1 Ayṯ-Kurinṯ 15 - Ṯarifiṯ 2020

Lqiyama n Lmasiḥ

¹ Fa ay ayṯma akenniw sfekkareɣ x Lʼinjil iy zi kenniw beccareɣ, iƹni netta ṯqebȓem-ṯ u mtebṯin xas.

² Aqa ṯnejjmem zzayes wami ḏayes teṭṭfem mliḥ ḏeg wawaȓ n ttebcir nni wenni iy zi kenniw beccareɣ. Meȓa lla, zaƹma lʼiman nwem ṯesbeṭṭȓem-ṯ.

³ Cuf, ssiwḍeɣ-awem-d manayenni iǧan muhim tuɣa qebȓeɣ-ṯ nec s yixef inu, iƹni Lmasiḥ immuṯ ƹlaḥsab ȓmuƹṣiyaṯ nneɣ mammec iqqar Lkitab.

⁴ Ṯumma itwanḍeȓ, ṯumma itwasnekkar-d ḏeg wass wis ṯeȓtiyyam mammec iqqar Lkitab.

⁵ Ṯumma imeḍhar-as-d i Buṭrus, ssenni imeḍhar-asen-d i ṯenƹac nni n arrusul.

⁶ Menbaƹd imeḍhar-asen-d i ktar zi xemsmiyya n wawmaṯen ḏi twaȓa ḏ icten. Niṯni ƹaḏ ddaren ƹaȓayen marra iḏsen, ȓebƹaḍ zzaysen aqa ṭṭṣen iƹni mmuṯen.

⁷ Ṯumma imeḍhar-as-d i Yaƹqub, menbaƹd i marra arrusul.

⁸ Ɣar uneggaru qaƹ imeḍhar-ayi-d i nec, axmi nec ƹeḍȓeɣ war d xȓiqeɣ ca ḏi zman inu nican.

⁹ Aqa nec ḏ amezyan qaƹ ḏi arrusul. War sḏihiǧeɣ ca aḏayi ȓaɣan arrasul ȓaḥeqqac tuɣa nec tƹeddabeɣ jmaƹeṯ n ȓmuminin.

¹⁰ Walakin nec s arḍa n Arebbi ḏewȓeɣ mammec ǧiɣ ȓexxu. Ṯumma arḍa nnes war iǧi bu xafi s bȓa nnfaƹ; Lla, nec ccaṯeɣ tamara ktar zzaysen marra. Maci ḏ nec zaƹma; Lla, ḏ arḍa n Arebbi iy kiḏi.

¹¹ Falihaḏa waxxa ḏ nec niɣ ḏ niṯni, ḏ wanita ḏ ttebcir iy zi netbeccar ssenni kenniw ṯumnem zzayes.

Lqiyama n imettinen

¹² Fa Lmasiḥ netbeccar xas itwasekkar-d zi ȓmewṯ. Mammec qqaren ȓebƹaḍ zzaywem war ṯeǧi bu lqiyama n imettinen?

¹³ Meȓa walu lqiyama n imettinen, uȓa ḏ Lmasiḥ war d itwasekkar ca.

¹⁴ Maƹlik war d itwasekkar ca Lmasiḥ, iȓi ttebcir nneɣ ḏ ȓbaṭeȓ waha, iȓi kenniw lʼiman nwem uȓa ḏ netta ḏ ȓbaṭeȓ.

¹⁵ Maƹlik amenni, iȓi nufa ixef nneɣ ncehheḏ ẓẓur x Arebbi. Mayemmi? Ȓaḥeqqac necheḏ x Arebbi belli isekkar-d Lmasiḥ zi ȓmewṯ. Walakin maƹlik war tiȓi bu lqiyama n imettinen, iȓi Arebbi zaƹma war d isekkar ca Lmasiḥ zi ȓmewṯ.

¹⁶ Cuf, maƹlik imettinen war d twasnekkaren ca, iȓi Lmasiḥ zaƹma war d itwasekkar ca uȓa ḏ netta.

