Iƹibraniyen 10 - Ṯarifiṯ 2020

Siḏiṯneɣ Ƹisa ig isenjamen maci ḏ ccariƹa

¹ Cuf, Ccariƹa n Musa nettaṯ ɣir ḏ ijjen n ṯiȓi n ṯmesȓayin ṯiṣebḥanin iy d ɣa yasen, war ṯeǧi ca nettaṯ ḏ ṯimesȓayin nni ḏ ṣṣaḥ. X manaya, dbiḥaṯ nni n ccariƹa iy teggen zi lƹam ɣar lƹam war zemmarent ƹemmarṣ aḏ ssiṣfant yinni itqarraben ɣar Arebbi aḏ iȓin bȓa ȓƹib.

² Dbiḥaṯ nni maƹlik zemmarent aḏ ssiṣfant, ataf ṣafi sbedden-ṯent niɣ lla? Liʼanna yinni iƹebbḏen ataf aḏ qqimen ḏ imenqawiyen ijjen n ṯwaȓa i ȓebda, ataf ḍḍamir nsen war itƹeddib ca s ȓmuƹṣiyeṯ.

³ Walakin dbiḥaṯ nni min ƹnant? Niṯenti tfekkarent-aneɣ kuȓ lƹam s ȓmuƹṣiyeṯ.

⁴ Liʼanna iḏammen n iyenduzen ḏ iɣayḏen war zemmaren ca aḏ kksen ȓmuƹṣiyeṯ, war itemkin ca.

⁵ X manaya, wami d yusa Lmasiḥ ɣar ddunect-a inna-as i Arebbi: <Ṯeswejḏeḏ-ayi ijjen n ddat, war ṯerzuḏ ca dbiḥaṯ ḏ ṣṣeḏqeṯ lla.

⁶ Tuɣa war ḏac iteƹjib bu ȓḥaȓ aḏac scemḍen lḥayawanaṯ, aḏac qeddmen ṣṣeḏqeṯ x ȓmuƹṣiyeṯ.

⁷ Uca nniɣ, Ay Arebbi aqayi usiɣ-d aḏ ggeɣ ȓxaḍar nnec, mamc xafi yura ḏi Lkitab.>

⁸ Ḏ amezwaru inna-as qa dbiḥaṯ ḏ ṣṣeḏqeṯ war ṯent ṯerzuḏ ca cek, war ḏac iteƹjib bu ȓḥaȓ aḏac cemḍen lḥayawanaṯ aḏac qeddmen ṣṣeḏqeṯ x ȓmuƹṣiyeṯ. (Ṯina tqeddamen-ṯent ƹlaḥsab ccariƹa.)

⁹ Ṯumma inna-as aqayi usiɣ-d aḏ ggeɣ ȓxaḍar nnec. Iƹni aḏ ikkes dbiḥaṯ nni ṯimezwura aḏ igg ḏeg umcan nsent dbiḥeṯ wis ṯnayen n Lmasiḥ.

¹⁰ U s ȓxaḍar nni neccin netwassiṣfa s dbiḥeṯ n ddat n Ƹisa Lmasiḥ, ijjen n ṯwaȓa i ȓebda.

¹¹ Ȓefqi kuȓ nhar itɣima netta itegg ccɣeȓ-a nnes, iƹni itqeddam aṭṭas n ṯwaȓaṯin nnefs n dbiḥaṯ, walakin dbiḥaṯ nni war zemmarent ca aḏ kksent ȓmuƹṣiyeṯ.

¹² Lmasiḥ lla, netta iqeddem ijjen n dbiḥeṯ waḥḏes x ȓmuƹṣiyeṯ ijjen n ṯwaȓa i ȓebda, uca iqqim netta x ufusi n Arebbi.

¹³ Ssenni iqqim itraja ȓƹaḏyan nnes aḏ iȓin swadday iḍaren nnes.

¹⁴ Liʼanna yinni itḏewwaȓen ḏ ṣṣaliḥin issiṣfa-ṯen ḏeg yijjen n ṯwaȓa i ȓebda s yijjen n dbiḥeṯ u ṣafi bac aḏ iȓin bȓa ȓƹib.

¹⁵ Fa icehheḏ-aneɣ Arruḥ iqeddsen x manaya. Ḏ amezwaru iqqar:

¹⁶ <Ḏ wanita ḏ ȓƹaheḏ iy ɣa ggeɣ ak Ayṯ-Israʼil menbaƹd i ȓweqṯ nni, iqqar-iṯ Siḏi Arebbi. Aḏasen siḏfeɣ ȓuṣiyaṯ inu ḏeg wuȓawen nsen, aɣarsen iȓint ḏ ṯira x ȓaƹquȓaṯ nsen.>

¹⁷ Ssenni yarni inna: <Ȓmuƹṣiyaṯ nsen ḏ ssayiʼaṯ nsen war ḏaysent tfekkareɣ ca ƹaḏ.>

¹⁸ Ṯina, meȓa twaɣfarent maci ƹaḏ aḏ iqeddem can yijjen dbiḥeṯ x ȓmuƹṣiyeṯ.

