1 Ayṯ-Kurinṯ 11 - Ṯarifiṯ 2020

Ȓmuminaṯ ḏi lƹibada

¹ Ḏeffarem-ayi-d mammec ḏeffareɣ nec Lmasiḥ.

² Fa tcekkareɣ-kenniw wami teƹqaȓem xafi ḏi marra ṯimesȓayin, ṯḥeffḍem ttaƹlim nni mammec ḏawem ṯ seȓmaḏeɣ nec.

³ Walakin xseɣ akenniw sfehmeɣ mliḥ qa azeǧif n mkuȓ aryaz netta ḏ Lmasiḥ u ḏ netta ig itrayan. Azeǧif n mkuȓ ṯamɣarṯ netta ḏ aryaz u ḏ netta ig itrayan. Azeǧif n Lmasiḥ netta ḏ Arebbi u ḏ netta ig itrayan.

⁴ Mkuȓ aryaz ig itẓaǧan niɣ issawaȓ s min iƹȓem zi Arebbi azeǧif nnes iɣemmes, ataf netta war itweqqar ca azeǧif nnes.

⁵ Mkuȓ ṯamɣarṯ ig itẓaǧan niɣ ṯessawaȓ s min ṯeƹȓem zi Arebbi azeǧif nnes war iɣemmes ca, ataf nettaṯ war tweqqar ca azeǧif nnes. Itwaḥsab axmi azeǧif nnes itwaḥeff ḏ aqeccar.

⁶ Ṯamɣarṯ meȓa ṯugi aḏ teɣmes i uzeǧif nnes ḥsen meȓa ṯḥeff acewwaf nnes. Walakin ḏ ijjen n ȓefḍiḥeṯ ṯamɣarṯ meȓa ṯḥeff niɣ ṯeḏweȓ ḏ ṯaqeccarṯ, iƹni itxeṣṣa-yas aḏ teɣmes i uzeǧif nnes.

⁷ Cuf, aryaz itxeṣṣa-yas war iɣemmes ca i uzeǧif nnes liʼanna netta ḏ ṣṣifeṯ ḏ ccenƹeṯ n Arebbi, ṯamɣarṯ nettaṯ ḏ ccenƹeṯ n uryaz.

⁸ Aryaz war d itwaxȓiq ca zi ṯemɣarṯ. Lla, ṯamɣarṯ iy d itwaxeȓqen zeg uryaz.

⁹ Ƹaweḏ aryaz war d itwaxȓiq ca i ṯemɣarṯ. Lla, ṯamɣarṯ iy d itwaxeȓqen i uryaz.

¹⁰ S manayenni u ƹlaḥsab lmalaʼikaṯ itxeṣṣa-yas i ṯemɣarṯ aɣares ṯiȓi ijjen n lƹalama n ssulṭa x uzeǧif nnes.

¹¹ Innama, ḏi Siḏiṯneɣ ṯamɣarṯ taƹtamad x uryaz, aryaz itaƹtamad x ṯemɣarṯ.

¹² Liʼanna mammec ṯexȓeq ṯemɣarṯ zeg uryaz, amenni ȓexxu aryaz ixeǧeq-d zi ṯemɣarṯ. U marra zi Arebbi.

¹³ Ḥekmeṯ s yixef nwem. Ma maƹqul ṯamɣarṯ aḏ teẓẓaǧ i Arebbi bȓa ma aḏ teɣmes i uzeǧif nnes?

¹⁴ Yak ddunect-a s yixef nnes ṯseȓmaḏ-ikenniw, aryaz meȓa ijja acewwaf ḏ azeyrar ḏ ȓƹib niɣ lla?

¹⁵ Walakin ṯamɣarṯ meȓa ṯejja acewwaf ḏ azeyrar netta ḏ ijjen n ccan nnes. Liʼanna acewwaf nnes azeyrar immuc-as bac azzayes ṯeɣmes i uzeǧif nnes.

¹⁶ Meȓa ḏinni can yijjen irzu aḏ imɣannen x manaya, neccin war nennum ca can lƹada nneɣni, uȓa ḏ ṯijumaƹ n ȓmuminin n Arebbi war nnument ca can ȓḥajeṯ nneɣni.

