2 Ayṯ-Kurinṯ 11 - Ṯarifiṯ 2020

Arrasul Bulus aqaṯ ḍeḏ i yinni itarran ixef nsen ḏ arrusul

^1-2 Iwa rezzuɣ aḏ teṣbarem cwayt ak ṯubbuhȓiya-ya inu zaƹma. Wah, ṣebbareṯ akiḏi liʼanna ɣari ijjen n lɣira xawem, iƹni ijjen n lɣira zi Arebbi. Aqa xeṭbeɣ-kenniw zaƹma i yijjen n uryaz iƹni ḏ Lmasiḥ akenniw awiɣ ɣares am yijjen n ṯeƹzriyṯ war ḏayes bu ȓƹib.

³ Walakin nec ggwḏeɣ mammec ḏas iwqeƹ i Ḥawwa icmeṯ-it ufiɣar s ṯeḥraymiṯ nnes uȓa ḏ kenniw ȓaƹquȓaṯ nwem aḏ ffɣen abriḏ, war ḏas tṭiƹim ca i Lmasiḥ s wuȓawen nwem bȓa nnifaq u bȓa ȓƹib.

⁴ Liʼanna kenniw ṯeqqarem maƹlic waxxa yusa-d ɣarwem ijjen itbeccaren s yijjen n Ƹisa nneɣni mzuwwar maci ḏ wenni iy xef netbeccar neccin zi qbeȓ. Niɣ ḏeɣya ṯqebbȓem ijjen n arruḥ nneɣni mzuwwar maci ḏ wenni iy tuɣa ṯqebȓem zi qbeȓ. Niɣ ḏeɣya ṯqebbȓem ijjen n Lʼinjil nneɣni mzuwwar maci ḏ wenni iy tuɣa ṯqebȓem zi qbeȓ.

⁵ Cuf, war ḥessbeɣ ca ixef inu ḏ aneqṣi zi arrusul imezwura. Lla walu.

⁶ U nec waxxa war ssineɣ ca lxuṭba inu mliḥ, war ḏayi ṯenqiṣ ca ṯusna. Neccin ṯusna-ya nesbeyyen-awem-t-id nican s marra ṯimesȓayin.

⁷ Ma ḏ ȓƹib meȓa beccareɣ-kenniw s Lʼinjil n Arebbi bȓa ma ḏayi ṯxeǧsem, iƹni semzayeɣ ixef inu bac akenniw sgaƹƹḏeɣ?

⁸ Nec jemƹeɣ-d tmenyaṯ zi ṯjumaƹ nneɣni n ȓmuminin qebȓeɣ zzaysen manayenni bac akiḏwem xeḏmeɣ.

⁹ Wami ḥḍareɣ akiḏwem tuɣa nec teḥḏajiɣ, war tbessaȓeɣ x ḥadd zzaywem; Lla, ucin-ayi min teḥḏajiɣ ayṯmaṯneɣ yinni iy d yusin zi Masidunya. Amenni ugiɣ axawem bessȓeɣ, aḏ qqimeɣ mestammer amenni.

¹⁰ S ȓḥaqq n Lmasiḥ iy ḏayi, uȓa ḏ ijjen ḏeg imucan n Uxaya ma aḏ ikkes lʼiftixar-a inu.

¹¹ Mayemmi? Ma war kenniw texseɣ ca? Qa Arebbi issen belli ṯƹizzem xafi.

¹² Fa min teggeɣ aḏ qqimeɣ ammu teggeɣ-ṯ. Mayemmi? Xseɣ aḏ qesseɣ iḍaren i yinni irezzun lfurṣa aḏ iȓin mquddan akiḏneɣ ḏi ṯmesȓayin-a iy xef teftaxaren.

¹³ Cuf, iryazen am yina tarran ixef nsen ḏ arrusul xeddmen ḏ iɣeddaren, sneƹmiȓen ḏ arrusul n Lmasiḥ.

¹⁴ Iwa war nesteɣȓib ca liʼanna Cciṭan netta s yixef nnes isneƹmiȓ ḏ ijjen n lmalaʼika n nnur.

¹⁵ Falihaḏa, war nesteɣȓib ca meȓa ixeddamen n Cciṭan sneƹmiȓen ḏ ixeddamen n ȓḥaqq. Ȓefna nsen aḏ yiȓi ƹlaḥsab min staḥqent ȓefƹayeȓ nsen.

Arrasul Bulus ḏ ȓemḥayen nnes

¹⁶ Aḏ iniɣ ƹaweḏ, war ḏayi ḥessbeṯ ca ḏ abuhaȓi. Waxxa ṯḥesbem-ayi ḏ abuhaȓi, qebbȓem-ayi bac aḏ ftaxareɣ cwayt.

