Ayṯ-Galaṭya 1 - Ṯarifiṯ 2020

Lmuqaddima

¹ Nec ḏ Bulus, nec ḏ ijjen n arrasul maci s yiwḏan niɣ s ȓxaḍar n bnaḏem; Lla, nec ḏ arrasul s Ƹisa Lmasiḥ u ƹaweḏ s Arebbi Babaṯneɣ iy d isekkaren Ƹisa zi ȓmewṯ.

² Tariɣ ṯabrat-a nec ḏ marra ayṯma iǧan akiḏi ɣar ṯjumaƹ n ȓmuminin iǧan ḏi jwayeh n Galaṭya.

³ Akiḏwem yiȓi arḍa ḏ ȓehna zi Arebbi Babaṯneɣ ḏ Ƹisa Lmasiḥ Siḏiṯneɣ.

⁴ Lmasiḥ iṣeddeq ixef nnes x ȓmuƹṣiyeṯ nneɣ s ȓxaḍar n Arebbi Babaṯneɣ ḥima aḏaneɣ isenjem zi zman-a aƹeffan iy ḏi neǧa.

⁵ Aɣares ṯiȓi lƹaḍama i netta i ȓebda n ȓebdaṯ. Amin.

⁶ Nec setƹejjibeɣ ḏaywem, ḏeɣya ṯsemḥem ḏi Arebbi iy ḏawem d iȓaɣan s arḍa n Lmasiḥ ṯḏeffarem can n Lʼinjil nneɣni mzuwwar!

⁷ Walakin war ḏinni bu can n Lʼinjil nneɣni. Ɣir ḏinni can yiwḏan iy kenniw isxerwaḍen rezzun aḏ sƹewwjen Lʼinjil n Lmasiḥ.

⁸ Walakin neccin meȓa nbeccar-ikenniw niɣ ibeccar-ikenniw can n lmalak zeg ujenna s can n Lʼinjil nneɣni maci s wenni iy zi kenniw nbeccar zi qbeȓ, ataf wenni iy kenniw ɣa ibeccaren aḏ itwanƹeȓ!

⁹ Mammec ḏawem nenna zi qbeȓ aḏawem ṯ ƹawḏeɣ nec ȓexxu: Meȓa can yijjen ibeccar-ikenniw s can n Lʼinjil nneɣni maci ḏ wenni iy tuɣa ṯqebȓem, ataf aḏ itwanƹeȓ!

¹⁰ Cuf, nec ma rezzuɣ ȓexxu axafi arḍan yiwḏan? Lla, rezzuɣ axafi yarḍa Arebbi! Ma nec rezzuɣ aḏasen ƹejbeɣ i yiwḏan? Lla, maƹlik ƹaḏ rezzuɣ aḏasen ƹejbeɣ i yiwḏan, ataf nec war ǧiɣ ca ḏ axeddam n Lmasiḥ.

Siḏna Bulus netta ḏ arrasul n Arebbi

¹¹ Fa ay ayṯma, itxeṣṣa-kenniw aḏ tessnem belli Lʼinjil nni iy zi kenniw beccareɣ qa netta war d yusi ca zi bnaḏem.

¹² War ḏayi d yusi zi ḥadd, war ḏayi ṯ sȓemḏen ca yiwḏan; Lla, netta ihwa-d xafi ḏ lwaḥi zi Ƹisa Lmasiḥ.

¹³ Aqa ṯesȓim xafi mammec tuɣa tƹiceɣ zi qbeȓ wami tuɣa tbaƹeɣ ddin n Ayṯ-Israʼil, iƹni mammec tuɣa tƹeddabeɣ jmaƹeṯ n ȓmuminin n Arebbi s umenɣi, rezzuɣ axasen qḍiɣ.

¹⁴ Tuɣa nec tgaƹƹaḏeɣ mliḥ ḏi ddin n Ayṯ-Israʼil ƹȓayen qaƹ ḥsen zeg iqrinen inu. Tuɣa nec rezzuɣ aṭṭas aḏ ggeɣ lwajib ƹlaḥsab lƹadaṯ n ȓejḏuḏ inu.

^15-16 Walakin Arebbi zi qbeȓ tuɣa iƹzeȓ-ayi nec iƹni ixḍar-ayi ḏeg uƹeddis n yemma ssenni iȓaɣa-ayi-d s arḍa nnes. Wami xafi yarḍa netta, iseḍhar-ayi-d Mmis ḥima azzayes beccareɣ jar ȓegnus. Ȓexddenni war mcawareɣ ak ḥadd.

¹⁷ War gaƹƹḏeɣ ca ɣar ṯendint n Lquds bac aḏ ẓreɣ yinni tuɣa iǧan ḏ arrusul qbeȓ i nec. Lla, nec ruḥeɣ nican ɣar ṯmurṯ n waƹraben u ssenni ḏewȓeɣ-d ƹaweḏ ɣar ṯendint n Dimacq.

¹⁸ Ṯeƹḏu ijjen ṯeȓt snin gaƹƹḏeɣ ɣar ṯendint n Lquds ḥima aḏ ẓreɣ arrasul Buṭrus, qqimeɣ akiḏes ijjen xemmesṭacar yum.

¹⁹ Nec ḏinni war ẓriɣ uȓa ḏ ijjen n arrasul nneɣni ɣir Yaƹqub umas n Siḏiṯneɣ.

²⁰ Min ḏawem d tariɣ, tariɣ-ṯ-iḏ u Arebbi ixezzar ḏayi war iǧi bu ḏ ixarriqen.

²¹ Menbaƹd ruḥeɣ ɣar Surya ḏ lʼiqlim n Kilikya.

²² Tuɣa nec ƹaḏ war ḏayi ssinen ca ḏeg uɣembub inu ṯijumaƹ n ȓmuminin n Lmasiḥ ḏi ṯmurṯ n Yahuḏiya.

²³ Niṯni ɣir tesȓan xafi qa Bulus nni iy tuɣa ḏaneɣ itƹeddaben zi qbeȓ ȓexxu netta itbeccar s Lʼinjil nni iy xef irezzu aḏ iqḍa.

²⁴ Ssenni uca ḥemmḏen Arebbi xafi.