Iƹibraniyen 7 - Ṯarifiṯ 2020

Lfirqa n ȓefqi ameqqran Malikiṣadiq

¹ Cuf, Malikiṣadiq nni tuɣaṯ netta ḏ azeǧiḏ n ṯendint n Salim ḏ ȓefqi n Siḏi Arebbi Yuƹȓan. Iruḥ imeȓqa ak Brahim ibarek-iṯ. Manaya iwqeƹ wami d itrewwaḥ Brahim zi ȓḥarb nni iy ḏi iɣȓeb izeǧiḏen.

² Yuca-as Brahim i Malikiṣadiq ȓaƹcur, ƹecra ḏi miyya zi marra. Ḏ amezwaru ȓmaƹna n yisem-a n Malikiṣadiq ixes aḏ yini U ƹaweḏ netta ḏ Lmalik n ṯendint n Salim iƹni ḏ azeǧiḏ n ȓehna.

³ War ɣares ntif lla babas lla yemmas lla ȓejḏuḏ nnes. War ɣares ntif amezwaru n ȓiyyam nnes uȓa ḏ aneggaru n ṯuḏarṯ nnes. Netta itcabbah ḏi Mmis n Arebbi, iddar am ȓefqi ameqqran i ȓebda.

⁴ Iwa fekkareṯ netta mecḥaȓ ḏ ameqqran, waxxa ḏ jeddiṯneɣ ameqqran Brahim yuca-as ȓaƹcur, ƹecra ḏi miyya zi marra agȓa nni ig irbeḥ zeg izeǧiḏen nni!

⁵ Ḏinni ƹaweḏ ijjen n ȓuṣiyeṯ ḏi Ccariƹa n Musa tweṣṣa yinni iǧan ḏ ȓfuqaha zi Ayṯ-Lawi aḏ ysin ȓaƹcur zeg yiwḏan iƹni zi ayṯmaṯsen, waxxa uȓa ḏ ayṯmaṯsen ijji-ṯen-d jeddiṯsen ameqqran Brahim.

⁶ Walakin aryaz-a Malikiṣadiq war iǧi ca zi Ayṯ-Lawi, iysi ȓaƹcur zi Brahim uca Malikiṣadiq ibarek Brahim wenni umi ɣar ǧan lwuƹud.

⁷ U bȓa ccekk wenni ameqqran aḏ yuc lbaraka i wenni amezyan.

⁸ Ayṯ-Lawi ig ikessin ȓaƹcur iƹni niṯni ḏ iwḏan ƹadi tmettan. Walakin Malikiṣadiq ig iysin ȓaƹcur nni icehheḏ xas Lkitab belli netta iddar.

⁹ Iwa nzemmar a nini Lawi netta s yixef nnes iy ikessi ȓaƹcur zeg yiwḏan, issekk-iṯ x ufus n Brahim ɣar Malikiṣadiq liʼanna Brahim netta ḏ jeddis ameqqran.

¹⁰ Mammec manaya? Wami Brahim imeȓqa ak Malikiṣadiq, tuɣa Lawi ƹaḏ ɣar ḏaxeȓ n ddat n Brahim iƹni jeddis ameqqran.

¹¹ Iḏen, maƹlik ccɣeȓ nni iy xeddmen ȓfuqaha n Ayṯ-Lawi war ḏas inqis walu, mayemmi ƹaḏ tuɣa ɣa neḥḏaj aḏ d yas ijjen n ȓefqi nneɣni amecnaw lfirqa n Malikiṣadiq, maci zi lfirqa nni ƹadi n Harun n Ayṯ-Lawi?

¹² U cuf, meȓa ibeddeȓ ccɣeȓ nni iy xeddmen ȓfuqaha n Ayṯ-Lawi ataf wa labud aḏ tbeddeȓ ƹaweḏ can ȓḥajeṯ ḏi ccariƹa.

¹³ Liʼanna wenni iy xef nessawaȓ iƹni Ƹisa netta yusa-d zi ṯeqbiȓṯ nneɣni maci zi ṯeqbiȓṯ n Ayṯ-Lawi. Zi ṯeqbiȓṯ nnes ƹemmarṣ war ixḏim can yijjen ḏ ȓefqi ɣar ȓmeḏbaḥ.

