1 Ayṯ-Kurinṯ 4 - Ṯarifiṯ 2020

Ȓxeḏmeṯ n arrusul

¹ Cuf, ammu itxeṣṣa aḏaneɣ ẓren yiwḏan iƹni neccin ḏ ixeddamen n Lmasiḥ, neccin netkellaf x ṯmesȓayin inuffaren n Arebbi.

² U labud yinni itkellafen itxeṣṣa aḏaysen ṯiȓi ttiqeṯ.

³ Nec war ḏayi ithimmi ca aṭṭas meȓa tḥakamem-ayi kenniw niɣ ḏ can lmaḥkama nneɣni. Uȓa ḏ nec war ǧiɣ bu ḏ ȓqaḍi x yixef inu.

⁴ Nec ḍḍamir inu mertaḥ iy iǧa, walakin nec ma bariʼ iy ǧiɣ ƹlaḥsab ḍḍamir inu? Lla, ḏ Siḏi Arebbi iy ḏayi ɣa yucen ȓḥukem-a.

⁵ X manaya war qqarem walu x ȓḥukem qbeȓ ȓweqṯ, iƹni qbeȓ iy d ɣa yas Siḏiṯneɣ. Ḏ netta iy ɣa isbeyynen ṯimesȓayin nni ɣar nnur ȓexxu nuffarent ḏi ṯaǧest, aḏ d ismeḍhar kuȓ lɣaraḍ n yiwḏan iy ɣarsen ḏeg wuȓawen nsen. Ȓexddenni kuȓ ijjen aɣares yiȓi usemɣar nnes zi Arebbi.

⁶ Ay ayṯma qqareɣ manaya x Apullus ḏ nec, meṯṯleɣ manaya ḥima azzayes ṯawim nnfaƹ. Kenniw aḏ tȓemḏem zzayneɣ min iƹna lmiṯal nni iqqaren "War tbeƹƹaḏeṯ ca zi min yurin ḏi Lkitab." Amenni war ḏinni ḥadd aḏ isecneƹ can uryaz x unneɣni.

⁷ Cek, wi c iscenƹen x unneɣni? Kuȓ ȓḥajeṯ iy ɣarek ṯemmuc-ac niɣ lla? Y cek, wami immuc-ac manayenni mayemmi teftaxareḏ axmi war ḏac immuc ca?

⁸ Kenniw, ma ṣaaaafi ɣarwem marra min teḥḏajim? Ma ṣaaaafi kenniw ṯḏewȓem ḏ twajar? Kenniw, ma ḏ ṣṣaḥ ṯḏewȓem ḏ izeǧiḏen bȓa neccin?! Iwa mecḥaȓ xseɣ bac aḏ yiȓi ḏ ṣṣaḥ kenniw teḥkamem ḥima aḏ tcarcem akiḏneɣ ȓeḥkam nni nwem.

⁹ Liʼanna tfekkareɣ belli neccin arrusul isfurruj-aneɣ Arebbi ḏ ineggura ḏi lmelƹab, iƹni neccin am yiwḏan ḥekmen xasen s ȓmewṯ aḏ mmṯen ḏinni. Igga-aneɣ a nesfurruj ddunect-a ṯekmaȓ, iƹni iwḏan ḏ lmalaʼikaṯ.

¹⁰ Neccin ḏ ibuhaȓiyen zaƹma ƹlaḥsab Lmasiḥ, y kenniw ma ḏ imiɣisen ḏi Lmasiḥ? Neccin neḍƹef, y kenniw ma ṯjehḏem? Karrmen-kenniw, neccin sbehdaȓen-aneɣ.

¹¹ Qa ƹaḏ ḏi ṯsaƹƹat-a neǧuz, nfuḏ, aqaneɣ s ixarṭiṭen, tmarraṯen-aneɣ, war ɣarneɣ mani ɣa ndurra.

¹² Neccaṯ tamara, nxeddem s ifassen nneɣ. Meȓa niṯni tzebbaȓen ḏayneɣ, neccin netbarrak-iṯen. Meȓa niṯni tƹeddaben-aneɣ, neccin nṣebbar.

¹³ Meȓa niṯni qqaren xaneɣ ȓbaṭeȓ, neccin ntarra-d xasen s yijjen n lʼiḥsan. Qa neccin ƹaḏ aȓ ȓexxu neḏweȓ am ṯzewbayṯ n ddunect-a ḏ zzbeȓ n marra yiwḏan.

¹⁴ Maci uriɣ ṯimesȓayin-a bac akenniw feḍḥeɣ; Lla, uriɣ-ṯent bac akenniw nhiɣ am ca n ṯarwa inu iƹizzen.

¹⁵ Waxxa akiḏwem ƹecraȓaf n lmurebbiyin ḏi Lmasiḥ, war ɣarwem ca aṭṭas n babaṯwem. Liʼanna ḏi Ƹisa Lmasiḥ nec ḏ babaṯwem ḏi Lʼinjil.

¹⁶ Iḏen, tcejjaƹeɣ-kenniw aḏayi ṯqelldem mamc teggeɣ nec.

¹⁷ X manayenni iy xef kenniw d ssekkiɣ Timutawus. Netta iƹizzen xafi am can memmi, ḏayes ttiqeṯ ḏi Siḏiṯneɣ. Akenniw isfekkar x ibriḏen inu ḏi Lmasiḥ mammec ṯen seȓmaḏeɣ ḏi marra imucan ḏ marra ṯijumaƹ n ȓmuminin.

¹⁸ Fa ȓebƹaḍ zzaywem ḏaysen ttakebbur, tɣir-asen nec war ɣarwem d tiseɣ ca.

¹⁹ Lla, qa ƹȓayen aɣarwem d aseɣ meȓa ixes Arebbi. Yinni iy ḏi iǧan ttakebbur aṯen ssneɣ nec. Maci aṯen ssneɣ min qqaren; Lla, aṯen ssneɣ ma ḏaysen can jjheḏ ma lla.

²⁰ Liʼanna ȓmulk n Arebbi war iǧi bu ḏeg wawaȓ; Lla, aqaṯ ḏi jjheḏ.

²¹ Mamc ṯrezzum aḏ d aseɣ? Ma s uƹmuḏ ma s ȓemḥibbeṯ ak yijjen n wuȓ iṣebbaren?