1 Buṭrus 2 - Ṯarifiṯ 2020

Ijjen n uzru iddaren ḏ yijjen n ccaƹb amqeddes

¹ Iḏen fa kkseṯ zeg wuȓawen nwem marra ccarr ḏ marra lɣeḏran ḏ nnifaq ḏ ȓeḥseḏ ḏ marra ȓbaṭeȓ.

² Iȓiṯ am iḥḍiḍen, sɣuyiweṯ x uɣi nni iṣfan n Arruḥ iqeddsen bac azzayes ṯemɣarem ḏi lʼiman nwem ig isenjamen.

³ Aqa ṯeqqasem Siḏiṯneɣ netta mecḥaȓ ḏ aṣebḥan.

⁴ Xmi ɣares d ṯqarrabem ɣar netta iy iǧan ḏ azru nni iddaren ƹiffen-ṯ iryazen walakin Arebbi ixḍar-iṯ iƹizz xas,

⁵ uȓa ḏ kenniw ƹaweḏ am ca n yizra iddaren zzaywem iy ṯbenna ijjen n ṯeddarṯ n Arruḥ iqeddsen. Ḥima aḏ tiȓim kenniw ḏ ijjen n jmaƹeṯ n ȓfuqaha ṣṣaliḥin, tqeddamem dbiḥaṯ rruḥiyaṯ yarḍa xasent Arebbi s ufus n Ƹisa Lmasiḥ.

⁶ Qa manaya ig iqqar Lkitab:

⁷ Fa azru-ya isewwa aṭṭas i kenniw iy yumnen, yinni war yuminen ca lla. Aqa yura ḏi Lkitab:

⁸ U ƹaweḏ iqqar: Qa tenqȓaḍen ḏayes minzi ƹeṣṣan awaȓ nnes, amenni iy xasen yura.

⁹ Fa kenniw ḏ ijjen n ccaƹb itwaxḍaren ḏ ijjen n jmaƹeṯ n ȓfuqaha n Uzeǧiḏ ḏ ijjen n ȓgens ḏ amqeddes ḏ yiwḏan niṯni Bab nsen ḏ Arebbi bac aḏ tbeccarem s ṯmesȓayin ṯiṣebḥanin n wenni iy kenniw issufɣen zeg yijjen n ṯaǧest yarri-kenniw-d ɣar nnur nnes ƹajib.

¹⁰ Tuɣa kenniw ḏeg yijjen n ȓweqṯ maci ḏ ȓgens, ȓexxu kenniw ṯḏewȓem ḏ ccaƹb n Arebbi. Tuɣa ḏeg yijjen n ȓweqṯ war ṯessinem ca arraḥmeṯ n Arebbi, ȓexxu ṯessnem arraḥmeṯ nnes.

¹¹ Ay imƹizzen inu, nec qqareɣ-awem i kenniw iy iǧan ḏ iƹezzaben ḏ ibarraniyen ḏi dduncet-a, beƹƹḏeṯ zi ccehawaṯ nni ṯiƹeffanin iy kenniw itḥaraben ḍed n ȓaƹmar nwem.

¹² Ƹiceṯ s lmaƹqul jar ȓegnus. Meȓa tahamen-kenniw x can ȓḥajeṯ ḏ ṯaƹeffant uca niṯni ẓerren lḥasanaṯ nwem ataf aḏ ḥemḏen Arebbi ḏi Nhar nni iy xasen d ɣa ixḍeȓ.

Ṭaƹeṯ i yinni xawem iteḥkamen

¹³ X ssabab n Siḏiṯneɣ ṭaƹeṯ i kuȓ lḥakem umi immuc ȓḥaqq nican aḏ iḥkem. Waxxa netta ḏ azeǧiḏ iteḥkamen x marra,

¹⁴ niɣ ḏ lḥukkam iy d issekk uzeǧiḏ aḏ ƹaqben yinni iteggen ccarr aḏ tcekkaren yinni iteggen min iǧan ḏ aṣebḥan.

¹⁵ Liʼanna manaya ḏ ȓxaḍar n Arebbi iƹni meȓa ṯeggim min iǧan ḏ aṣebḥan ataf aḏ teqḍam x wawaȓen ijahȓen n iryazen nni iy ḏi ṯeǧa ṯubbuhȓiya u ṣafi.

¹⁶ Ƹiceṯ am yiwḏan iy ɣar ṯeǧa lḥurriya walakin war steƹmaleṯ ca lḥurriya-ya nwem bac aḏ tesnuffarem ccarr nwem; Lla, itxeṣṣa aḏ tƹicem am ixeddamen n Arebbi.

¹⁷ Weqqareṯ marra iwḏan. Sƹizzeṯ ayṯmaṯwem. Ggwḏeṯ zi Arebbi. Weqqareṯ azeǧiḏ.

Qebbȓeṯ aƹeddeb ƹlaḥsab Lmasiḥ

¹⁸ Ay ixeddamen, ṭaƹeṯ i ayṯbab nwem s lʼiḥtiram marra. Maci ɣir i yinni iǧan ḏ iṣebḥanen ḏaysen ttawaḍuƹ, lla, ḥetta ḏ yinni iqesḥen.

¹⁹ Cuf, meȓa ijjen iṭaƹ i Arebbi iṣbar i uƹeddeb netta war isḏiheǧ ca tamara nni, ma ḏayes can n ccuker? Wah, ḏayes ccuker.

²⁰ Walakin meȓa ṯeƹṣam ṯeccim xas aƹmuḏ ṯeṣbarem x manayenni, ma ḏayes can n ccuker? Lla, walu. Meȓa ṯeggim ȓxir ṯetwaƹeddbem xas ṯeṣbarem xas, ataf manaya wah ḏayes ijjen n ccuker ḏ ameqqran zzaṯ i Arebbi.

²¹ Iȓaɣa-yawem-d Arebbi ɣar manaya minzi Lmasiḥ itwaƹeddeb ƹlaḥsab kenniw; Ijja-awem-d ijjen n lmiṯal aṯ tḏeffarem ḏeg isurifen nnes.

²² Netta war iggi uȓa ḏ ijjen n ȓmuƹṣiyeṯ, war ḏas d ikki uȓa ḏ ij uxarriq zeg uqemmum nnes.

²³ Wami tuɣa xas tbuṣaren, netta war xasen d yarri ca abuṣar nsen. Wami tuɣa ṯ tƹeddaben, netta war ṯen iheddeḏ ca; Lla, netta isellem ixef nnes ḏeg ifassen n wenni iteḥkamen nican.

²⁴ Netta s yixef nnes iysi ȓmuƹṣiyaṯ nneɣ ḏi ddat nnes x ṯeḥnact nni ḥima a nemmeṯ neccin s wuȓawen nneɣ i ȓmuƹṣiyaṯ, a neddar i min iǧan nican. Aqa s ujarriḥ nnes iy zi ṯgenfam kenniw.

²⁵ Tuɣa kenniw am iḥuȓiyen itweddaren, ȓexxu ṯḏewȓem-d ɣar wenni iy kenniw irassen itkellafen zi ȓaƹmar nwem.