Ayṯ-Ruma 5 - Ṯarifiṯ 2020

Ȓefraḥeṯ ḏ ȓehna ak Arebbi

¹ Iḏen fa wami ḏaneɣ isemṣȓaḥ Arebbi akiḏes s lʼiman nneɣ aqaneɣ ḏi ȓehna ak Arebbi x ufus n Siḏiṯneɣ Ƹisa Lmasiḥ.

² Netta zzayes iy nufa abriḏ s lʼiman ɣar arḍa iy ḏi neǧa ȓexxu. Nfarreḥ ḏi lʼamal n lƹaḍama n Arebbi.

³ War iǧi ɣir manaya waha, nfarreḥ neccin uȓa ḏi ȓemḥayen. Nessen belli ȓemḥayen-a tarwent-id ṣṣbar.

⁴ Ṣṣbar-a itarew ḏayneɣ minzi ɣa neɣȓeb x ȓemḥayen. S ȓeɣȓab-a x ȓemḥayen itarew ḏayneɣ lʼamal.

⁵ Lʼamal-a war ḏaneɣ itxeyyib ca, mayemmi? Liʼanna Arebbi yuca-aneɣ Arruḥ iqeddsen, zzayes ig iccur uȓawen nneɣ s ȓemḥibbeṯ nnes.

⁶ Fa ḏi ȓweqṯ nni nican ṯenni tuɣa ixḍar Arebbi neccin war ɣarneɣ bu jjheḏ, immuṯ Lmasiḥ xaneɣ wami neƹṣa.

⁷ Muḥaȓ aḏ iqbeȓ can yijjen aḏ immeṯ x yijjen n bnaḏem nneɣni ḏ aṣebḥan waha. Meȓa bnaḏem aqaṯ ḏ aṣebḥan aṭṭas, imken can yijjen axas iqbeȓ aḏ immeṯ.

⁸ Walakin neccin tuɣaneɣ ƹaḏ nƹeṣṣa Arebbi wami immuṯ xaneɣ Lmasiḥ. S manayenni isbeyyen-aneɣ-d Arebbi mecḥaȓ ḏaneɣ itexs.

⁹ Iḏen, aqaneɣ bariʼin ȓexxu s iḏammen n Lmasiḥ, u labud zzayes iy ɣa nenjem zeg uɣḍab n Arebbi.

¹⁰ Neccin nmeṣȓaḥ ak Arebbi s ȓmewṯ n Mmis wami tuɣaneɣ neccin ƹaḏ ḏ ȓƹaḏyan nnes. Ȓexxu wami kiḏes nmeṣȓaḥ, u labud zzayes iy ɣa nenjem s ṯuḏarṯ nnes!

¹¹ War iǧi ɣir manaya waha, neccin nfarreḥ zi Arebbi s Siḏiṯneɣ Ƹisa Lmasiḥ wenni iy ḏaneɣ isemṣȓaḥen akiḏes.

Ȓfarq jar Siḏna Adam ḏ Siḏiṯneɣ Ƹisa

¹² Iḏen, ṯban-d ȓmuƹṣiyeṯ ɣar ddunect s yijjen n bnaḏem, iƹni Adam. S ȓmuƹṣiyeṯ nni iy ṯeǧa ȓmewṯ. Ssenni ṯnefreq ȓmewṯ x yiwḏan marra liʼanna iwḏan marra ƹṣan.

¹³ Aqa ȓmuƹṣiyeṯ tuɣa teǧa ḏi ddunect qbeȓ ma aḏ d ṯas ccariƹa. Walakin mani war ṯuwiḍ ca ccariƹa, Arebbi war ḏinni itḥisib bu ȓmuƹṣiyeṯ.

¹⁴ Innama, zi zman n Adam aȓ zman n Musa ṯḥekkem ȓmewṯ x yiwḏan uȓa x yinni war iƹṣin ca amecnaw ȓmuƹṣiyeṯ n Adam, u netta ḏ ȓmiṯal n bnaḏem iy d ɣa yasen.

¹⁵ Walakin ȓmuƹṣiyeṯ n Adam war nzemmar at nmeṯṯel ak lhadiya n arḍa n Arebbi. Cuf, ijjen n bnaḏem, netta ḏ Adam, iƹṣa Arebbi yuwi-d ȓmewṯ i marra yiwḏan. Ȓexxu mecḥaȓ imɣar arḍa n Arebbi ḏ lhadiya iy d infeyyḍen x yiwḏan s arḍa n yijjen n bnaḏem nneɣni netta ḏ Ƹisa Lmasiḥ.

¹⁶ Cuf ƹaweḏ, lhadiya n Arebbi maci amecnaw min iweqƹen x ssabab n ȓmuƹṣiyeṯ igga bnaḏem nni Adam. Liʼanna ȓḥukem iy d ṯuwi ijjen n ȓmuƹṣiyeṯ netta ḏ lḥisab ḏ lƹiqab. Walakin s lhadiya-ya Arebbi isemṣȓaḥ akiḏes bnaḏem menbaƹd i waṭṭas n ȓmuƹṣiyaṯ.

¹⁷ Iƹni, s ssabab n ȓmuƹṣiyeṯ nni n yijjen n bnaḏem ṯebḏa ȓmewṯ ṯḥekkem x yiwḏan s ssabab n bnaḏem nni. Ȓexxu s ssabab n yijjen n bnaḏem, iƹni s Ƹisa Lmasiḥ, ḏ ṯuḏarṯ nettaṯ ṯḥekkem aṭṭas x yinni iqebbȓen arḍa imɣaren n Arebbi ḏ lhadiya iy ṯen isemṣȓaḥen akiḏes.

¹⁸ Iḏen ijjen n ȓmuƹṣiyeṯ ig igga ijjen n bnaḏem ṯuwi-d lḥisab ḏ lƹiqab i marra iwḏan. Amenni ijjen n baraʼa ig igga ijjen n bnaḏem yuwi-d ṣṣulḥ ḏ ṯuḏarṯ i marra iwḏan.

¹⁹ Liʼanna mammec iƹṣa Adam Arebbi yuwi-d ȓmuƹṣiyeṯ i waṭṭas n yiwḏan, amenni iṭaƹ Ƹisa i Arebbi ssenni meṣȓaḥen aṭṭas n yiwḏan ak Arebbi.

²⁰ U ccariƹa nettaṯ ṯuḏef-d ḥima aḏ kṯarent ȓmuƹṣiyaṯ. Walakin cḥaȓ ma kṯarent ȓmuƹṣiyaṯ, arḍa n Arebbi ikṯar ktar zzaysent.

²¹ U mammec ṯeḥkem ȓmuƹṣiyeṯ ṯuwi-d ȓmewṯ, amenni iy xaneɣ iḥkem arḍa wami ḏaneɣ isemṣȓaḥ Arebbi akiḏes yuwi-d ṯuḏarṯ n ȓebda x ufus n Siḏiṯneɣ Ƹisa Lmasiḥ.