Iƹibraniyen 5 - Ṯarifiṯ 2020

¹ Cuf, kuȓ ȓefqi ameqqran tixḍaren-ṯ-iḏ zeg iryazen, ticcen-as ȓweqṯ n ȓxeḏmeṯ nnes bac aḏ ixḏem zzaṯ i Arebbi ƹlaḥsab iwḏan aḏ iqeddem ṣṣeḏqeṯ ḏ dbiḥaṯ x ȓmuƹṣiyaṯ.

² Izemmar netta aḏ iḥinn x yinni war ifehhmen ca ḏ yinni iffɣen abriḏ minzi netta s yixef nnes ḏayes ḍḍuƹef.

³ X manaya wa labud aḏ iqeddem dbiḥaṯ x ȓmuƹṣiyaṯ nnes nniṯ mammec iy ṯent itqeddam x yiwḏan.

⁴ Ƹaweḏ war ḏinni ḥadd iy ɣa isemɣaren ixef nnes aḏ ixḏem s ccan-a iƹni ḏ ȓefqi ameqqran; Lla, ḏ Arebbi iy ḏas iticcen ȓḥaqq nni mammec ḏas ṯ yuca i ȓefqi nni umi qqaren Harun.

⁵ Ammu uȓa ḏ Ƹisa war isemɣar ca ixef nnes aḏ ixḏem s lƹaḍama-ya iƹni ḏ ȓefqi ameqqran; Lla, inna-as Arebbi:

⁶ Ƹaweḏ iqqar Arebbi ḏeg yijjen n umcan nneɣni:

⁷ Ḏeg wussan nni iy ḏi tuɣa iddar Ƹisa ḏi ṯmurṯ-a, itẓaǧa itȓaɣa x Arebbi s jjheḏ u s imeṭṭawen itettar-as i wenni izemmaren aṯ isenjem zi ȓmewṯ. Arebbi itṣennaṭ-as wami Ƹisa iteggweḏ zzayes.

⁸ Waxxa netta ḏ Mmis n Arebbi iy iǧa, iȓmeḏ ṭṭaƹa s uƹeddeb nni iy xas ikkin.

⁹ Wami iƹḏu aƹeddeb nni bȓa ȓmuƹṣiyeṯ, iḏweȓ netta ḏ ȓƹunṣar n usenjem iƹni izemmar aḏ isenjem marra yinni iy ṯ itṭaƹan.

¹⁰ Ssenni yarri-ṯ Arebbi ḏ ȓefqi ameqqran amecnaw lfirqa nni n ȓefqi Malikiṣadiq.

Yallaheṯ a nuyureṯ ɣar zzaṯ ḥima a nemɣar

¹¹ Ƹaḏ nzemmar a nini aṭṭas x ṯmesȓayin-a walakin iqseḥ akenniw nsefhem. Mayemmi? Liʼanna kenniw ṯḏeqȓem aḏ tfehmem.

¹² Cuf, wa labud kenniw ȓexxu aḏ tiȓim ḏ imseȓmaḏen walakin ƹaḏ itxeṣṣa-yawem ijjen akenniw isɣar s ṯɣuri nni ṯamezwarut zeg wawaȓ n Arebbi. Kenniw teḥḏajam aɣi waha, maci lmakla ḏ ṣṣaḥ.

¹³ Kuȓ ijjen ƹaḏ ḏ aseymi itƹic s uɣi waha, iƹni war ifehhem ca i useȓmeḏ x min iṣeȓḥen.

¹⁴ Walakin lmakla n ṣṣaḥ tetten-teṯ ɣir yinni war iǧin ca ḏ iseyman. Niṯni zemmaren i lmakla nni n ṣṣaḥ minzi ȓebda xeddmen i ṯɣuri nni iy qqaren tmeyyazen jar min iǧan ḏ aṣebḥan ḏ jar min iǧan ḏ aƹeffan.