2 Timutawus 4 - Ṯarifiṯ 2020

Arrasul Bulus itweṣṣa Timutawus ḏi ȓxeḏmeṯ

¹ Acek weṣṣiɣ zzaṯ i Arebbi ḏ Ƹisa Lmasiḥ wenni iy ɣa iḥekmen x yinni iddaren ḏ yinni immuṯen, acek weṣṣiɣ ƹaweḏ ḏi ȓmulk nnes ḏ Nhar nni iy ḏi d ɣa imeḍhar:

² Beccar awaȓ n Arebbi, sewjeḏ ixef nnec aḏ tbeccareḏ ḏi ȓweqṯ nni iy trajiḏ niɣ ḏi ȓweqṯ nni iy war trijiḏ ca. Ȓmuminin nha-ṯen, ƹȓem-asen, cejjeƹ-iṯen s marra ttasiƹ n ȓxaḍar ḏ useȓmeḏ.

³ Aqa aḏ d tas ȓweqṯ nni niṯni war tṣenniṭen ca ɣar ttaƹlim nican; aɣarsen d smunen ijjen n lƹadad n imseȓmaḏen ssawaȓen ɣir min ḏasen iƹejben i imejjan nsen waha.

⁴ Yina aḏ sbeƹƹḏen imejjan nsen zi lḥaqiqa aṯen awin aḏ sȓen i ṯḥuja waha.

⁵ Cek arr-d ȓbaȓ nnec ḏi marra ṯimesȓayin, ṣbar i tamara, egg ȓxeḏmeṯ am wenni itbeccaren, egg lwajib n ȓxeḏmeṯ nnec.

⁶ Cuf, nec tferraɣen-ayi-d am yijjen n ṣṣeḏqeṯ n iḏammen x dbiḥeṯ itwaqeddamen, aqa ṯuweḍ-d ȓweqṯ n ufuɣ inu zi ddunect-a.

⁷ Amenɣi-ya aṣebḥan menɣeɣ-ṯ, ṯazzȓa-ya kemmȓeɣ-t, lʼiman ḥḍiɣ-ṯ.

⁸ Ssa aȓ ṯsawent itraja-ayi ijjen n ttaj n ṣṣulḥ ag Arebbi wenni iy ḏayi ɣa yuc Siḏiṯneɣ iy iǧan ḏ lqaḍi nican; Aḏayi-ṯ yuc ḏi Nhar nni n Lḥisab. Maci aḏayi-ṯ yuc i nec waha; Lla, aṯ yuc i marra yinni itexsen Nhar nni iy ḏi d ɣa imeḍhar.

Awaȓen ineggura n arrasul Bulus i Timutawus

⁹ Egg lmejhud nnec bac aɣari d taseḏ ḏeɣya.

¹⁰ Minzi Dimas ismeḥ ḏayi ṯuwi-ṯ ȓemḥibbeṯ n ddunect-a iruḥ ɣar ṯendint n Salunik. Iruḥ Kriskus ɣar lʼiqlim n Galaṭya, iruḥ Titus ɣar jjiheṯ n Dalmasya.

¹¹ Iqqim akiḏi ɣir Luqa waha. Awi-d akiḏec Marqus minzi ineffeƹ-ayi ḏi ȓxeḏmeṯ inu.

¹² Ssekkeɣ Tuciq ɣar ṯendint n Ufasus.

¹³ Xmi d ɣa ṯaseḏ, awi-d akiḏec azeǧab inu wenni iy jjiɣ ak Karpus ḏi ṯendint n Traws uȓa ḏ lkutub inu xaṣṣatan yinni iǧan n iȓemawen.

¹⁴ Iskander wenni itṣennaƹen nneḥḥas iḍarr-ayi aṭṭas, aṯ ixeǧes Arebbi x ȓefƹayeȓ nnes.

¹⁵ Uȓa ḏ cek ḥḍa ixef nnec zzayes minzi netta itƹarraḍ aṭṭas i min netbeccar.

¹⁶ Wami ḏafƹeɣ x yixef inu ṯwaȓa ṯamezwarut ḏi lmaḥkama marra semḥen ḏayi uȓa ḏ ijjen ma ibedd akiḏi. War xasen t itḥisib ca Siḏi Arebbi.

¹⁷ Ḏ Siḏiṯneɣ iy kiḏi ibedden ɣar uɣezḏis inu yuca-ayi jjheḏ ḥima zzayi nec aḏ itwabeccar Lʼinjil ikmaȓ aṯ sȓen marra yinni war iǧin ca zi Ayṯ-Israʼil, ssenni nec feȓṯeɣ zeg uqemmum n ssbaƹ.

¹⁸ Aḏayi isefȓeṯ Siḏiṯneɣ zi mkuȓ ṯamesȓayṯ ḏ ṯaƹeffant aḏayi isenjem ɣar ȓmulk nnes iǧan ḏeg ujenna. Aɣares ṯiȓi lƹaḍama i ȓebda n ȓebdaṯ. Amin.

Lxitam n ṯebrat-a

¹⁹ Siweḍ-as sȓam i Priskila ḏ Wakilas ḏ ṯedḏarṯ n Wanisfur.

²⁰ Iqqim Arisṭus ḏi ṯendint n Kurinṯ, Trifumu jjiɣ-ṯ nec ḏi ṯendint n Militus ihȓec.

²¹ Egg lmejhud nnec bac aḏ d taseḏ qbeȓ i ȓmecta-ya. Isawwaḍ-ac-d sȓam Yubulus uȓa ḏ Buden ḏ Linus ḏ učmaṯneɣ Kludya ḏ marra ayṯmaṯneɣ.

²² Aḏ yiȓi Siḏiṯneɣ ak arruḥ nnec. Aḏ yiȓi arḍa akiḏwem marra.