Iƹibraniyen 13 - Ṯarifiṯ 2020

Ȓuṣiyaṯ ṯineggura

¹ Qqimeṯ tḥibbaṯ ayawya am wawmaṯen.

² War tettuṯ ca aḏ treḥḥbem zi midden minzi ȓebƹaḍ iy ggin manayenni treḥḥaben zi lmalaʼikaṯ bȓa ma ṯent ssnen.

³ Xemmmeṯ ḏeg imeḥbas amecnaw kenniw iy kiḏsen ṯetwaḥebbsem ḏ yinni iy xef tbuṣaren amecnaw kenniw ṯetwaƹeddabem.

⁴ Weqqareṯ ȓemȓac marra. Qama n ȓemȓac aḏ tiȓi s nniyyeṯ bȓa ȓɣedȓan. Aqa Arebbi aḏ iƹaqeb yinni ifessḏen ḏ yinni izennan.

⁵ Aḏ tƹicem bȓa ma aḏ tḥibbem tmenyaṯ, aḏ tqenƹem s min ɣarwem. Arebbi s yixef nnes inna qa ƹemmarṣ ac jjeɣ, ƹemmarṣ aḏayek semḥeɣ.

⁶ S manayenni neqqar s zƹameṯ qa nec Siḏi Arebbi itƹawan-ayi maci aḏ ggwḏeɣ. Min ḏayi ɣa igg bnaḏem?

⁷ Ƹeqȓeṯ x yinni iy xawem itrayyan iƹni yinni issiwȓen akiḏwem s wawaȓ n Arebbi. Fekkareṯ ḏi min urwen niṯni s ṯuḏarṯ nsen, ggeṯ mammec iy ggin niṯni s lʼiman nsen.

⁸ Ƹisa Lmasiḥ netta ḏ ijjen, amecnaw iḍennaṭ amecnaw nhara amecnaw i ȓebda.

⁹ Arrem-d ȓbaȓ nwem bac war tḏeffarem ca lʼanwaƹ n useȓmeḏ feckel. Cuf, ḏ lemliḥ aḏ ijheḏ wuȓ nneɣ s arḍa maci s lmakla ddiniya, yinni iy t itetten war zzayes stenfiƹen ca.

¹⁰ Neccin ɣarneɣ ijjen n ȓmeḏbaḥ, zi ȓmeḏbaḥ-a war ɣarsen bu ȓḥaqq azzayes ccen yinni ixeddmen ḏeg Uqiḍun Ameqqran.

¹¹ Liʼanna ȓefqi ameqqran itawi-d akiḏes iḏammen n lḥayawanaṯ ɣar Uxxam Amqeddes Aṭṭas amecnaw ijjen n ṣṣeḏqeṯ x ȓmuƹṣiyeṯ, walakin lḥayawanaṯ nni immuṯen sḥarraqen-ṯen ɣar ȓeggwaj n mani qqimen yiwḏan ḏeg iqiḍan nsen.

¹² Ammu ƹaweḏ Ƹisa, ṯekka xas tamara nni ɣar ȓeggwaj n ṯewwarṯ n ṯendint bac aḏ issiṣfa ccaƹb s iḏammen nnes.

¹³ X manaya a nraḥ ɣar Ƹisa ɣar ȓeggwaj n iqiḍan a narbu aḥeggar nni iy xef iṣbar netta.

¹⁴ Minzi ḏanita war ɣarneɣ bu ṯendint itduman; Lla, nrezzu x ṯendint nni iy d ɣa yasen.

¹⁵ Iḏen labud s Ƹisa iy zi ɣa neḥmeḏ Arebbi ḏi mkuȓ ȓweqṯ. Ḏ ṯanita ḏ dbiḥeṯ iy ɣa nqeddem i Arebbi, iƹni meȓa neƹtaref s yisem nnes.

¹⁶ U war tettuṯ ca aḏ teggem ȓxir aḏ tcarcem ak inneɣni minzi s dbiḥaṯ-a am ṯina iy ḏas iteƹjiben i Arebbi.

¹⁷ Ṭaƹeṯ i yinni xawem itrayyan, ggem-asen array minzi ḏ yinni ig iḥeṭṭan ȓaƹmar nwem. Aḏ ucen niṯni ȓeḥsab x manaya i Arebbi. Ṭaƹeṯ i yina bac ȓxeḏmeṯ nsen azzayes farḥen war xasen tbessiȓ ca. Meȓa ṯeggim ṯaɣennant ataf war kenniw ineffeƹ walu.

¹⁸ Ttareṯ i Arebbi xaneɣ. Aqa neccin metʼakeddin ḍḍamir nneɣ mertaḥ, nrezzu a nexḏem s ȓeḥya marra ṯimesȓayin.

¹⁹ Tettareɣ-awem s wuȓ inu xaṣṣatan aḏ teẓẓaǧem bac ḏeɣya aɣarwem d ḏewȓeɣ.

Lxitam n ṯebrat-a

²⁰ Arebbi ḏayes ȓehna, ḏ netta iy d yarrin Siḏiṯneɣ Ƹisa zeg imettinen s iḏammen n ȓƹaheḏ ig itduman i ȓebda, Ƹisa-ya ḏ Ameksa Ameqqran n iḥuȓiyen.

²¹ Aḏawem iḏebbar Arebbi marra ṯimesȓayin ṯiṣebḥanin bac aḏ teggem ȓxaḍar nnes. Aḏayneɣ ixḏem min ḏas iteƹjiben zzaṯes, s Siḏiṯneɣ Ƹisa Lmasiḥ iy ɣar ɣa ṯiȓi lƹaḍama i ȓebda n ȓebdaṯ. Amin.

²² Fa ay ayṯma tettareɣ-awem aḏ teṣbarem i wawaȓ inu iy zi kenniw tweṣṣiɣ minzi uriɣ-awem-d ɣir ijjen n ṯebrat ḏ ṯamezyant.

²³ Itxeṣṣa aḏ tessnem belli ḍeȓqen-as-d i wumaṯneɣ Timutawus. Akenniw ẓreɣ akiḏes iƹni meȓa yusa-d ḏeɣya.

²⁴ Siwḍem-asen sȓam i marra yinni iy xawem itrayyan ḏ marra ṣṣaliḥin. Yina zi Iṭalya sawwaḍen-awem-d sȓam.

²⁵ Akiḏwem yiȓi arḍa marra iḏwem.