2 Ayṯ-Kurinṯ 7 - Ṯarifiṯ 2020

¹ Iḏen ay imƹizzen inu, wami ḏaneɣ iƹaheḏ Arebbi x ṯmesȓayin-a labud a nessiṣfa ixef nneɣ zi marra min ḏaneɣ isexnizen ḏi ddat ḏ arruḥ ḥima a niȓi ḏ ṣṣaliḥin bȓa axeṭṭi s ṯiggwḏi n Arebbi.

Arrasul Bulus ṯesfarreḥ-iṯ jmaƹeṯ n ȓmuminin n Ayṯ-Kurinṯ

² Arzmem-aneɣ kenniw imucan ḏeg wuȓawen nwem. Uȓa ḏ ijjen war ṯ neḍȓim ca, war ṯ nesƹewwej ca, war ṯ nɣecc ca.

³ War qqareɣ ca manaya bac akenniw ƹeyybeɣ lla. Ȓaḥeqqac nniɣ-awem qbeȓ qa kenniw ḏeg wuȓawen nneɣ, a nemmeṯ niɣ a neddar akiḏwem.

⁴ Nec teggeɣ akiḏwem zƹameṯ aṭṭas, lʼiftixar iy ɣari ḏaywem imɣar. Twacejjƹeɣ aṭṭas, ȓefraḥeṯ inu temfeyyaḍ-d x marra ȓemḥayen nneɣ.

⁵ Cuf, neccin wami d nuḏef ɣar lʼiqlim n Masidunya ddat nneɣ war ṯriyyeḥ ca, netwazeyyar zi mkuȓ jjiheṯ amenɣi ɣar barra ḏ ṯiggwḏi ɣar ḏaxeȓ.

⁶ Walakin Arebbi, iƹni wenni itƹawanen yinni itxeyyaqen iƹawen-aneɣ s umaṯneɣ Titus wami d yusa.

⁷ U maci ɣir wami d yusa Titus, iƹawen-aneɣ Arebbi ƹaweḏ wami tuɣa ḏayes thillam. Ixbar-aneɣ Titus qa ṯweḥḥcem-ayi, qa ṯnedmem ṯrezzum xafi aṭṭas. Amenni ȓefraḥeṯ inu ṯarni ktar.

⁸ Iwa wami kenniw sxeyyqeɣ s ṯebrat nni inu nneɣni, ḏ amezwaru tuɣa nedmeɣ ȓexxu war ndimeɣ ca. Iƹni nedmeɣ wami ẓriɣ ṯabrat nni inu ṯesxeyyeq-ikenniw ḏeg yijjen n ȓweqṯ walakin ṯeƹḏu ḏeɣya.

⁹ Ȓexxu nec farrḥeɣ. Maci wami ṯxeyyqem; Lla, wami ṯxeyyqem bac aḏ ttubem. Ṯxeyyqem iƹni ijjen n uxiyyeq zi Arebbi, amenni war kenniw ṯeȓqif uȓa ḏ ijjen n ṯxessarṯ zzayneɣ.

¹⁰ Cuf, axiyyeq zi Arebbi itarew-d ttuba, ttuba-ya ṯneddeh-ikenniw aḏ tnejmem war tejji bu ndameṯ. Axiyyeq zi ddunect-a lla, itarew-d ȓmewṯ.

¹¹ Fekkareṯ kenniw ḏi min ḏaywem d itarew uxiyyeq-a zi Arebbi. Iƹni mecḥaȓ tḥawaȓem s wuȓ ṯrezzum aḏ tḥellem manaya ḏeɣya. Iƹni mecḥaȓ ṯnedmem mecḥaȓ ṯenxeȓƹem, ḏaywem ijjen n mezȓi ḏ ṯiggwḏi. Iƹni mecḥaȓ ṯeswejḏem aḏ tḥekmem nican. Min ma iǧan ḏi ṯmesȓayṯ-a kenniw war ḏaywem bu ȓƹib.

¹² Nec uriɣ-awem-d ṯabrat nni, mayemmi? Ma ƹlaḥsab wenni iḍeȓmen niɣ ḏ wenni itwaḍeȓmen? Lla, uriɣ-awem-t-id bac akenniw sfehmeɣ zzaṯ i Arebbi mecḥaȓ iy ḏaneɣ teggem array s wuȓ.

¹³ S marra manaya netwaƹawen. Maci netwaƹawen neccin u ṣafi; Lla, ƹaweḏ nfareḥ aṭṭas wami neẓra mecḥaȓ ifareḥ Titus arruḥ nnes ṯesreyyḥem-ṯ kenniw marra.

¹⁴ Wami zzaywem ftaxareɣ ɣar Titus war iǧi mayemmi ɣa seḏḥiɣ ȓexxu. Ȓaḥeqqac mammec nessiweȓ akiḏwem nican ḏi marra, uȓa ḏ lʼiftixar nneɣ xawem ɣar Titus qa iffeɣ-d nican.

¹⁵ Netta aqa ṯeqqimem-as ḏeg wuȓ u ktar ƹaḏ xmi itfekkar ḏi array iy ḏas ṯeggim, iƹni ṯqebȓem-ṯ s yijjen n ṯiggwḏi terjijim.

¹⁶ Farrḥeɣ wami zemmareɣ axawem tƹewwaȓeɣ ḏi min ḏi ma.