Amensi n Siḏiṯneɣ

¹⁷ Nec tweṣṣiɣ-kenniw, ȓexxu war kenniw tcekkareɣ ca. Ȓaḥeqqac ṯijumaƹ nwem tḍarrant ktar zi min kenniw neffƹent.

¹⁸ Ḏ amezwaru, xmi tmunem jmaƹeṯ n ȓmuminin tesȓiɣ belli tiȓin jarawem lxilafaṯ, u nec tamneɣ manaya illa ḏayes cwayt n ṣṣaḥ.

¹⁹ Ȓaḥeqqac wa labud aḏ iȓin lxilafaṯ jarawem bac aḏ d banen yinni iǧan nican jarawem.

²⁰ Xmi tmunem kenniw, ma tettem amensi n Siḏiṯneɣ nican? Lla, walu.

²¹ Mayemmi? Liʼanna kuȓ ijjen min itegg: ijjen itraḥ itett waha bȓa ma aḏ iraja wenni nneɣni, ijjen iǧuz, ijjen isess aṭṭas n waman uḍiȓ.

²² Cuf, ma war ɣarwem bu ṯuḏrin mani iy ɣa ṯeccem niɣ ḏ mani iy ɣa ṯeswem? Kenniw, ma tseḥqarem jmaƹeṯ n ȓmuminin n Arebbi tḥeggarem yinni war ɣar iǧi walu? Min ḏawem ɣa iniɣ? Ma kenniw iy ɣa cekkareɣ x manaya? Lla, walu.

²³ Cuf, nec aqa min ḏayi yuca Siḏiṯneɣ u ḏ manaya iy ḏawem d ssiwḍeɣ iƹni ḏi ǧiȓeṯ nni iy ḏi immenz Siḏiṯneɣ Ƹisa iysi-d netta aɣrum,

²⁴ wami icekkar Arebbi irez-iṯ inna: "Ḏ wa ig iǧan ḏ ddat inu iy ɣa immucen ƹlaḥsab kenniw. Teggeṯ manaya ḥima aḏayi tfekkarem."

²⁵ Ammu ƹaweḏ wami kemmȓen amensi, iysi-d netta ȓkas nni, inna: "Ȓkas-a ḏ ȓƹaheḏ ḏ jḏiḏ iy kiḏwem teggeɣ s iḏammen inu. Teggeṯ manaya meȓmi ma ṯ ṯeswim ḥima aḏayi tfekkarem."

²⁶ Minzi meȓmi ma ṯeccim zeg uɣrum-a ṯeswim zi ȓkas-a, aqa txebbarem s ȓmewṯ n Siḏiṯneɣ aȓ d ɣa yas.

²⁷ Aqa wenni iy ɣa iccen zeg uɣrum-a n Siḏiṯneɣ niɣ ḏ wenni iy ɣa iswen zi ȓkas-a war ḏasen iticc ca lqima, ataf netta itegg ȓmuƹṣiyeṯ ḏ ṯameqqrant ak ddat ḏ iḏammen n Siḏiṯneɣ.

²⁸ Iwa itxeṣṣa-yas i bnaḏem aḏ irajeƹ ixef nnes qbeȓ ma aḏ icc zeg uɣrum-a, qbeȓ ma aḏ isew zi ȓkas-a.

²⁹ Aqa wenni itetten isessen bȓa ma aḏ iƹqeȓ nican x ddat n Siḏiṯneɣ, ataf itett isess lƹiqab i yixef nnes.

³⁰ S manayenni ḏinni aṭṭas jarawem ig iǧan ḍeƹfen heȓcen, can ȓebƹaḍ zzaywem mmuṯen.

³¹ Maƹlik nḥekkem x yixef nneɣ nican, ataf neccin war netwaḥkam ca.

³² Xmi xaneɣ itaḥkam Siḏiṯneɣ iƹni inehha-yaneɣ bac war nkessi ca lƹiqab n ddunect-a.

³³ X manaya ay ayṯma, xmi tmunem aḏ teccem rajaṯ ayawya.

³⁴ Can yijjen meȓa iǧuz, itxeṣṣa-yas aḏ icc ḏi ṯeddarṯ nnes bac xmi ɣa ṯmunem ataf war kenniw itḥissib ca Arebbi. Xmi d ɣa aseɣ nec ataf akenniw weṣṣiɣ x ṯmesȓayin nni nneɣni.