1 Timutawus 2 - Ṯarifiṯ 2020

Ȓuṣiyaṯ x lƹibada

¹ Ḏ amezwaru tweṣṣiɣ-kenniw aḏ tettarem i Arebbi aṯ tedƹim aṯ ṭelbem aṯ tcekkarem x marra iwḏan

² ḏ izeǧiḏen ḏ marra yinni iḥekkmen bac a nƹiceṯ ḏeg yijjen n ȓehna bȓa ssdaƹ ḏeg yijjen n ṭṭaƹa n Arebbi ḏ yijjen n lmaƹqul.

³ Manaya ḏ aṣebḥan yarḍa xas Arebbi iy ḏaneɣ d isnejmen,

⁴ ixes marra iwḏan aḏ twasnejmen aḏ awḍen aḏ ssnen lḥaqiqa.

⁵ Liʼanna ḏinni ijjen n Arebbi waḥḏes ḏ yijjen lwasiṭ waḥḏes jar Arebbi ḏ yiwḏan iƹni aryaz-a ḏ Ƹisa Lmasiḥ.

⁶ Netta iṣeddeq ṯuḏarṯ nnes ḏ ijjen n lfidya bac azzayes isenjem marra iwḏan, manaya aḏ itwacheḏ ḏi ȓweqṯ nnes.

⁷ X manayenni iy twaxḍareɣ nec bac aḏ ḥeddṯeɣ aḏ iȓiɣ ḏ arrasul aḏ iȓiɣ ḏ amseȓmaḏ ƹlaḥsab lʼiman ḏ ȓḥaqq jar yinni war iǧin ca zi Ayṯ-Israʼil. Qqareɣ lmaƹqul maci ḏ ixarriqen.

⁸ Falihaḏa xseɣ iryazen ḏi marra imucan aḏ ẓẓaǧen aḏ ysin ifassen nsen iṣfan ɣar ujenna bȓa ma aḏ tƹeṣṣben bȓa ma aḏ tmenɣan.

⁹ Amenni ƹaweḏ xseɣ ṯimɣarin aḏaysent yiȓi lʼiḥtiram aḏaysent yiȓi ȓeḥya ḏ lmaƹqul, maci aḏ qqiment s ucewwaf iḍȓeq aṭṭas niɣ s ddheb ḏ jjuwhar ḏ warruḍ iy iɣȓan.

¹⁰ Lla, aḏ ṣarent ixef nsent s lḥasanaṯ ig iǧan labud ḏi ṯemɣarin nni iqqaren qa neccin nƹebbeḏ Arebbi.

¹¹ Ṯamɣarṯ u labud aḏ teȓmeḏ s ṭṭaƹa ḏ ȓhudneṯ.

¹² Nec war tejjiɣ ca ṯamɣarṯ aḏ tseȓmeḏ aryaz niɣ axas ṯeḥkem; Lla, labud aḏ tiȓi mhedna.

¹³ Mayemmi? Arebbi ixȓeq-d Adam ḏ amezwaru, ƹaḏ iy d ixȓeq Ḥawwa.

¹⁴ Ƹaweḏ Adam war ṯ icmiṯ ca Cciṭan, ḏ ṯamɣarṯ itwacemṯen ṯeƹṣa Arebbi.

¹⁵ Ṯamɣarṯ aḏ twasenjem ƹlaḥsab ṯarwa walakin itxeṣṣa wa labud aḏ qqiment niṯenti ḏi lʼiman ḏ ȓemḥibbeṯ ḏ ȓeṣfiyeṯ ƹlaḥsab lmaƹqul.