1 Ayṯ-Kurinṯ 5 - Ṯarifiṯ 2020

Ccarr ḏi jmaƹeṯ n ȓmuminin

¹ Iffeɣ-d ijjen n ȓexbar belli ḏinni ijjen n nnuƹ n lfasad jarawem war xas ṣebbaren ca waxxa ḏ lkuffar! Ijjen n uryaz ɣares ṯamɣarṯ n babas.

² Y kenniw, ma ḏaywem ttakebbur?! Lla, kenniw itxeṣṣa aḏ txeyyqem. Itxeṣṣa aḏ tsufɣem wenni iggin manaya zi jmaƹeṯ nwem.

³ Nec, waxxa ɣabeɣ zzaywem s ddat inu, aqaṯ ḏinni akiḏwem arruḥ inu. Ṣafi, nec axmi aqayi ḏinni ḥekmeɣ x wenni iggin ṯamesȓayṯ-a.

⁴ Xmi ɣa ṯmunem s yisem n Siḏiṯneɣ Ƹisa akiḏwem yiȓi arruḥ inu, s jjheḏ n Siḏiṯneɣ Ƹisa

⁵ aḏ tsufɣem aryaz-a ɣar Cciṭan ḥima aḏ tefna ṭṭabiƹa ṯaƹeffant n nnefs nnes aḏ injem arruḥ nnes ḏi Yum n Siḏiṯneɣ.

⁶ Maci mliḥ wami teftaxarem. War ṯessinem ca illa ɣir ḏrus n untun iy d isgaƹƹaḏen marra ȓƹajneṯ n urecṯi?

⁷ Kkseṯ antun nni aqḏim ḥima aḏ tiȓim ḏ ijjen n ȓƹajneṯ ḏ jḏiḏ n urecṯi bȓa antun. Liʼanna ammu ḏ ṣṣaḥ iy ṯeǧam kenniw. Cuf, itwaɣareṣ ȓƹiḏ nneɣ iƹni Lmasiḥ.

⁸ X manaya a nƹeyyeḏ walakin war netƹeyyiḏ ca s untun nni aqḏim, iƹni antun nni netta ḏ ȓeqbaḥeṯ ḏ ccarr. Lla, neccin a nƹeyyeḏ s ṯefḍirṯ, iƹni ijjen n uɣrum ḏayes lḥaqiqa war ḏayes bu ixarriqen.

⁹ Tuɣa uriɣ-awem-d ḏi ṯebrat nni inu war tƹacareṯ ca yinni iteggen lfasad.

¹⁰ Walakin tuɣa war ssiwiȓeɣ ca x lkuffar n ddunect-a yinni iteggen lfasad niɣ ḏ iḍemmaƹen niɣ ḏ iɣeccacen niɣ ḏ yinni iƹebbḏen lʼaṣnam. Maƹlik amenni, aḏ yiȓi labud aḏ teffɣem zi ddunect-a qaƹ.

¹¹ Lla, walakin ȓexxu nec uriɣ-awem-d bac war tƹacarem ca ȓmumen wenni iqqaren qa nec ḏ umac walakin netta itegg lfasad niɣ ḏ aḍemmaƹ niɣ iƹebbeḏ lʼaṣnam niɣ iqqar ȓbaṭeȓ niɣ isess aṭṭas n ccreb niɣ ḏ aɣeccac. Ijjen am wanita, war tettem ca akiḏes qaƹ.

¹² Cuf, maci ḏ ccɣeȓ inu aḏ ḥekmeɣ x lkuffar ɣar barra n jmaƹeṯ n ȓmuminin; Lla, walakin ḏ ccɣeȓ nwem aḏ tḥekmem x yiwḏan ɣar ḏaxeȓ n jmaƹeṯ.

¹³ Lkuffar ɣar barra axasen iḥkem Arebbi. Ṣafi, mammec iqqar Lkitab: