Ayṯ-Kulus 4 - Ṯarifiṯ 2020

¹ Ay ayṯbab n isemɣan, ḏebbarem xasen x isemɣan nwem s min iǧan nican ḏ ȓḥaqq nsen aqa kenniw ṯessnem illa ɣarwem Bab nwem ḏeg ujenna.

Ȓuṣiyaṯ ṯineggura

² Teggem lmejhud s ṯẓaǧiṯ nwem, iȓim ƹlabal ḏi ṯẓaǧit nwem cekkarem Arebbi.

³ Ḏi nnefs n ȓweqṯ ttarem-as i Arebbi xaneɣ bac aḏ irzem ṯawwarṯ i wawaȓ nneɣ a nbeccar s ȓmaƹna inuffaren n Lmasiḥ iy xef iy ǧiɣ nec ḏi ȓeḥbes.

⁴ Ttarem-as i Arebbi bac azzayes sfehmeɣ mliḥ i yiwḏan ƹlaḥsab min labud aḏ iniɣ.

⁵ Ƹiceṯ s ȓefhameṯ ak yinni iǧan ɣar barra nwem war yuminen ca, staɣellam ȓweqṯ nwem mliḥ.

⁶ U labud awaȓ nwem aḏ yiȓi ȓebda iccur s arḍa imeǧḥen s ȓemȓeḥ bac aḏ tessnem mamc ɣa ṯarrem x kur ijjen.

Lxitam n ṯebrat-a

⁷ Umaṯneɣ Tuciq akenniw ixebbar x marra min teggeɣ ḏanita. Netta iƹizz xafi, itsexxar i Arebbi s yijjen n ttiqeṯ. Netta ḏ axeddam itemƹacaren akiḏi ḏi ȓxeḏmeṯ n Siḏiṯneɣ.

⁸ Ssekkeɣ-ṯ-iḏ ɣarwem x ccɣeȓ-a wanita bac aḏ tessnem mamc neǧa neccin aḏ icejjeƹ uȓawen nwem.

⁹ Akiḏes umaṯneɣ Wanisamu netta iy xaneɣ iƹizzen ḏayes ttiqeṯ, netta zi ṯmurṯ nwem. Yina akenniw xebbaren marra min iweqƹen ḏeg umcan-a.

¹⁰ Isawwaḍ-awem-d sȓam Aristarxus wenni iy kiḏi iǧan ḏi ȓeḥbes-a. Isawwaḍ-awem-d sȓam uȓa ḏ Marqus mmis n ƹzizes n Barnabas. Tuɣa weṣṣiɣ-kenniw x Marqus-a, meȓa yusa-d ɣarwem reḥḥbeṯ zzayes.

¹¹ Isawwaḍ-awem-d sȓam ƹaweḏ Ƹisa wenni umi qqaren Yustus. Ḏ yina waha ig iǧan ḏ israʼiliyen zeg yinni itemƹacaren akiḏi ḏi ȓxeḏmeṯ-a ƹlaḥsab ȓmulk n Arebbi, tcejjaƹen-ayi aṭṭas.

¹² Isawwaḍ-awem-d sȓam Pafras netta ig iǧan zi ṯmurṯ nwem, netta ḏ ijjen n uxeddam n Ƹisa Lmasiḥ. Ȓebda itaḥeȓ ḏi ṯẓaǧiṯ ƹlaḥsab kenniw bac aḏ tbeddem x dsas aḏ tiȓim ṯemɣarem ḏi lʼiman nwem war ɣarwem itȓi bu ccekk ḏi marra min ixes Arebbi.

¹³ Nec cehhḏeɣ xas irebbeȓ xawem mliḥ ḏ yinni ƹaweḏ iǧan ḏi ṯendint n Lawdukya ḏ yinni iǧan ḏi ṯendint n Yirapulis.

¹⁴ Isawwaḍ-awem-d sȓam amƹizz nneɣ Luqa ig iǧan ḏ aḍbib, akiḏes Dimas.

¹⁵ Siwḍem-asen sȓam inu i ayṯmaṯneɣ iy iǧan ḏi ṯendint n Lawdukya ḏ wučmaṯneɣ Numibya ḏ jmaƹeṯ n ȓmuminin iy iǧan ḏi ṯeddarṯ nnes.

¹⁶ Xmi ɣa ṯɣarem ṯabrat-a kenniw jarawem, ƹaweḏ xzarem jmaƹeṯ n ȓmuminin at ɣaren ḏi Lawdukya. Xzarem ƹaweḏ kenniw ṯabrat nsen zi Lawdukya at tɣarem.

¹⁷ Inim-as i Arkippus u labud aḏ tkemmȓeḏ lwajib n ȓxeḏmeṯ iy ṯqebȓeḏ zi Siḏiṯneɣ.

¹⁸ Qa nec ḏ Bulus s ṯira n ufus inu iy zi ḏawem d sawwaḍeɣ sȓam ȓexxu. Feqḏem-ayi-d s snaseȓ inu n ȓeḥbes-a. Akiḏwem yiȓi arḍa.