Yallaheṯ a naḏfeṯ ɣar Arebbi s lʼiman

^19-20 Iḏen fa ay ayṯma, ɣarneɣ ijjen n zƹameṯ bac a naḏef ɣar Uxxam Amqeddes Aṭṭas s iḏammen n Ƹisa iƹni s yijjen n ubriḏ ḏ jḏiḏ iddaren, innurzem-aneɣ wami iqqarṣ arrwaq nni iƹni ddat nnes.

^21-22 Ɣarneɣ ijjen n ȓefqi ameqqran imɣar netta iḥekkem x ṯeddarṯ n Arebbi. Ƹlaḥsab ȓefqi-ya iy ɣarneɣ, a nqarrbeṯ ɣar Arebbi s yijjen n wuȓ ḏ acemȓaȓ ḏ yijjen n ttiqeṯ ṯejheḏ. Ƹaweḏ uȓawen nneɣ aḏ iȓin twaruccen bac ḍḍamir nneɣ aḏ itwassiṣfa war itƹeddib ca s ȓmuƹṣiyeṯ. U ƹaweḏ ddat nneɣ aḏ tiȓi twasireḏ s waman iṣfan.

²³ A neṭṭef bȓa ma a neḍȓeq ḏi lʼamal nni iy xef ncehheḏ liʼanna Arebbi iy ḏaneɣ iweƹḏen ḏayes ttiqeṯ.

²⁴ Neccin a nxemmem mliḥ mammec iy ɣa negg a nweṣṣa ayawya x ȓemḥibbeṯ ḏ lḥasanaṯ.

²⁵ A nmun ak wayawya maci a nesmeḥ ḏi lwajib-a am mammec nnumen [nnimen] ȓebƹaḍ n yiwḏan. Lla, a ncejjeƹ ayawya, u ktar ƹaḏ xmi netwaȓa Nhar n Siḏiṯneɣ iqarreb-d.

²⁶ Cuf, neccin meȓa netƹic s ȓmuƹṣiyeṯ s ȓxaḍar nneɣ u nessen lḥaqiqa, ataf war ɣarneɣ bu can dbiḥeṯ aḏ tekkes ȓmuƹṣiyeṯ nneɣ.

²⁷ Lla, neccin ɣir netraja ijjen n Lḥisab ḏ Lƹiqab s ṯiggwḏi ḏ yijjen n ṯmessi ṯḥeddeq aḏ tecc ȓƹaḏyan n Arebbi.

²⁸ Wenni tuɣa ixeȓfen ḏi Ccariƹa n Musa, meȓa cehḏen xas ṯnayen niɣ ṯȓaṯa n ȓechuḏ ataf aḏ immeṯ bȓa ma ṯ reḥmen.

²⁹ Y kenniw, min tfekkarem? Mecḥaȓ iy ɣa yiȓi lƹiqab ig isḏaheǧ wenni iseḥqaren Mmis n Arebbi, isexnez iḏammen n ȓƹaheḏ nni iy zi itwassiṣfa, izebbeȓ Arruḥ n arḍa!

³⁰ Aqa neccin nessen belli ḏ Arebbi ig innan qa ḏ nec ig itentaqamen aṯen xeǧseɣ.

³¹ Meȓa ijjen ḥekkmen xas ifassen n Arebbi iddaren, ataf manaya isaggwaḏ.

³² Fa ƹeqȓeṯ x wussan nni iƹḏun wami xawem d iceƹceƹ nnur. Ṯeṣbarem x yijjen n umenɣi iqseḥ, ṯwajham aƹeddeb.

³³ Ȓebƹaḍ n ṯwaȓaṯin tzebbaȓen-kenniw tƹeddaben-kenniw, iwḏan tfurrujen xawem. Ȓebƹaḍ n ṯwaȓaṯin tƹawanem yinni itwaƹeddaben tbeddam akiḏsen.

³⁴ Liʼanna imeḥbas qqimen ḏaywem ḏeg wuȓ. Ƹaweḏ ṯeṣbarem s ȓefraḥeṯ wami ḏawem kksin agȓa nwem, tuɣa tessnem ƹaḏ aɣarwem yiȓi ijjen n wagȓa ḥsen zeg unneɣni, itduman.

³⁵ Iḏen ejjeṯ ttiqeṯ nwem, nettaṯ aḏawem d ṯawi ijjen n lʼajar imɣar.

³⁶ Aqa itxeṣṣa aḏ teṣbarem, mayemmi? Bac xmi ɣa ṯeggem ȓxaḍar n Arebbi, ataf aɣarwem yiȓi minzi iy kenniw iwƹeḏ.

³⁷ Liʼanna ṯeqqim ḏrust n ȓweqṯ aḏ d yaweḍ wenni iy d itasen war itƹeṭṭaȓ ca.

³⁸ Walakin wenni iǧan nican aḏ iƹic s lʼiman. Meȓa iƹqeb ɣar ḏeffar ataf war xas reṭṭiɣ ca.

³⁹ Walakin neccin maci zeg yinni itƹeqaben ɣar ḏeffar bac a nefna; Lla, neccin zeg yinni itamnen a nsenjem ȓaƹmar nneɣ.