¹⁷ Manaya iy zi teftaxareɣ qqareɣ-ṯ nec am yijjen n ṯubbuhȓiya, war ṯ iqqar ca Siḏiṯneɣ.

¹⁸ Xmi teftaxaren yiwḏan-a aṭṭas ƹlaḥsab min itegg bnaḏem, uȓa ḏ nec aḏ ftaxareɣ.

¹⁹ Ma kenniw zaƹma ṯfehmem mliḥ? Iwa, mayemmi s ȓefraḥeṯ ṯṣebbarem ibuhaȓiyen?

²⁰ Aqa ṯṣebbarem uȓa ḏ yinni iy kenniw itarran ḏ isemɣan, ḏ yinni iy kenniw itetten, ḏ yinni iy xawem itbuṣaren, ḏ yinni iy ḏi iǧa ttakebbur, ḏ yinni iy kenniw iccaṯen s iseqqiȓen.

²¹ Nec tseḏḥiɣ zaƹma, neccin neḍƹef war nzemmar a nexḏem amenni! Qqareɣ nec zaƹma s ṯubbuhȓiya-ya qa meȓmi ma izƹem ḥadd azzayes iftaxar uȓa ḏ nec azzayes ftaxareɣ.

²² Meȓa niṯni ḏ iƹibraniyen, uȓa ḏ nec ḏ aƹibrani. Meȓa niṯni zi Ayṯ-Israʼil, uȓa ḏ nec ḏ aʼisraʼili. Meȓa niṯni usin-d zi ṯarwa n Brahim, uȓa ḏ nec usiɣ-d zi ṯarwa n Brahim.

²³ Meȓa niṯni ḏ ixeddamen n Lmasiḥ, uȓa ḏ nec ḥsen ƹaḏ ḏ axeddam n Lmasiḥ (ssawaȓeɣ zaƹma s ṯubbuhȓiya-ya). Nec ccaṯeɣ tamara ktar zzaysen, ḥebbsen-ayi ktar zzaysen, uwṯin-ayi s usɣun ktar zzaysen. Nec mecḥaȓ n ṯwaȓaṯin twajaheɣ ȓmewṯ.

²⁴ Xemsa n ṯwaȓaṯin ccaṯen-ayi israʼiliyen s arbeƹin n ṯyiṯa qell icten s usɣun.

²⁵ Ṯȓaṯa n ṯwaȓaṯin tmarraṯen-ayi s uƹmuḏ. Ijjen n ṯwaȓa rejmen-ayi s uzru. Ṯȓaṯa n ṯwaȓaṯin iɣreq zzayi uɣarrabu seƹḏuɣ ijjen n wass ḏ yijjen n ǧiȓeṯ ḏi ȓebḥar.

²⁶ Nec mecḥaȓ n ṯwaȓaṯin tiȓiɣ tsafareɣ ḏi lxaṭar n iɣezran, ḏ lxaṭar n iceffaren, ḏ lxaṭar n ȓqum inu, ḏ lxaṭar n iyunaniyen, ḏ lxaṭar ḏi ṯendint, ḏ lxaṭar ḏi ȓexȓa, ḏ lxaṭar ḏi ȓebḥar, ḏ lxaṭar n yinni itarran ixef nsen ḏ ayṯma.

²⁷ Xeddmeɣ, ccaṯeɣ tamara, tnuseɣ aṭṭas n ǧiyaȓi bȓa iḍeṣ. Fuḏeɣ ǧuzeɣ, qqimeɣ aṭṭas n ṯwaȓaṯin bȓa lmakla. Ṯneqq-ayi ṯesmeḍ arruḍ inu ḏ uqlil.

²⁸ Iwa qaƹ ṯimesȓayin-a u ƹaḏ ḏayi amnus kuȓ nhar ƹlaḥsab marra ṯijumaƹ n ȓmuminin.

²⁹ Meȓa can yijjen iḍƹef, nec ma war teḍƹifeɣ ca? Meȓa can yijjen itwasufeɣ zeg ubriḏ, nec ma war ḏayi iteqqes ca wuȓ inu?

³⁰ Meȓa nec u labud aḏ ftaxareɣ, aḏ ftaxareɣ s min ḏayi d isbeyyanen ḍeƹfeɣ.

³¹ Wenni itwabarken i ȓebda iƹni Arebbi Babas n Siḏiṯneɣ Ƹisa, issen illa nec qqareɣ lḥaqiqa.

³² Ḏi ṯendint n Dimaceq qa lwali n uzeǧiḏ Ḥariṯ igga ȓƹasseṯ ḏi ṯendint ḥima aḏayi iṭṭef.

³³ Walakin sehwan-ayi-d imeḥḍaren inu ḏeg yijjen n uqbub s iseɣwan zeg yijjen n ṯburjat n ṣṣur n ṯendint ȓexddenni nejmeɣ zeg ifassen nnes.