1 Yuḥanna 1 - Ṯarifiṯ 2020

Lmuqaddima

¹ Min tuɣa ḏinni zeg umezwaru, netsȓa-yas neẓẓer-iṯ s ṯiṭṭawin nneɣ, nxezzar ḏayes netḥaḏa-ṯ s ifassen nneɣ iƹni ḏ Awaȓ n ṯuḏarṯ.

² Ṯusa-d ṯuḏarṯ ṯmeḍhar-d, neccin nẓer-it necheḏ xas. Netbeccar-ikenniw s ṯuḏarṯ-a war ifennin ca ƹemmarṣ. Tuɣa ṯeǧa ḏinni ak Babas ssenni ṯmeḍhar-aneɣ-d.

³ Min neẓra ḏ min netsȓa netbeccar-ikenniw zzayes ḥima uȓa ḏ kenniw aḏ temƹacarem akiḏneɣ. Marra neccin ṯamƹacarṯ nneɣ aqat ak Babaṯneɣ ḏ Mmis Ƹisa Lmasiḥ.

⁴ Ntari-yawem-d ṯimesȓayin-a ḥima ȓefraḥeṯ nneɣ aḏ tejjawen.

Nnur n Arebbi itceƹciƹen ḏi ṯaǧest

⁵ Ḏ wa ḏ awaȓ iy zzayes netsȓa netbeccar-ikenniw zzayes iƹni Arebbi ḏ nnur war ḏayes bu ṯaǧest.

⁶ Meȓa neqqar qa neccin ntemƹacar akiḏes walakin neggur ḏeg ubriḏ n ṯaǧest ataf nesxarriq waha war nesxeddim ca lḥaqiqa.

⁷ Walakin meȓa neggur ḏi nnur mammec iǧa netta ḏi nnur, ataf ntemƹacar ak wayawya ataf iḏammen n Mmis Ƹisa ssiṣfan-aneɣ zi marra ȓmuƹṣiyaṯ.

⁸ Meȓa neqqar war ḏayneɣ bu ȓmuƹṣiyaṯ ataf nesxarriq x yixef nneɣ waha, ataf lḥaqiqa war ḏayneɣ ṯzeddeɣ ca.

⁹ Walakin meȓa neƹtaref s ȓmuƹṣiyaṯ nneɣ i Arebbi, netta aqaṯ nican ḏayes ttiqeṯ, aḏaneɣ iɣfar ȓmuƹṣiyaṯ nneɣ aḏaneɣ issiṣfa zi marra ccarr.

¹⁰ Meȓa neqqar qa neccin war neƹṣi ca Arebbi, ataf netta ntarra-ṯ ḏ bu-ixarriqen, ataf awaȓ nnes war ḏayneɣ izeddeɣ ca.