2 Ayṯ-Kurinṯ 5 - Ṯarifiṯ 2020

Amcan nneɣ ḏeg ujenna

¹ Cuf, neccin nessen meȓa irez uqiḍun-a iƹni ddat nneɣ n ddunect-a, ataf ɣarneɣ ijjen n ṯzeddiɣṯ nneɣni zi Arebbi. Ṯaddarṯ nni war ibnin ca s ifassen tduma i ȓebda.

² Ȓexxu neccin nnehhek ḏayneɣ mezȓi a neɣmes s ddat nneɣ n ujenna.

³ Xmi ɣa neɣmes zzayes, ataf war ḏaneɣ tifen ca ḏ iƹaryanen.

⁴ Liʼanna xmi netɣemmas s ddat-a nneɣ, tbessaȓ xaneɣ neccin ƹaḏ nnehhek. Iwa war nrezzu ca a niȓi bȓa arruḍ, nrezzu a neɣmes s ddat nneɣ n ujenna, mayemmi? Bac min ifennan aṯ iseɣȓey min war itmettin.

⁵ Wi ḏaneɣ iswejḏen i manayenni? Netta ḏ Arebbi, yuca-aneɣ-d Arruḥ nnes ḏ ijjen n ttesbiq.

⁶ Iḏen ƹemmarṣ a nefceȓ neccin. Nessen meȓa ƹaḏ aqaneɣ ḏi ddat-a n ddunect-a ntaggwaj zi Siḏiṯneɣ.

⁷ Aqa netƹic s lʼiman maci s min netwaȓa.

⁸ War ntefciȓ ca, lla! Maƹlic neccin meȓa ntaggwaj zi ddat-a n ddunect-a ataf neccin netƹic ak Siḏiṯneɣ.

⁹ X manayenni mixef nrezzu? Nrezzu axas narḍa waxxa nzeddeɣ ḏi ddat-a n ddunect-a niɣ ntaggwaj zzayes.

¹⁰ Liʼanna labud a nbedd marra iḏneɣ zzaṯ i lƹarc n Lmasiḥ mani iy ɣa netwaḥkem. Kuȓ ijjen aṯ ijaza x min isḏaheǧ ƹlaḥsab ṯimesȓayin nni ig igga wami izḏeɣ ḏi ddat, ḏ ṯiṣebḥanin niɣ ḏ ṯiƹeffanin.

¹¹ Falihaḏa wami nessen a neggweḏ zi Siḏiṯneɣ, nrezzu iwḏan aḏ qtanƹen. Y min neƹna neccin issen-iṯ Arebbi mliḥ, u tmenniɣ ƹaweḏ ḍḍamir nwem aḏ issen manayenni.

Ȓƹaheḏ n ṣṣulḥ

¹² Ma nebḏa a ncekkar ixef nneɣ ƹaweḏ zaƹma? Lla, nticc-awem minzi xaneɣ ɣa teftaxarem. Mayemmi? Iƹni ḥima aɣarwem yiȓi minzi ɣa ṯarrem x yinni iteftaxaren x min d itbanen ɣar barra maci min iǧan ɣar ḏaxeȓ ḏeg wuȓ.

¹³ Cuf, meȓa iruḥ-aneɣ ȓaƹqeȓ zaƹma, manaya jaraneɣ ḏ Arebbi. Meȓa ɣarneɣ ȓaƹqeȓ, ataf manaya mliḥ i kenniw.

¹⁴ Liʼanna ȓemḥibbeṯ n Lmasiḥ tsayṭar xaneɣ wami nessen ijjen immuṯ ƹlaḥsab marra iwḏan. Falihaḏa ȓmewṯ nnes ḏ ȓmewṯ n marra iwḏan.

¹⁵ Immuṯ netta ƹlaḥsab marra iwḏan bac yinni iddaren war teddaren ca i yixef nsen waha, aḏ ddaren i wenni xasen immuṯen ṯumma itwasekkar-d zi ȓmewṯ.

¹⁶ X manayenni, zi ssa aȓ ṯsawent neccin war nxezzar ca ḏi ḥadd ƹlaḥsab ȓaƹqeȓ n ddunect-a. Waxxa nxezzar qbeȓ ḏi Lmasiḥ ƹlaḥsab ȓaƹqeȓ n ddunect-a, ȓexxu war ṯ netwiȓi ca amenni.

¹⁷ S manaya, wenni iǧan ḏi Lmasiḥ aqa itwaxȓeq-d ḏ jḏiḏ; min iǧan ḏ aqḏim iƹḏu yusa-d min iǧan ḏ jḏiḏ.

¹⁸ Manaya marra zi Arebbi, isemṣȓaḥ-aneɣ akiḏes s Lmasiḥ yuca-aneɣ-d a nbeccar s ȓƹaheḏ n ṣṣulḥ.

¹⁹ Iƹni Arebbi igga ḏi Lmasiḥ bac aḏ isemṣȓaḥ iwḏan akiḏes, war xasen iḥesseb ca ȓmuƹṣiyaṯ nsen. Ƹaweḏ Arebbi ikellef xaneɣ awaȓ-a wanita n ṣṣulḥ.

²⁰ Falihaḏa neccin ḏ lmubcirin n Lmasiḥ, Arebbi issekk ṭṭalab nnes x ufus nneɣ. Nṭalab-ikenniw ƹlaḥsab Lmasiḥ aḏ temṣȓaḥem ak Arebbi.

²¹ Tuɣa wanita war ɣares bu ȓmuƹṣiyeṯ yarri-ṯ Arebbi ḏ ȓƹiḏ nneɣ ḥima aḏaneɣ yarr nican ak Arebbi.