¹⁷ Maƹlik war d itwasekkar ca Lmasiḥ, iȓi kenniw zaƹma lʼiman nwem ḏ ȓbaṭeȓ waha, iȓi ƹaḏ aqa kenniw ḏi ȓmuƹṣiyaṯ nwem.

¹⁸ Maƹlik amenni, iȓi yinni iṭṭṣen iƹni yinni immuṯen ḏi Lmasiḥ zaƹma ṣafi qa fnan.

¹⁹ Maƹlik negga lʼamal nneɣ ḏi Lmasiḥ ƹlaḥsab ṯuḏarṯ-a ṯanita waha, iȓi s manaya netziǧiz i yiwḏan zaƹma ktar zeg yiwḏan marra.

²⁰ Fa aqa ȓexxu Lmasiḥ itwasekkar-d zi ȓmewṯ, iƹni netta ḏ ṯafeǧaḥṯ ṯamezwarut iy d ikkaren zeg yinni immuṯen.

²¹ Cuf, s yijjen n bnaḏem Adam ṯusa-d zzayes ȓmewṯ. S yijjen n bnaḏem ƹaweḏ ṯusa-d zzayes lqiyama n imettinen.

²² Ȓaḥeqqac am mammec iy ɣa nemmeṯ marra s bnaḏem nni Adam, ammu ƹaweḏ aɣarneɣ ṯiȓi ṯuḏarṯ i marra neccin s Lmasiḥ.

²³ Walakin kuȓ ijjen nnubeṯ nnes: Lmasiḥ netta ḏ ṯafeǧaḥṯ ṯamezwarut. Xmi d ɣa iƹqeb netta, aḏ d tas nnubeṯ n yinni iǧan zzayes netta.

²⁴ Ṯumma aḏ yiȓi ȓefna n ddunect-a. Lmasiḥ aḏ iqḍa x marra ȓeḥkam ḏ ȓmexzen ḏ jjheḏ ig iǧan, ṯumma aḏ ijj ȓeḥkam nni nnes i Arebbi Babas.

²⁵ Aqa itxeṣṣa aḏ iḥkem Lmasiḥ aȓ ɣa igg Arebbi marra ȓƹaḏyan nnes swadday n ssulṭa n iḍaren nnes.

²⁶ Ȓaƹḏu aneggaru iy ɣa ibeṭṭeȓ nettaṯ ḏ ȓmewṯ.

²⁷ Aqa Arebbi igga marra ṯimesȓayin swadday i ssulṭa n iḍaren n Lmasiḥ. Walakin xmi iqqar qa marra ṯimesȓayin twaggent swadday nnes, nessen belli Arebbi war iǧi bu jar n ṯmesȓayin nni ȓaḥeqqac Arebbi s yixef nnes netta ig iggin marra ṯimesȓayin nni swadday n ssulṭa n Lmasiḥ.

²⁸ Xmi ɣa iȓint marra ṯimesȓayin-a swadday n ssulṭa n Lmasiḥ, ṯumma Mmis iƹni Lmasiḥ s yixef nnes aḏ iḏweȓ uȓa ḏ netta swadday n ssulṭa n Arebbi ig iggin marra ṯimesȓayin-a swadday n ssulṭa n Lmasiḥ. Ammu aḏ yiȓi Arebbi ḏ marra ḏi min ḏi ma.

²⁹ Cuf, yinni itwaṭehharen s waman ƹlaḥsab i yinni immuṯen, man nnfaƹ iy rezzun niṯni? Meȓa ḏ ṣṣaḥ zaƹma belli yinni immuṯen war d twasnekkaren ca, mayemmi iwḏan-a tetwaṭehharen s waman ƹlaḥsab i yinni immuṯen?

³⁰ Y nec, mayemmi ǧiɣ ḏi lxaṭar kuȓ ṯsaƹƹat?

