1 Ayṯ-Kurinṯ 8 - Ṯarifiṯ 2020

Aysum itqeddamen i lʼaṣnam

¹ Fa lmakla itqeddamen i lʼaṣnam. Neccin marra iḏneɣ ɣarneɣ ṯusna, iƹni nessen ṯimesȓayin. Ṯusna-ya iy nessen tsuffa iwḏan s ttakebbur, walakin ȓemḥibbeṯ tarni ḏayneɣ jjheḏ.

² Ijjen meȓa itɣir-as issen, lla war issin ca. Ƹaḏ itxeṣṣa-yas aḏ issen.

³ Walakin wenni itḥibban Arebbi, ataf Arebbi issen-iṯ netta.

⁴ Amma lmakla itqeddamen i lʼaṣnam, nessen lʼaṣnam ǧan ḏi ddunect-a walakin ḏ ixarriqen waha. Nessen neccin ijjen n Arebbi ig iǧan, waḥḏes.

⁵ Waxxa zaƹma qqaren belli ḏinni arebbiṯen ḏeg ujenna ḏ ṯmurṯ, iƹni ɣarsen arebbiṯen nsen mujudin ḏ ssiyaḏiṯsen mujudin.

⁶ Walakin neccin ɣarneɣ ijjen n Arebbi waḥḏes, netta ḏ Babaṯneɣ. Zzayes netta ǧant marra ṯimesȓayin, neccin neǧa i netta. Ƹaweḏ ɣarneɣ ijjen n Siḏiṯneɣ, iƹni Ƹisa Lmasiḥ. Zi netta mizi xeȓqent marra ṯimesȓayin, zzayes mizi nexȓeq neccin.

⁷ Walakin maci iwḏan qaƹ ssnen manaya. Ȓebƹaḍ n yiwḏan tuɣa ɣarsen lʼaṣnam ḏ ddin nsen ijheḏ. Meȓa tetten lmakla-ya itqeddamen i lʼaṣnam ataf itɣir-asen manaya ḏ ṣṣaḥ, ḍḍamir nsen iḍeƹfen ataf aḏ ixnez.

⁸ Iwa maci ḏ lmakla iy ḏaneɣ ɣa isqarrben ɣar Arebbi; Lla, war ḏaneɣ ineffeƹ ca meȓa necca niɣ war necci ca.

⁹ Walakin ḥḍam ixef nwem ḏi lḥurriya-ya nwem ṯanita bac war ṯɣeṭṭȓem ca yinni iḍeƹfen ḏi lʼiman nsen aḏ wḍan.

¹⁰ Cuf, wenni umi ɣar iǧa lʼiman iḍƹef. Maƹlik iẓri-c cek ɣarek ṯusna zaƹma tetteḏ ḏeg yijjen n zzawyiṯ n lʼaṣnam, iȓi ṯcejjƹeḏ-ṯ cek ḥima uȓa ḏ netta aḏ icc lmakla itqeddamen i lʼaṣnam, niɣ lla?

¹¹ U s ṯusna-ya nnec zaƹma aḏ tdemmareḏ umaṯneɣ wanita iḍeƹfen iy xef immuṯ Lmasiḥ.

¹² Xmi ṯƹeṣṣim ayṯmaṯwem tḍarram ḍḍamir nsen iḍeƹfen, ataf ḏ Lmasiḥ iy ṯƹeṣṣam.

¹³ X manaya meȓa lmakla inu ṯɣeṭṭeȓ uma ḏi ȓmuƹṣiyeṯ, ataf ƹemmarṣ aḏ cceɣ aysum ƹaweḏ ḥima war ɣeṭṭȓeɣ ca uma.