Ayṯ-Ufasus 3 - Ṯarifiṯ 2020

Imeḍhar-d ȓmaƹna inuffaren x Lʼinjil

¹ X manaya terkaƹeɣ x ifadden inu, nec Bulus iy iǧan ḏ ameḥbus ƹlaḥsab Ƹisa Lmasiḥ u xawem kenniw iy war iǧin ca zi Ayṯ-Israʼil...

² Ma ṯesȓam niɣ lla x lmesʼuliya nni, iƹni ijjen n lbaraka iy ḏayi yuca Arebbi xawem kenniw?

³ Iƹni ȓmaƹna inuffaren x Lʼinjil ismeḍhar-ayi-iṯ-iḏ isehwa-ṯ-iḏ xafi s lwaḥi mamc ḏawem t uriɣ cwayt zi qbeȓ.

⁴ Xmi ɣa ṯɣarem manaya aḏ tessnem ȓefhameṯ inu iy ɣari ḏi ȓmaƹna-ya inuffaren x Lmasiḥ.

⁵ Ȓmaƹna-ya war ṯiḏ ismeḍhar ca Arebbi i ṯarwa n Adam ḏi zmanaṯ iy iƹḏun am mammec ṯiḏ ismeḍhar ȓexxu s Arruḥ iqeddsen i arrusul ṣṣaliḥin ak lʼanbiya.

⁶ Ȓmaƹna-ya inuffaren ṯanita, min ṯeƹna? Aqa uȓa ḏ yinni war iǧin ca zi Ayṯ-Israʼil aḏ warṯen zi Arebbi ak Ayṯ-Israʼil s Lʼinjil. Niṯni ḏ ijjen n jmaƹeṯ, marra aḏ carcen ḏi min iwƹeḏ Arebbi ḏi Lmasiḥ.

⁷ Ḏewȓeɣ ḏ axeddam n Lʼinjil-a ƹlaḥsab lbaraka n Arebbi wami ḏayi t ihḏa isexḏem-it s jjheḏ nnes.

⁸ Lbaraka-ya yuca-ayi-t Arebbi waxxa ḏ amezyan iy ǧiɣ x marra ṣṣaliḥin bac nec aḏ beccareɣ yinni war iǧin ca zi Ayṯ-Israʼil aḏ ssnen agȓa nni n Lmasiḥ iy war itwacerriḥen ca.

⁹ Ƹaweḏ bac aḏ seḍhareɣ mliḥ i marra iwḏan min ixeṭṭeṭ Arebbi ḏi ȓmaƹna nni inuffaren ig ijja netta ḏeg yixef nnes ḏi zmanaṯ iy iƹḏun u ḏ netta ḏ Lxaliq n marra min iǧan ḏ ṯimesȓayin.

¹⁰ Min ixeṭṭeṭ netta? Yinni ig iḥekkmen ḏ yinni ig ijehḏen ḏeg ijennaṯen ȓexxu aḏ ssnen x ufus n jmaƹeṯ n ȓmuminin min ṯeƹna ȓefhameṯ n Arebbi x marra ṯimesȓayin.

¹¹ Manaya iǧa ƹlaḥsab lɣaraḍ n Arebbi zi ȓebda, u lɣaraḍ-a ikemmeȓ-iṯ s Ƹisa Lmasiḥ Siḏiṯneɣ.

¹² Zzayes netta a nqarreb ɣar Arebbi s zƹameṯ ḏ ttiqeṯ bȓa ma a neggweḏ xmi zzayes ntamen.

¹³ Falihaḏa nniɣ-awem war tefciȓeṯ ca ƹlaḥsab aƹeddeb inu xawem ȓaḥeqqac manaya akenniw infeƹ.

Arrasul Bulus itẓaǧa x ȓmuminin n Ayṯ-Ufasus

¹⁴ Nniɣ-awem x manaya nec terkaƹeɣ x ifadden inu zzaṯ i Babaṯneɣ.

¹⁵ Zzayes netta iy d tekken isemawen n lʼaṣel n marra ȓeḥbab n ujenna ḏ ṯmurṯ.

¹⁶ Tettareɣ i Arebbi zeg wagȓa nnes aƹḍim akenniw isejheḏ ḏi nnefs nwem s ufus n Arruḥ nnes

¹⁷ ḥima Lmasiḥ aḏ izḏeɣ ḏeg wuȓawen nwem s lʼiman. Tettareɣ i Arebbi ƹaweḏ aḏ twaẓẓum aḏ tuwṯem mliḥ iẓewran ḏeg ucaȓ n ȓemḥibbeṯ

¹⁸ bac aḏ yiȓi ɣarwem jjheḏ ak marra ṣṣaliḥin aḏ tzemmarem aḏ tfehmem mecḥaȓ ṯiȓiw mecḥaȓ ṯazeyrarṯ mecḥaȓ ṯuƹȓa mecḥaȓ ṯuǧeɣ ȓemḥibbeṯ n Lmasiḥ.

¹⁹ Aḏ tessnem ƹaweḏ mliḥ ȓemḥibbeṯ-a ṯanita n Lmasiḥ mecḥaȓ ṯemɣer x marra ṯusna ḏi ddunect-a bac aḏ teccarem s min iccur Arebbi.

²⁰ Iwa Siḏi Arebbi ḏ netta iy izemmaren aḏ igg aṭṭas s waṭṭas zi min ḏas ntettar niɣ ḏ min netxeyyal ƹlaḥsab jjheḏ nnes iy ixeddmen ḏayneɣ.

²¹ Aɣares ṯiȓi lƹaḍama ḏi jmaƹeṯ n ȓmuminin u ƹaweḏ ḏi Ƹisa Lmasiḥ zi ljil ɣar ljil i ȓebda n ȓebdaṯ. Amin!