³¹ Ay ayṯma, twajaheɣ ȓmewṯ kuȓ nhar! Qqareɣ-awem manaya s lʼiftixar-a iy ɣari ḏaywem ƹlaḥsab ṯuḏarṯ-a nneɣ iy ɣarneɣ ḏ icten ak Siḏiṯneɣ Ƹisa Lmasiḥ.

³² Nec meȓa ƹlaḥsab ṯimesȓayin n ddunect-a waha, mayemmi menɣeɣ ak ȓuḥuc ḏi ṯendint n Ufasus? Min ɣa rebḥeɣ? Imettinen, meȓa war d tnekkaren ca zi ȓmewṯ, i mayemmi? "Yallah a necceṯ a nesweṯ, qa ṯiwecca a nemmeṯ."

³³ War xeddƹeṯ ca ixef nwem: "Ṯamƹacareṯ ṯaƹeffant, tḍeyyaƹ ttarbiya ṯaṣebḥant."

³⁴ Arrem-d ȓbaȓ nwem, war ƹeṣṣaṯ ca. Qqareɣ-awem manaya bac aḏ tseḏḥam minzi ȓebƹaḍ zzaywem ḏaysen ȓeqfareṯ x Arebbi.

Ddat nni iy ɣarneɣ ɣa yiȓin ḏi lqiyama

³⁵ Walakin ijjen aḏ yini: Imettinen, mammec ɣa ggen aḏ d kkaren? Man ṣṣifeṯ iy zi d ɣa ḏewȓen?

³⁶ A wenni war ifhimen, ṯaḥebbuyṯ nni iy ṯzerrƹeḏ aḏ temmeṯ zaƹma swadday n ucaȓ, menbaƹd aḏ teɣmi.

³⁷ U ṯenni ṯzerrƹeḏ cek nettaṯ war ṯeǧi bu ḏ ṣṣifeṯ nni iy d ɣa iɣmin. Lla, ṯzerrƹeḏ ɣiȓ ijjen n ṯḥebbuyṯ waha n zzarriƹeṯ n yirḏan niɣ ḏ ca n zzarriƹeṯ nneɣni.

³⁸ Ṯumma iticc-as Arebbi ijjen n ṣṣifeṯ iy ɣa ixḍar netta. Kuȓ nnuƹ n zzarriƹeṯ iticc-as ṣṣifeṯ nnes waḥḏes.

³⁹ Aysum ƹaweḏ war iǧi bu marra kif-kif. Iryazen ɣarsen ijjen n nnuƹ n uysum waḥeḏsen, lḥayawanaṯ waḥeḏsen, ijḍaḍ ijjen n nnuƹ waḥeḏsen, iseȓman ƹaweḏ waḥeḏsen.

⁴⁰ Ƹaweḏ ḏinni ṣṣifaṯ n ṯmesȓayin iy iǧan ḏeg ujenna. Ƹaweḏ ḏinni ṣṣifaṯ n ṯmesȓayin iy iǧan ḏi ṯmurṯ. Aceƹceƹ n min iǧan ḏeg ujenna netta ḏ ijjen n nnuƹ. Aceƹceƹ n min iǧan ḏi ṯmurṯ netta ḏ ijjen n nnuƹ.

⁴¹ Ṯfuct ɣares nnuƹ n uceƹceƹ nnes waḥḏes. Ṯaziri ɣares nnuƹ n uceƹceƹ nnes waḥḏes. Iṯran nnuƹ n uceƹceƹ nsen waḥeḏsen. Kuȓ iṯri ƹaweḏ ḏ aceƹceƹ nnes waḥḏes.

⁴² Ammu iy ṯiȓi lqiyama n imettinen. Min itwazerrƹen aḏ ifna, min d itwasnekkaren aḏ iḏum.

