illa meȓa immuṯ bab nnes. Meȓa ƹaḏ iddar bab nnes iƹni wenni iy t yurin ataf war ṯṣeǧeḥ ca.

¹⁸ X manaya tuɣa waxxa ḏ ȓƹaheḏ amezwaru war iṣeǧeḥ ca ḥetta wami uzzȓen iḏammen.

¹⁹ Aqa nnabi Musa wami iɣra kuȓ ȓuṣiyeṯ i marra ccaƹb, ṯumma iysi iḏammen n iyenduzen ḏ iɣayḏen ixelleṭ-iṯen ak waman, ṯumma irucc zzaysen Lkitab s yixef nnes ḏ marra ccaƹb s ṯaḍufṯ ṯazeggwaɣṯ ḏ uzuy.

²⁰ Inna-asen qa yina ḏ iḏammen n ȓƹaheḏ iy ḏawem yumar Arebbi aḏ teggem.

²¹ Amenni ƹaweḏ irucc Aqiḍun Ameqqran s iḏammen-a ḏ marra ȓeqcuƹ iy ḏayes staƹmaȓen ḏi lƹibada.

²² U ḏ ṣṣaḥ ƹlaḥsab Ccariƹa n Musa ƹȓayen marra ṯimesȓayin aḏ twassiṣfant s iḏammen. U bȓa ma aḏ azzȓen iḏammen ataf ȓmuƹṣiyaṯ war twaɣfirent ca.

²³ Iḏen, ṯimesȓayin-a itcabbahen ḏi ṯmesȓayin nni n ujenna tuɣa twassiṣfant s dbiḥaṯ. Walakin ṯimesȓayin nni s yixef nsent n ujenna lla; Twassiṣfant niṯenti s yijjen n nnuƹ n dbiḥaṯ ḥsen zi ṯinni nneɣni.

²⁴ Cuf, Lmasiḥ war yuḏif ca Axxam nni Amqeddes Aṭṭas iy ibnan s ifassen n bnaḏem itcabbahen waha ḏeg wenni n ṣṣaḥ; Lla, netta yuḏef ḏeg ujenna nniṯ aḏ iḥḍar zzaṯ i Arebbi ƹlaḥsab neccin.

²⁵ War yuḏif ca ḏeg ujenna bac aḏ itqeddam ixef nnes aṭṭas n ṯwaȓaṯin amecnaw mamc itegg ȓefqi nni ameqqran xmi itaḏef kuȓ lƹam ɣar Uxxam Amqeddes Aṭṭas s iḏammen maci nnes.

²⁶ Maƹlik amenni tuɣa ataf labud Lmasiḥ itwaƹeddab aṭṭas n ṯwaȓaṯin zeg wami twaxȓeq ddunect-a. Walakin lla, ihwa-d netta ijjen n ṯwaȓa aȓ uneggaru n zmanaṯ bac aḏ isbeṭṭeȓ ȓmuƹṣiyeṯ wami iqeddem ixef nnes ḏ dbiḥeṯ.

²⁷ Ȓmewṯ itmetta-t bnaḏem ijjen n ṯwaȓa, ṯumma iḏeffar-it Lḥisab ḏ Lƹiqab.

²⁸ Ammu Lmasiḥ, itwaqeddem ḏ dbiḥeṯ ijjen n ṯwaȓa bac aḏ yarbu ȓmuƹṣiyaṯ n waṭṭas n yiwḏan. Ṯumma aḏ d ihwa wis marrṯayen. Mayemmi? Maci ƹlaḥsab ȓmuƹṣiyeṯ n yiwḏan ƹaweḏ; Lla, aḏ d ihwa bac aḏ isenjem yinni iy ṯ itrajan.