Ayṯ-Filippas 1 - Ṯarifiṯ 2020

Lmuqaddima

¹ Nec ḏ Bulus akiḏi Timutawus neccin ḏ ixeddamen n Ƹisa Lmasiḥ. Ntari ṯabrat-a i ṣṣaliḥin n Ƹisa Lmasiḥ iy iǧan ḏi ṯendint n Filippi ḏ arruyas nsen ḏ nnuyab nsen.

² Akiḏwem yiȓi arḍa ḏ ȓehna zi Arebbi Babaṯneɣ ḏ Ƹisa Lmasiḥ Siḏiṯneɣ.

Ccuker ḏ dduƹaʼ

³ Tcekkareɣ Arebbi kuȓ ṯwaȓat xmi ḏaywem tfekkareɣ.

⁴ Kur ṯwaȓat tẓaǧiɣ xawem ḏi ṯẓaǧiṯ inu s yijjen n ȓefraḥeṯ ḏ ṯameqqrant

⁵ ȓaḥeqqac ṯcarrcem akiḏi ḏi Lʼinjil zi nhar amezwaru aȓ ȓexxu.

⁶ Nec aqayi mteyyqen ḏi ṯmesȓayṯ-a: Wenni ig ibḏan ḏaywem ca n ccɣeȓ ḏ aṣebḥan axas itsiɣi axas itkemmaȓ ḥetta aȓ Nhar nni n Ƹisa Lmasiḥ.

⁷ Ɣari ȓḥaqq aḏaywem fekkareɣ amenni ȓaḥeqqac aqa kenniw ɣari ḏeg wuȓ inu. Aqa marra ṯcarrcem akiḏi ḏi arḍa n ȓxeḏmeṯ-a waxxa aqayi ḏi ȓeḥbes niɣ tḏafaƹeɣ x Lʼinjil ḏ ȓḥaqq iy ḏayes.

⁸ Ataf Arebbi ḏ ccaheḏ inu mecḥaȓ iy kenniw tweḥḥaceɣ s lḥanana n Ƹisa Lmasiḥ.

⁹ Ḏ ṯanita ḏ ṯẓaǧiṯ inu ataf aḏ tarni ȓemḥibbeṯ nwem ktar u ktar bac aḏ tessnem marra aḏ tmeyyzem marra.

¹⁰ Ḥima aḏ tixḍarem min iǧan ḏ aṣebḥan ḥima aḏ tiȓim ṯeṣfam bȓa ȓƹib ɣar nhar n Lmasiḥ.

¹¹ Zzayes zi Ƹisa Lmasiḥ aḏ tiȓim ṯƹemmarem s min d itarwen ȓḥaqq. Marra manaya i lƹaḍama n Arebbi ḏ lḥamd nnes.

Lʼinjil yarenni waxxa ḥebbsen arrasul Bulus

¹² Ay ayṯma rezzuɣ aḏ tessnem min ḏayi iweqƹen, manayenni ḏ ṣṣaḥ ixeddem i Lʼinjil bac aḏ itentacar.

¹³ Nec lḥala inu ṯeḏweȓ maƹrufa jar marra ȓƹaskar n ȓeqṣar ḏ marra iwḏan iƹni nec aqayi ḏi ȓeḥbes ƹlaḥsab Lmasiḥ.

¹⁴ X ssabab n snaseȓ-a inu azyen ameqqran n ayṯma twacejjƹen bac aḏ ssiwȓen s wawaȓ n Arebbi s yijjen n zƹameṯ ḥsen zi qbeȓ bȓa ṯiggwḏi.

¹⁵ Ḏ ṣṣaḥ ḏinni ȓebƹaḍ tbeccaren s Lmasiḥ s ȓeḥseḏ ḏ lƹadawa, u ḏinni ȓebƹaḍ tbeccaren nican s ȓxaḍar nsen.

¹⁶ Yina tbeccaren s ȓemḥibbeṯ nsen wami ssnen twaxḍareɣ bac aḏ dafƹeɣ x Lʼinjil.

