Ayṯ-Ruma 14 - Ṯarifiṯ 2020

War tƹeyyab ca x wumac

¹ Fa wenni umi iḍƹef lʼiman nnes qebȓem-ṯ jarawem bȓa ma akiḏes ṯmenɣem x lʼafkar nnes.

² Ijjen itwaȓa lmakla marra ḥalal. Ijjen nneɣni wenni ɣar iǧa lʼiman nnes iḍƹef itett ɣir ȓxuḍarṯ.

³ Wenni itwaȓan marra lmakla ḥalal itxeṣṣa-yas war iseḥqir ca wenni war itetten ca. Ƹaweḏ wenni war itetten ca itxeṣṣa-yas war itƹeyyib ca x wenni itwaȓan lmakla marra ḥalal liʼanna Arebbi iqbeȓ-iṯ.

⁴ Cek min ṯeƹniḏ bac aḏ tƹeyybeḏ axeddam n midden? Injeḥ niɣ war injiḥ, wanita ḏ ccɣeȓ n siḏis. U ḏ ṣṣaḥ netta aḏ injeḥ liʼanna Siḏi Arebbi izemmar aṯ isenjeḥ.

⁵ Cuf, ijjen itwaȓa ijjen n nhar mubarek zi nhuraṯ nneɣni. Ijjen itwaȓa-ṯen qaƹ kif-kif. Kuȓ ijjen itxeṣṣa-as labud aḏ yiȓi meqtanaƹ mliḥ s array nnes.

⁶ Wenni itwaȓan ijjen n nhar mubarak zeg unneɣni aḏ igg manaya bac aḏ iweqqar Siḏi Arebbi. Wenni itetten zi marra lmakla qa itett bac aḏ iweqqar Siḏi Arebbi liʼanna aḏ icekkar Arebbi. Wenni war itetten ca zi marra lmakla qa itegg manaya ḥima aḏ iweqqar Siḏi Arebbi, uȓa ḏ netta aḏ icekkar Arebbi.

⁷ Cuf, war ḏayneɣ ḥadd iddar i yixef nnes, war ḏayneɣ ḥadd itmetta i yixef nnes.

⁸ Neccin meȓa neddar, a neddar i Siḏi Arebbi. Meȓa nemmuṯ, a nemmeṯ i Siḏi Arebbi. Falihaḏa, meȓa neddar niɣ nemmuṯ neccin n Siḏi Arebbi.

⁹ Liʼanna x manaya iy xef immuṯ Lmasiḥ uca ṯeƹqeb-d ḏayes ṯuḏarṯ ḥima aḏ yiȓi netta ḏ Siḏiṯsen n yinni immuṯen ḏ yinni iddaren.

¹⁰ Iwa cek mayemmi tƹeyyabeḏ umac? Cek mayemmi ṯseḥqareḏ umac? Neccin marra a nbedd zzaṯ i lƹarc n Arebbi mani iy ɣa netwaḥkem.

¹¹ Aqa yura ḏi Lkitab:

¹² Falihaḏa, mkuȓ ijjen zzayneɣ aḏ itwaḥaseb zzaṯ i Arebbi.

War ɣeṭṭeȓ ca umac

¹³ Iḏen zi ssa aȓ ṯsawent itxeṣṣa-yaneɣ u labud war netƹeyyib ca x wayawya; Lla, itxeṣṣa-kenniw aḏ tfekkarem mliḥ ḥima war ṯɣeṭṭȓem ca ijjen wumaṯwem niɣ aṯ tesfecȓem.

¹⁴ Nec ssneɣ u mteyyqen ḏi Siḏiṯneɣ Ƹisa aqa min nettet war ḏayes bu can ȓḥajeṯ ḥram. Walakin itiȓi ḥram x wenni iy t itwaȓan ḥram.

¹⁵ Liʼanna meȓa itxeyyaq wumac s macca nni iy tetteḏ, ataf cek war ṯuggureḏ ca nican s ȓemḥibbeṯ. War tegg ca macca nnec ḏ ssabab iy zi ɣa inehḏem wumac wenni mix immuṯ Lmasiḥ.

¹⁶ Amenni war tejjam ca iwḏan aḏ ssiwȓen ccarr x min twaȓim ḏ aṣebḥan.

¹⁷ Liʼanna ȓmulk n Arebbi netta war iǧi ca s macca niɣ ḏ ṯisessi; netta s umṣȓaḥ ak Arebbi ḏ ȓehna ḏ ȓefraḥeṯ s Arruḥ iqeddsen.

¹⁸ Wenni iy ɣa ixeḏmen i Lmasiḥ amenni, aqa Arebbi ireṭṭa xas iwḏan tcekkaren-ṯ.

¹⁹ Iḏen fa itxeṣṣa-yaneɣ u labud a negg lmejhud nneɣ bac a negg min itawin ɣar ȓehna ḏ minzi ɣa ncejjeƹ ayawya.

²⁰ War heddem ca ȓxeḏmeṯ n Arebbi ƹlaḥsab lmakla. Ḏ ṣṣaḥ marra min iǧan netta ḥalal, walakin ḏ ȓƹib meȓa ṯɣeḍȓeḏ can yijjen s ssabab n min tetteḏ.

²¹ Ḏ ijjen n ȓxir meȓa war tetteḏ ca aysum, niɣ war ṯsesseḏ ca aman uḍiȓ, niɣ ḏ can ȓḥajeṯ nneɣni iy ɣa iɣeḍȓen umac.

²² Min ma ṯumneḏ x ṯmesȓayin-a, ejj-iṯent jarac-d ḏ Arebbi. Ssaƹḏ n wenni war d itiwin lḥisab ḏ lƹiqab i yixef nnes x min itwaȓa ḥalal.

²³ Walakin meȓa ijjen itett itcekka ḏi lmakla nnes, axas itwaḥakem axas itwaƹaqeb liʼanna war itett ca s lʼiman nnes iy ḏayes. U marra min war itiȓin s lʼiman nni netta ḏ ijjen n ȓmuƹṣiyeṯ.