Ayṯ-Ruma 3 - Ṯarifiṯ 2020

Ȓḥaqq n Arebbi ismeḍhar-d ȓbaṭeȓ n yiwḏan

¹ Iwa israʼiliyen, ma ɣarsen can nnfaƹ x yinni war iǧin ca zi Ayṯ-Israʼil? Ƹaweḏ ṭṭahareṯ, ma ḏayes can nnfaƹ?

² Wah, aṭṭas n nnfaƹ! Ḏ amezwaru, ijja-asen-d Arebbi awaȓ nnes ḏ lʼamana.

³ Iwa meȓa ȓebƹaḍ zzaysen war uminen ca, ma s lkufer nsen iy zi ɣa isbeṭṭeȓ Arebbi ȓƹaheḏ nnes?

⁴ Ƹemmarṣ! Ȓaḥeqqac Arebbi iqqar lḥaqiqa waxxa iwḏan marra sxerriqen. Mammec iqqar Lkitab:

⁵ Fa meȓa ȓbaṭeȓ nneɣ iy ntegg ismeḍhar-d ȓḥaqq n Arebbi, min ɣa nini? (Nec ssawaȓeɣ ƹlaḥsab lfikra n bnaḏem.) Arebbi, ma iḍeǧem-aneɣ xmi ḏaneɣ itƹaqab?

⁶ Lla, ƹemmarṣ! Maƹlik amenni, mammec ɣa igg Arebbi aḏ iḥaseb ddunect-a?

⁷ Imken aḏ yini can yijjen: Mȓi ȓbaṭeȓ inu netta ismeḍhar-d mliḥ lḥaqiqa n Arebbi, mȓi zzayes itmarni Arebbi ḏi lƹaḍama nnes, iwa mayemmi ḏayi ɣa iḥseb ḏ lƹaṣi?

⁸ Niɣ aḏ yini can yijjen: Yallah a negg ȓbaṭeȓ ḥima azzayes d ikk ȓxir. Amenni tahamen-aneɣ can yiwḏan s ẓẓur belli neqqar awaȓ-a. Iwḏan-a niṯni sḏaheǧen lƹiqab n Arebbi!

Iwḏan marra ƹeṣṣan Arebbi war ǧin ca nican

⁹ Iwa neccin Ayṯ-Israʼil, ma lḥala nneɣ ḥsen zeg yiwḏan nneɣni? Lla, ƹemmarṣ! Nenna qbeȓ qa Ayṯ-Israʼil ḏ yinni war iǧin ca zi Ayṯ-Israʼil marra negga ȓmuƹṣiyeṯ.

¹⁰ Mammmec iqqar Lkitab:

¹¹ Uȓa ḏ ijjen ma ifehhem. War irezzu x Arebbi, uȓa ḏ ijjen.

¹² Ffɣen abriḏ marra iḏsen, ḏewȓen marra war neffƹen. War iǧi ḥadd itegg min iṣebḥan.

¹³ Ṯmijja nsen ḏ anḍeȓ inurzmen, iȓesawen nsen ixeddƹen. Ssem n ifiɣeran iteffeɣ-d zeg iyencicen nsen.

¹⁴ Nnaƹȓeṯ ḏ ṯarzugi iccur zzaysen uqemmum nsen.

¹⁵ Tqelliqen s iḍaren nsen aḏ sizzȓen iḏammen.

¹⁶ Tejjan arrwina ḏ lʼazma mani ma ruḥen,

¹⁷ abriḏ n ȓehna war ṯ ssinen.

¹⁸ Ṯiggwḏi zi Arebbi war ɣarsen ṯeǧi jar ṯiṭṭawin nsen.>

¹⁹ Fa neccin nessen belli marra min ḏayes ḏi ccariƹa n Musa tweṣṣa yinni ɣar ṯeǧa ccariƹa-ya bac uȓa ḏ ijjen war ɣares itiȓi bu lƹuder. U marra yinni iǧan ḏi ddunect-a aḏ iȓin swadday n lḥisab n Arebbi.

²⁰ Falihaḏa, uȓa ḏ ijjen n bnaḏem war izemmar aḏ imeṣȓaḥ ak Arebbi s ȓexḏayem iy ḏayes ḏi ccariƹa; Lla, ccariƹa ṯesbeyyan-aneɣ-d min ṯeƹna ȓmuƹṣiyeṯ.

S lʼiman waḥḏes iy zi netmeṣȓaḥ ak Arebbi

²¹ Fa ȓexxu Arebbi ismeḍhar-aneɣ-d mammec ɣa negg a nmeṣȓaḥ akiḏes bȓa ccariƹa. Manaya ṣaḥḥen-ṯ Lkutub n lʼanbiya ḏ ccariƹa n Musa niṯni s yixef nsen.

^22-23 Iƹni, Arebbi isemṣȓaḥ akiḏes marra wenni itamnen zi Ƹisa Lmasiḥ, war itferraq jar yiwḏan. Aqa marra ƹṣan Arebbi, twaḥarramen zi lƹaḍama nnes.

²⁴ Arebbi, netta isemṣȓaḥ-iṯen akiḏes s arḍa nnes baṭeȓ s usenjem iy d yusin s Ƹisa Lmasiḥ.

²⁵ Arebbi iqeddem-iṯ ḏ lfidya ḥima aḏ twaɣfarent ȓmuƹṣiyaṯ s iḏammen nnes, iƹni i yinni iqebbȓen manayenni s lʼiman nsen. S manayenni ismeḍhar-d Arebbi ȓḥaqq nnes. Netta tuɣa iṣebbar, war t yuwi ca ḏi ȓmuƹṣiyaṯ nni iy iƹḏun,

²⁶ ḥima aḏ d ismeḍhar ḏi zman-a ȓḥaqq nnes. Liʼanna Arebbi netta nican ig iǧa, netta isemṣȓaḥ akiḏes wenni ɣa yamnen zi Ƹisa.

²⁷ Iwa ma a neftaxer s can ȓḥajeṯ? Lla, memnuƹ! Ma memnuƹ s ccariƹa, iƹni s lḥasanaṯ? Lla, s lʼiman!

²⁸ Mayemmi? Ȓaḥeqqac neccin ɣarneɣ belli bnaḏem ismeṣȓah-iṯ Arebbi akiḏes s lʼiman nnes bȓa lḥasanaṯ n ccariƹa.

²⁹ Iwa Arebbi, ma netta ḏ Arebbi n Ayṯ-Israʼil waha? Lla! Ma war iǧi uȓa ḏ Arebbi n yiwḏan war iǧin ca zi Ayṯ-Israʼil? Wah, ḏ Arebbi nsen uȓa ḏ niṯni.

³⁰ Liʼanna Arebbi netta ḏ ijjen. Ḏ netta ig ismeṣȓahen Ayṯ-Israʼil akiḏes s lʼiman, ḏ yinni war iǧin ca zi Ayṯ-Israʼil s nnefs lʼiman.

³¹ Iḏen, ma a nesbeṭṭeȓ ccariƹa s lʼiman-a? Ƹemmarṣ! Lla, neccin netḥama ccariƹa.