⁴³ Ddat twazerreƹ ḏi ȓefḍiḥeṯ, twasnekkar-d ḏi ccenƹeṯ. Twazerreƹ ḏi ḍḍuƹef, twasnekkar-d ḏi jjheḏ.

⁴⁴ Twazerreƹ ḏ ijjen n ddat n bnaḏem, twasnekkar-d ḏ ijjen n ddat ruḥiya. Meȓa ṯeǧa ddat n bnaḏem, ṯeǧa ƹaweḏ ddat ruḥiya.

⁴⁵ Ammu iqqar Lkitab: "Bnaḏem amezwaru iƹni Adam iḏweȓ ḏ buḥbeȓ iddaren." Adam aneggaru netta ḏ buḥbeȓ ig iseddaren.

⁴⁶ Min iǧan ruḥiya war d itis ca ḏ amezwaru; Lla, itas-d min iǧan n bnaḏem. Min iǧan ruḥiya itas-d menbaƹd.

⁴⁷ Bnaḏem amezwaru itwaṣenneƹ zeg ucaȓ n ṯmurṯ, bnaḏem wis ṯnayen yusa-d zeg ujenna.

⁴⁸ Mammec iy iǧa bnaḏem nni itwaṣennƹen zeg ucaȓ, amenni ƹaweḏ iy ǧan yiwḏan itwaṣennaƹen zeg ucaȓ. Wa mammec iy iǧa bnaḏem nni n ujenna, amenni ƹaweḏ iy ǧan yiwḏan n ujenna.

⁴⁹ Mammec netcabbah ḏi ṣṣifeṯ n wenni itwaṣennƹen zeg ucaȓ, amenni ƹaweḏ iy ɣa ncabbah ḏi ṣṣifeṯ n wenni zeg ujenna.

⁵⁰ Fa qqareɣ-awem ay ayṯma, qa aysum ḏ iḏammen war zemmaren aḏ warṯen ḏi ȓmulk ujenna. Min ifennan war iwarreṯ ca min war ifennin.

^51-52 Aqa qqareɣ-awem ijjen n ṯmesȓayṯ ȓmaƹna nnes inuffaren: Qa war netmetti ca s marra iḏneɣ. Xmi ɣa iṣuḍ zzammar aneggaru ataf a nbeddeȓ marra iḏneɣ ḏi ṣṣifeṯ nneɣni. Manaya aḏ yiȓi ḏeɣya ḏeg yijjen n warmac n ṯiṭṭ. Aḏ iṣuḍ zzammar nni ṯumma aḏ d twasnekkaren imettinen iƹni aḏ duman i ȓebda a niȓi nbeddeȓ ḏi ṣṣifeṯ nneɣni.

⁵³ Cuf, min ifennan itxeṣṣa aḏ iɣmes s min war ifennin, ḏ min itmettan itxeṣṣa aḏ iɣmes s min war itmettin.

⁵⁴ Min ifennan xmi ɣa iɣmes s min war ifennin, ḏ min itmettan xmi ɣa iɣmes s min war itmettin, ȓexddenni aḏ d iffeɣ min yurin ḏi Lkitab: <Ȓmewṯ iseɣȓey-t arbaḥ.>

⁵⁵

⁵⁶ Aqa ȓmewṯ ṯiqqest nnes tas-d zi ȓmuƹṣiyeṯ. Qa ȓmuƹṣiyeṯ ṯizemmar nnes tas-d zi ccariƹa.

⁵⁷ Neccin a neḥmeḏ Arebbi! Netta iticc-aneɣ-d bac a nerbeḥ s Siḏiṯneɣ Ƹisa Lmasiḥ.

⁵⁸ S manaya ay ayṯma imƹizzen inu, beddeṯ nican maci akenniw senhezzen. Ggeṯ lmejhud nwem ȓebda ḏi ȓxeḏmeṯ n Siḏiṯneɣ, qa ṯessnem belli ȓxeḏmeṯ nwem ḏi Siḏiṯneɣ maci ḏ ȓbaṭeȓ.