2 Buṭrus 1 - Ṯarifiṯ 2020

Lmuqaddima

¹ Nec ḏ Simƹan Buṭrus ḏ ijjen n ȓƹabḏ n Ƹisa Lmasiḥ ḏ arrasul nnes. Tsekkiɣ-d ṯabrat-a i yinni iqebȓen nnefs n lʼiman am wenni iy neqbeȓ neccin s ṣṣulḥ nni n Arebbi ḏ Ƹisa Lmasiḥ wenni iy ḏaneɣ isenjamen.

² Aḏaywem imarni arḍa ḏ ȓehna s waṭṭas minzi ṯessnem Arebbi ḏ Siḏiṯneɣ Ƹisa.

Mammec iǧa lʼiman n wenni iḏeffaren Arebbi?

³ Aqa ṯizemmar nnes yuƹȓan ṯuca-aneɣ-d qaƹ min neḥḏaj ƹlaḥsab ṯuḏarṯ ḏ ṭṭaƹa nneɣ i Arebbi. Manaya minzi nessen wenni ḏaneɣ d iȓaɣan ɣar lƹaḍama nnes ḏ ṯuṣubḥant nnes.

⁴ Ƹlaḥsab ṯimesȓayin-a netta yuca-aneɣ-d lwuƹud nnes imɣaren ig isewwan aṭṭas. Ḥima s lwuƹud-a aḏ tcarcem ḏi ṭṭabiƹa n wenni yuƹȓan wami ṯarewȓem zi min ifennan ḏi ddunect-a ƹlaḥsab ccehawaṯ ṯiƹeffanin.

⁵ Fa x ssabab-a wanitan, ggeṯ lmejhud nwem marra bac aḏ tarnim min iǧan ḏ aṣebḥan ɣar lʼiman nwem; ssenni arnim ṯusna ak manaya iǧan ḏ aṣebḥan;

⁶ u ƹaweḏ arnim ȓeḥkam x yixef nwem ak ṯusna-ya nwem; u ƹaweḏ arnim ṭṭaƹa i Arebbi ak ȓeḥkam-a x yixef nwem;

⁷ u ƹaweḏ arnim ȓxir jar wawmaṯen ak ṭṭaƹa-ya nwem i Arebbi; u ƹaweḏ arnim ȓemḥibbeṯ ak ȓxir-a nwem jar wawmaṯen.

⁸ Cuf, kenniw meȓa ḏaywem ṯimesȓayin-a aḏaysent ṯarennim, ataf aḏaywem yiȓi nnfaƹ aḏ tarwem ƹaweḏ ḏi ṯusna n Siḏiṯneɣ Ƹisa Lmasiḥ.

⁹ Qa wenni umi war ḏi ǧint ca ṯimesȓayin-a, ataf netta war itwiȓi ca mliḥ ɣar ȓeggwaj qa itwaḥsab ḏ aḏarɣaȓ ataf ƹaweḏ itettu belli Arebbi iɣfar-as ȓmuƹṣiyaṯ nnes tuɣa igga zi qbeȓ.

¹⁰ Iḏen ay ayṯma, ggeṯ lmejhud nwem ktar ƹaḏ bac aḏ tḍemnem aȓaɣi nnes ɣarwem belli netta ixḍar-ikenniw. Meȓa ṯeggim ṯimesȓayin-a, ataf ƹemmarṣ aḏ d tewḍam.

¹¹ Ataf aḏawem twassewjeḏ ƹaweḏ ijjen n ṯewwarṯ ḏ ṯaṣebḥant ɣar ȓmulk nnes war ifennin ca n Siḏiṯneɣ Ƹisa Lmasiḥ wenni iy ḏaneɣ isenjamen.

Arrasul Buṭrus icehheḏ x min iẓra s ṯiṭṭawin nnes

¹² Iḏen fa, akenniw sfekkareɣ ȓebda x ṯmesȓayin-a waxxa ṯessnem-ṯent kenniw mliḥ qa ṯbeddem x dsas n lḥaqiqa-ya iy ɣarwem ȓexxu.

¹³ Nec meȓa ƹaḏ qqimeɣ ddareɣ ḏi ddat inu, tḥessabeɣ-ṯ ḏ lwajib akenniw sfekkareɣ x manaya.

¹⁴ Qa ssneɣ belli ḏeɣya nec aḏ semḥeɣ ḏi ddat inu minzi ammu iy tuɣa ḏayi isefhem mliḥ zi qbeȓ Siḏiṯneɣ Ƹisa Lmasiḥ.

¹⁵ U nec labud aḏ ggeɣ marra lmejhud inu bac aḏ tzemmarem aḏ tƹeqȓem menbaƹd x ṯmesȓayin-a xmi ɣa ffɣeɣ nec zi ddunect-a.

¹⁶ Wa cuf, neccin tuɣa war nḏeffar ca ṯiḥuja nni iy twaggent s ȓefṭaneṯ n bnaḏem wami iy kenniw nsefham x jjheḏ nnes ḏ Nhar nni iy ḏi d ɣa yas Siḏiṯneɣ Ƹisa Lmasiḥ; Lla, neccin neẓra s ṯiṭṭawin nneɣ mecḥaȓ ṯemɣar ṯuƹȓat nnes.

¹⁷ Ȓaḥeqqac Arebbi Babaṯneɣ isemɣar-iṯ yuca-as lƹaḍama wami ɣares d tenṭeq ṯmijja nni zi lƹaḍama yuƹȓan ṯenna-aneɣ: Qa ḏ wanita ḏ Mmi iƹizzen, nec farḥeɣ zzayes.

¹⁸ Ṯmijja-ya iy ɣarneɣ d ineṭqen zeg ujenna nesȓa-yas neccin s yixef nneɣ wami tuɣa akiḏes ḏinni neǧa ḏeg uḏrar amqeddes.

¹⁹ Neccin ȓexxu ɣarneɣ awaȓen n lʼanbiya twaḍemmnen ktar zi min nefhem qbeȓ. Aḏ teggem mliḥ meȓa teggem ḏaysen array nwem am i yijjen n nnur itceƹciƹen ḏeg yijjen n ṯaǧest aȓ d ɣa iṣbeḥ Nhar nni aḏ d igaƹƹeḏ Yiṯri n ȓefjar ḏeg wuȓawen nwem.

²⁰ Min iǧan muhim qaƹ itxeṣṣa u labud aḏ tfehmem belli uȓa ḏ ijjen n wawaȓ zi lʼanbiya iy iǧan ḏi Lkitab, lʼaṣel nnes war d ikki ca zi min itfessaȓ bnaḏem.

²¹ Liʼanna awaȓen n lʼanbiya tuɣa ƹemmarṣ war teffiɣen ca zi lʼafkar nsen; Lla, niṯni ssawaȓen zi min ḏasen d itasen zi Arebbi mamc iy xasen d ihewwa Arruḥ iqeddsen.