¹⁷ Yinni nneɣni lla, tbeccaren s Lmasiḥ s lʼananiya maci s wuȓ nsen iṣfa, rezzun aḏayi ggen lmacakil wami ǧiɣ ḏi ȓeḥbes.

¹⁸ Walakin maƹlic, s ṯnayen n ibriḏen-a Lmasiḥ itwabeccar. Ḏ manayenni iy iǧan muhim waxxa s wuȓ iy iǧan ḏ aɣeddar niɣ s wuȓ iy iǧan iṣfan. U s manayenni iy zi farḥeɣ nec. Wah, aḏ qqimeɣ nec farrḥeɣ.

¹⁹ Liʼanna ssneɣ xmi tettarem xafi i Arebbi ḏ Arruḥ n Siḏiṯneɣ Ƹisa Lmasiḥ itƹawan-ayi ataf min ḏayi itewqiƹen aḏ iḏweȓ ḏ asefȓeṯ inu.

²⁰ Trajiɣ s wur inu nec tmenniɣ war tseḏḥiɣ ca qaƹ x lwajib inu. Lla, nec tzeƹƹameɣ ȓexxu aḏ zeƹmeɣ menbaƹd bac s ddat inu azzayes imɣar Lmasiḥ waxxa aḏ mmṯeɣ niɣ aḏ ddareɣ.

²¹ Minzi ɣari Lmasiḥ netta ḏ ṯuḏarṯ inu, ɣari ȓmewṯ nettaṯ ḏ ljaʼiza inu.

²² Meȓa qqimeɣ ddareɣ s ddat-a inu, ataf aḏ arniɣ mliḥ ḏi ȓxeḏmeṯ inu. Walakin nec war ssineɣ ca min ɣa ixḍareɣ.

²³ Ȓexxu aqayi jar ṯnayen n ṯmesȓayin-a iy ɣa ixḍareɣ. Ḏayi mizȓi aḏ uyureɣ zi ṯuḏarṯ-a aḏ iȓiɣ ak Lmasiḥ ȓaḥeqqac manaya qaƹ ḥsen zi marra.

²⁴ Walakin labud ḥsen i kenniw meȓa qqimeɣ ddareɣ s ddat-a inu.

²⁵ Aqayi teyyqeɣ s lwajib-a inu ssneɣ aḏ qqimeɣ aḏ siɣiɣ ḏanita akiḏwem bac aḏ tarnim ḏi lʼiman azzayes ṯfarḥem.

²⁶ Aɣarwem d ƹeqbeɣ ƹaweḏ. X ssabab-a ataf ȓefraḥeṯ nwem ḏi Ƹisa Lmasiḥ aḏ d tenfeyyeḍ ƹlaḥsab nec.

²⁷ Lmuhim, suyureṯ ixef nwem ḏeg yijjen n ubriḏ iticcen lqima i Lʼinjil n Lmasiḥ. Ṯumma waxxa nec usiɣ-d akenniw ẓreɣ niɣ ɣabeɣ xawem ataf axawem sȓeɣ ȓexbar belli ṯuggurem nican x yijjen n array, ṯxeddmem fus ḏeg ufus x ssabab n lʼiman iy iǧan ḏi Lʼinjil,

²⁸ ƹaweḏ war teggwḏem ca qaƹ zeg yinni iy ḏawem itƹarraḍen. Manaya iy teggem aɣarsen ṯiȓi ḏ ijjen n lƹalama iy d isbeyyanen mliḥ niṯni aḏ fnan kenniw aḏ tnejmem. Marra manaya aḏ d yas zi Arebbi.

²⁹ Maci ƹlaḥsab Lmasiḥ azzayes ṯamnem waha; Lla, labud ƹaweḏ aḏ twaƹeddbem ƹlaḥsab ssabab nnes.

³⁰ Minzi kenniw tmenɣam ḏeg umenɣi nni iy ḏi tuɣa tmenɣiɣ nec u ƹaḏ tesȓim belli tmenɣiɣ ḏayes.