Ayṯ-Ruma 13 - Ṯarifiṯ 2020

Lwajib nneɣ ƹlaḥsab ȓmexzen

¹ Labud aḏ iṭaƹ kuȓ ijjen i ṣḥab n ȓmexzen liʼanna war iǧi bu ȓmexzen illa wenni d ikkin zi Arebbi. U yinni iḥekkmen ḏ Arebbi iy ṯen iggin.

² X manaya wi itƹarraḍen i ȓmexzen, itƹarraḍ i min igga Arebbi. U yinni ḏasen itƹarraḍen aḏ twaƹaqben.

³ Liʼanna lḥukkam war ssiggwiḏen ca wenni iteggen ȓxir, ssaggwaḏen wenni iteggen ccarr. Meȓa ṯexseḏ war teggwḏeḏ ca zi ȓmexzen, tegg ȓxir axak yarḍa.

⁴ Aqa netta ḏ axeddam n Arebbi ac infeƹ. Walakin meȓa teggeḏ ccarr ggweḏ zzayes, war iysi ca ssif bȓa ssabab. Netta ḏ axeddam n Arebbi itxeǧas itƹaqab wenni iteggen ccarr.

⁵ Falihaḏa labud aḏas ṯṭaƹeḏ i ȓmexzen maci ƹlaḥsab lƹiqab waha, walakin ƹaweḏ ƹlaḥsab ḍḍamir nnec iy ḏac itetten.

⁶ Ƹaweḏ ḏ wanita ḏ ssabab iy xef txeǧasem ḍḍariba liʼanna yinni iḥekkmen niṯni ḏ ixeddamen n Arebbi, xeddmen ḏi manaya.

⁷ Mkuȓ ijjen ucem-as ȓḥaqq nnes: ḍḍariba i bab n ḍḍariba, ȓaƹcur i bab n ȓaƹcur, lʼiḥtiram i bab n lʼiḥtiram, ȓewqar i bab n ȓewqar.

Lwajib nneɣ ƹlaḥsab ȓuṣiyaṯ

⁸ Itxeṣṣa war itiȓi ca umarwas jarawem; Lla, itxeṣṣa aḏ yiȓi illa umarwas n ȓemḥibbeṯ. Aqa wenni itexsen unneɣni itwaḥsab ikemmeȓ min yurin ḏi ccariƹa.

⁹ Liʼanna ȓuṣiyaṯ nni iy iqqaren war zenna, war neqq, war tacar, war ƹecceq, ḏ ȓuṣiyaṯ nneɣni, marra munent ḏeg yijjen n ȓuṣiyeṯ iqqaren:

¹⁰ Ȓemḥibbeṯ-a war tḍarri ca ajjar nnes. Falihaḏa, ȓemḥibbeṯ tkemmaȓ ccariƹa amen-ṯekmaȓ.

¹¹ Mayemmi manaya? Kenniw ṯessnem man ȓweqṯ iy ḏi neǧa neccin. Ṯuweḍ-d ṯsaƹƹat ḥima aḏ tfaqem zeg yiḍeṣ. Liʼanna ṯsaƹƹat-a iy ḏi ɣa nenjem ȓexxu aqa ṯqarreb-d ktar zi ṯenni iy ḏi numen ḏ amezwaru.

¹² Ǧiȓeṯ aqa ṯeƹḏu, nhar aqa yuweḍ-d. X manaya labud a nekkes ȓeḥwayej n ṯaǧest, a negg arruḍ n nnur n ȓeḥḏiḏ.

¹³ Itxeṣṣa labud a nuyur s lʼiḥtiram am wenni igguren ḏi ṯfawṯ n nhar. War ntegg ca lmadella n ssekra ḏ waṭṭas n ccreb ḏ lfasad ḏ ȓeqbaḥeṯ ḏ umenɣi ḏ ȓeḥseḏ.

¹⁴ Walakin, ggeṯ ȓeḥwayej n Siḏiṯneɣ Ƹisa Lmasiḥ. War rehham ca ak ṭṭabiƹa ṯaƹeffant nwem, war tseƹƹafeṯ ca ccehawaṯ nnes.