2 Ayṯ-Kurinṯ 10 - Ṯarifiṯ 2020

Arrasul Bulus itḏafaƹ x ȓxeḏmeṯ nnes

¹ Fa nec ḏ Bulus, s yixef inu tṭalabeɣ-kenniw s ttawaḍuƹ ḏ lḥanana n Lmasiḥ. Wah, ṯeqqarem nec zaƹma terjijiɣ xmi tiȓiɣ akiḏwem, xmi tɣabeɣ xawem tqesiḥeɣ.

² Tettareɣ-kenniw bac war ḏayi tijjim ca aḏ iȓiɣ qesḥeɣ ak ȓebƹaḏ zzaywem am trajiɣ nec aḏ ggeɣ, ȓebƹaḍ-a tfekkaren qa netƹic s array n bnaḏem waha.

³ Ḏ ṣṣaḥ netƹic am bnaḏem, walakin war netḥarib ca am bnaḏem.

⁴ Ȓesnaḥ nneɣ maci am wenni ig isxeddam bnaḏem, ɣarneɣ ijjen n ȓesnaḥ nneɣ zi Siḏi Arebbi zzayes iy netrezza imucan ijehḏen.

⁵ Netrezza awaȓen ḏ kuȓ array iy ḏi iǧa ttakebbur ig itƹarraḍen i min nessen x Arebbi. Nḥebbes kuȓ lfikra ḥima ataf aḏ tṭaƹ i Lmasiḥ.

⁶ Xmi ɣa ṯessiwḍem kenniw nican ṭṭaƹa nwem, ataf neccin a niȓi nsewjaḏ bac a nƹaqeb wenni war itṭiƹin ca.

⁷ Kenniw ṯxezzarem ɣar min d itbanen x wuḏem waha. Meȓa can yijjen metʼakked netta zi Lmasiḥ u labud aḏ ifekkar uȓa ḏ neccin zi Lmasiḥ am netta.

⁸ Waxxa teftaxareɣ cwayt s ṣṣaraḥa-ya x ssulṭa nni iy ḏaneɣ yuca Siḏiṯneɣ, walakin war tseḏḥiɣ ca zi manaya. Ssulṭa-ya yuca-aneɣ-t ḥima akenniw nsejheḏ maci ḥima akenniw nrez.

⁹ War xseɣ ca aḏawem tɣiȓ belli nec akenniw siggwḏeɣ s ṯebraṯin inu.

¹⁰ Liʼanna qqaren xafi ȓebƹaḍ zzaywem qa ṯibraṯin n Bulus jehḏent qesḥent. U qqaren ƹaweḏ walakin xmi akiḏneɣ itiȓi netta s yixef nnes iteḍƹif awaȓen nnes xwan.

¹¹ Lla! Wenni issawaȓen amenni itxeṣṣa-yas aḏ issen min neƹna neccin ḏi ṯebraṯin-a nneɣ axmi netɣab, amenni iy ɣa nexḏem xmi d nḥeṭṭar.

¹² Cuf, war nzemmar a nqaran ixef nneɣ niɣ a nmeṯṯel ixef nneɣ ak yinni itcekkaren i yixef nsen. Yina xmi tmeyyazen ixef nsen ak wayawya niɣ tmeṯṯalen ixef nsen ak wayawya iƹni ḏaysen ȓeqfaȓeṯ.

¹³ Walakin neccin a neftaxar s min iǧan nican maci ktar, a neftaxar s min ḏaneɣ ikellef Arebbi iƹni xawem kenniw.

¹⁴ Iwa kenniw, ma ikellef-aneɣ Arebbi xawem niɣ lla? Wah, neccin nuweḍ-d ɣarwem, nusa-d ɣarwem ḏ imezwura s Lʼinjil n Lmasiḥ.

¹⁵ War nteftaxar ca s ȓxeḏmeṯ iy ggin midden iƹni bac a nawi ccan nnes; Lla, neccin netmenna aḏ tarnim ḏi lʼiman nwem bac ƹaweḏ lḥudud nneɣ akiḏwem itmarni.

¹⁶ Ammu neccin a nbeccar s Lʼinjil ḏeg imucan aɣirin nwem, aqa war nexs ca a neftaxar s ȓxeḏmeṯ iy ggin midden.

¹⁷ Mamc iqqar Lkitab:

¹⁸ Liʼanna maci wenni itqeddamen ixef nnes iy ɣa itwaqebbȓen; Lla, wenni iy ɣa itwaqebbȓen ḏ Siḏi Arebbi iy ṯ ɣa iqeddmen.