¹⁴ Liʼanna nessen Siḏiṯneɣ yusa-d zi ṯeqbiȓṯ n Ayṯ-Yahuḏa. Ƹemmarṣ ma inna Musa aḏ d ffɣen ȓfuqaha zi ṯeqbiȓṯ nni.

¹⁵ Ȓexxu marra manaya itwaḍhar-d mliḥ wami d imeḍhar ijjen n ȓefqi nneɣni, iƹni ḏ Ƹisa, amecnaw lfirqa n Malikiṣadiq.

¹⁶ Iƹni maci ƹlaḥsab ijjen n ȓuṣiyeṯ x ȓejḏuḏ nnes zi ccariƹa iy ṯ yarrin ḏ ȓefqi; Lla, netta ḏ ȓefqi ƹlaḥsab jjheḏ n ṯuḏarṯ nnes ƹemmarṣ aḏ tefna.

¹⁷ Aqa icehheḏ xas Lkitab:

¹⁸ Ȓuṣiyeṯ nni ḏ ṯaqḏint ṯetwabeddeȓ wami ṯetwaḥsab ṯeḍƹef bȓa nnfaƹ.

¹⁹ Iffeɣ-d ijjen lʼamal ḥsen zi ȓuṣiyeṯ nni, zzayes iy ɣa nqarreb ɣar Arebbi ȓaḥeqqac Ccariƹa n Musa war d tarri uȓa ḏ ijjen ȓḥajeṯ war ḏayes bu ȓƹib.

²⁰ Lʼamal-a wanita maci waḥḏes, akiḏes ijjen n ṯjaǧiṯ. Yinni iḏewȓen qbeȓ ḏ ȓfuqaha arrin-ṯen ḏ ȓfuqaha bȓa ṯjaǧiṯ.

²¹ Walakin Ƹisa yarri-ṯ Arebbi ḏ ȓefqi s yijjen n ṯjaǧiṯ wami ḏas inna:

²² Ṯjaǧiṯ nni n Arebbi ḏ nettaṯ ig yarrin Ƹisa aḏ iḍemmen ijjen n ȓƹaheḏ ḥsen zi ȓƹaheḏ nni aqḏim.

²³ Ȓfuqaha nni n Ayṯ-Lawi niṯni aṭṭas iḏsen, mayemmi? Liʼanna ȓmewṯ war ṯen tejji ca aḏ dumen ḏi ȓxeḏmeṯ nsen.

²⁴ Walakin Ƹisa ȓxeḏmeṯ nnes n ȓefqi aḏ teqqim war twakkis ca liʼanna netta itduma i ȓebda.

²⁵ X manaya yinni zzayes itqarraben ɣar Arebbi izemmar Ƹisa aṯen isenjem i ȓebda. Mayemmi? Liʼanna netta iddar i ȓebda aḏaysen itcafaƹ.

²⁶ Cuf, ijjen n ȓefqi ameqqran am wanita ḏ netta iy neḥḏaj. Netta ƹaḍim, bȓa ȓƹib, iṣfa, ineƹzeȓ zeg yiwḏan iy ggin ȓmuƹṣiyeṯ, itwasemɣar yuƹȓa x ijennaṯen.

²⁷ Netta maci am ȓfuqaha nni nneɣni imeqqranen teḥḏajan niṯni aḏ qeddmen dbiḥaṯ kuȓ nhar iƹni x ȓmuƹṣiyaṯ nsen u menbaƹd x ȓmuƹṣiyaṯ n yiwḏan. Mayemmi? Liʼanna igga manaya Ƹisa icten n ṯwaȓa i ȓebda qaƹ wami iqeddem ixef nnes ḏ lfidya x yiwḏan.

²⁸ Liʼanna Ccariƹa n Musa tarra iryazen s ḍḍuƹef nsen aḏ iȓin ḏ ȓfuqaha imeqqranen. Walakin Arebbi s ṯjaǧiṯ nnes iy d yusin menbaƹd i Ccariƹa n Musa yarra Mmis ḏ ȓefqi ameqqran iḏweȓ netta bȓa ȓƹib qaƹ i ȓebda.