Iƹibraniyen 3 - Ṯarifiṯ 2020

Siḏiṯneɣ Ƹisa imɣaren x nnabi Musa

¹ Ay ayṯma ṣṣaliḥin, ḏ kenniw iy iǧan ḏ imƹacaren ḏeg uȓaɣi nni iy d yusin zeg ujenna. Fekkareṯ mliḥ ḏi Ƹisa, netta ḏ arrasul netta ḏ ȓefqi ameqqran n lʼiman iy xas ncehheḏ neccin.

² Ixḏem Ƹisa s lʼiḏen n wenni iy ṯid iƹeyynen mammec igga nnabi Musa uȓa ḏ netta ixḏem s lʼiḏen n Arebbi ḏi ayṯbab n ṯeddarṯ ṯekmaȓ n Arebbi.

³ Cuf, Ƹisa yufi-ṯ isḏaheǧ lƹaḍama ktar zi nnabi Musa mammec iǧa bab n ṯeddarṯ isḏaheɣ ccan ktar zi ayṯbab n ṯeddarṯ nni iy ḏinni d yurew.

⁴ Liʼanna kuȓ ṯaddarṯ ɣares wenni iy ṯen d yurwen u marra ijji-ṯen-d Arebbi.

⁵ Tuɣa nnabi Musa ixeddem nican ḏ amsexxar, itƹawan ayṯbab n ṯeddarṯ ṯekmaȓ n Arebbi, icehheḏ x ṯmesȓayin tuɣa ƹaḏ iy ɣa itwabeccaren ḏi lmustaqbel.

⁶ Walakin Lmasiḥ netta ḏ Mmis iḥekkem x ayṯbab n ṯeddarṯ n Arebbi, itkellaf zzaysen nican. U neccin ḏ ayṯbab-a n ṯeddarṯ nnes iƹni meȓa neṭṭef mliḥ ḏi zƹameṯ nneɣ u ḏi lʼamal nneɣ iy xef nteftaxar.

Arraḥeṯ n yinni itamnen

⁷ X manaya ammu iqqar Arruḥ iqeddsen: Nhara meȓa ṯesȓim i ṣṣut n Arebbi,

⁸ war seqsiḥeṯ ca uȓawen nwem mamc iy ggin Ayṯ-Israʼil wami ḏayi ƹṣan ḏi ȓweqṯ nni n ȓmiḥneṯ ḏi ȓexȓa.

⁹ Ḏeg umcan nni ȓejḏuḏ nwem zeƹƹmen-ayi s ṯɣennant aḏ ẓren nec min ƹenniɣ, waxxa uȓa ḏi arbeƹin iseggwusa ẓrin ȓexḏayem inu.

¹⁰ X manayenni sƹeṣṣben-ayi yiwḏan n zman nni. Nniɣ nec aqa ȓebda tbeƹƹaḏen xafi s wuȓawen nsen, ibriḏen inu war ṯen ssinen ca niṯni.

¹¹ Ssenni jjuǧeɣ s uɣḍab inu nniɣ ƹemmarṣ aḏ aḏfen ḏi arraḥeṯ inu.

¹² Ay ayṯma, ḥḍam ixef nwem bac uȓa ḏ ijjen zzaywem war ɣares itiȓi wuȓ ḏ abercan niɣ war ḏayes itiȓi bu lʼiman bac war itbeƹƹiḏ ca netta x Arebbi iddaren.

¹³ Lla, meȓa nzemmar a nini , ataf aḏ tcejjƹem ayawya kuȓ nhar bac war ḏinni itiȓi ḥadd zzaywem aḏ iḏweȓ iqseḥ wuȓ nnes aṯ texḏeƹ ȓmuƹṣiyeṯ nnes.

¹⁴ Aqa neccin a niȓi ḏ imƹacaren ḏi Lmasiḥ iƹni meȓa neqqim neṭṭef mliḥ aȓ uneggaru ḏi ttiqeṯ nni iy tuɣa ɣarneɣ ḏ amezwaru.

¹⁵ Mammec iqqar Lkitab:

¹⁶ Cuf, min ƹnan yinni isȓin ugin aḏ ggen array i Arebbi? Yac ḏ iwḏan nni marra ig isufeɣ nnabi Musa zi Miṣra niɣ?

¹⁷ Min ƹnan yinni isƹeṣṣaben Arebbi ḏi arbeƹin iseggwusa nni? Yac ḏ yinni iƹṣan Arebbi menḍaren ḏinni ḏi ȓexȓa nni am immurḍas niɣ?

¹⁸ U min ƹnan yinni iy xef ijjuǧ Arebbi inna-asen ƹemmarṣ aḏ aḏfen ḏi arraḥeṯ inu? Yac ḏ yinni war itṭiƹin ca niɣ?

¹⁹ Iwa neccin netwaȓa belli tuɣa war zemmaren ca aḏ aḏfen ḏi arraḥeṯ n Siḏi Arebbi minzi ugin aḏ amnen.