Filimun 1 - Ṯarifiṯ 2020

Lmuqaddima

¹ Nec ḏ Bulus aqayi ḏ ameḥbus ƹlaḥsab Ƹisa Lmasiḥ akiḏi umaṯneɣ Timutawus. Tariɣ ṯabrat-a i Filimun iǧan ḏ amƹacar nneɣ iy xaneɣ iƹizzen,

² ḏ učmaṯneɣ Ƹabya ḏ umaṯneɣ Arkippus wenni iy kiḏneɣ itemƹacaren am yijjen n umjaheḏ, u ƹaweḏ ḏ jmaƹṯ n ȓmuminin itmunan ḏi ṯeddarṯ nnec.

³ Akiḏwem yiȓi arḍa ḏ ȓehna zi Arebbi Babaṯneɣ ḏ Ƹisa Lmasiḥ Siḏiṯneɣ.

Ṭṭaleb n arrasul Bulus ɣar Filimun

⁴ Ȓebda tcekkareɣ Arebbi inu xmi tfekkareɣ ḏayec ḏi ṯẓaǧiṯ inu.

⁵ Qa nec tesȓiɣ x lʼiman nnec iy ḏayec zi Siḏiṯneɣ Ƹisa ḏ ȓemḥibbeṯ nnec ɣar marra ṣṣaliḥin.

⁶ Tettareɣ i Arebbi x ṯemƹacarṯ nneɣ ḏi lʼiman ac ṯawi ɣar yijjen n ȓefhameṯ ṯekmaȓ x kuȓ ṯamesȓayṯ ṯaṣebḥant ig iǧan ɣarneɣ ḏi Lmasiḥ.

⁷ Ay uma, ȓemḥibbeṯ iy ɣarec cek ticc-ayi-d ijjen n ȓefraḥeṯ ḏ ucejjaƹ ḏ ameqqran minzi cek ṯsiḥemmiḏ uȓawen n ṣṣaliḥin.

⁸ Iḏen, min itxeṣṣan aḏ teggeḏ zemmareɣ nec ac amareɣ s zƹameṯ ḏi Lmasiḥ aṯ teggeḏ,

⁹ walakin ḥsen ac ttareɣ manaya s ȓemḥibbeṯ. Iwa nec ḏ Bulus aqayi numɣareɣ, ȓexxu aqayi ƹaweḏ ḏi ȓeḥbes ƹlaḥsab Siḏiṯneɣ Ƹisa.

¹⁰ Tettareɣ-cek x Wanisamu wenni iǧan am memmi, arriɣ-ṯ nec ḏ mmi wami tuɣaṯ akiḏi ḏi ȓeḥbes.

¹¹ Qbeȓ i manaya tuɣa netta war c ineffeƹ ca, ȓexxu iḏweȓ aḏaneɣ ineffeƹ nec ḏ cek.

¹² Aqa nec tarriɣ-ac-ṯ-iḏ axmi ɣa c d ssekkeɣ uȓ inu.

¹³ Mecḥaȓ nec tuɣa rezzuɣ akiḏi iqqim ḏanita aḏayi iƹawen ḏeg umcan nnec zeg wami ǧiɣ ḏanita ḏi ȓeḥbes-a ƹlaḥsab Lʼinjil.

¹⁴ Walakin nec war xseɣ ca aḏ ggeɣ can n ȓḥajeṯ bȓa array nnec; Nec xseɣ ȓxir nnec aḏayi d yas s ȓxaḍar nnec maci s yijjen n bezzez zzayi lla.

¹⁵ Netta imken x ssabab-a iy xak ifareq ḏeg yijjen n lmudda bac aɣarec d iḏweȓ ȓexxu i ȓebda.

¹⁶ Walakin ȓexxu maci am ismeɣ, netta ḥsen zeg ismeɣ: Am umac iy xac iƹizzen. Netta iƹizz xafi, walakin cek iƹizz xac ktar: ḏi ȓxeḏmeṯ u ƹaweḏ am umac ḏi Siḏiṯneɣ.

¹⁷ Falihaḏa, meȓa ṯḥesbeḏ-ayi ḏ amƹacar nnec, qbeȓ-iṯ axmi ḏayi ṯqebȓeḏ nec.

¹⁸ Meȓa iḍȓem-ic ḏi ca n ṯamesȓayṯ niɣ meȓa ḏinni can n umarwas jarawem, ḥseb-iṯ xafi nec.

¹⁹ Qa nec ḏ Bulus tariɣ manaya s ufus inu: Aḏac ṯ xeǧseɣ nec. Bȓa ma aḏac iniɣ qa ttarseɣ-ac uȓa ḏ ṯuḏarṯ nnec.

²⁰ Wah ay uma, xseɣ azzayek rebḥeɣ ijjen n nnfaƹ ḏi Siḏiṯneɣ, siḥma-ayi uȓ inu ḏi Lmasiḥ.

²¹ Nec tʼakkadeɣ s ṭṭaƹa nnec, s manaya tariɣ-ac-d ṯabrat-a ssneɣ cek aḏ teggeḏ ktar zi min ḏac tṭalabeɣ.

²² U ƹaweḏ sewjeḏ-ayi ijjen n ṯɣurfat, tmenniɣ aɣarwem d ƹeqbeɣ ƹlaḥsab ṯẓaǧiṯ nwem.

Lxitam n ṯebrat-a

²³ Isawwaḍ-ac-d sȓam Pafras wenni iy kiḏi iǧan ḏ ameḥbus ƹlaḥsab Ƹisa Lmasiḥ.

²⁴ Sawwaḍen-ac-d sȓam ƹaweḏ Marqus ḏ Aristarxus ḏ Dimas ḏ Luqa iǧan marra ḏ imƹacaren inu.

²⁵ Aḏ yiȓi ak arruḥ nwem arḍa n Siḏiṯneɣ Ƹisa Lmasiḥ.