1 Ayṯ-Kurinṯ 1 - Ṯarifiṯ 2020

Arrasul Bulus itseǧam x jmaƹeṯ n ȓmuminin ḏi ṯendint n Kurinṯ

¹ Ṯabrat-a zzayi nec Bulus akiḏi umaṯneɣ Sastin. Iȓaɣa-ayi-d Arebbi s ȓxaḍar nnes ḥima aḏ iȓiɣ ḏ arrasul n Ƹisa Lmasiḥ.

² Netseǧam xawem kenniw iy iǧan ḏ jmaƹeṯ n ȓmuminin n Arebbi ḏi ṯendint n Kurinṯ. Twassiṣfam ḏi Ƹisa Lmasiḥ, twaxḍarem bac aḏ tiȓim ḏ ṣṣaliḥin ak marra yinni itȓaɣan x yisem n Siḏiṯneɣ Ƹisa Lmasiḥ ḏi marra imucan. Netta ḏ Siḏiṯneɣ ḏ Siḏiṯsen.

³ Akiḏwem yiȓi arḍa ḏ ȓehna zi Arebbi Babaṯneɣ ḏ Ƹisa Lmasiḥ Siḏiṯneɣ.

⁴ Tcekkareɣ Arebbi xawem ȓebda x arḍa iy ḏawem yuca ḏi Ƹisa Lmasiḥ.

⁵ Zi netta, itwarni-yawem ȓxir ḏi kuȓci, iƹni ḏi marra awaȓen ḏ ṯusna.

⁶ Ḏaywem kenniw iy d ismeḍhar Arebbi lḥaqiqa x chaḏeṯ nneɣ x Lmasiḥ.

⁷ S manaya war ḏawem ṯneqqiṣ uȓa ḏ ijjen n lqudra ruḥiya xmi trajam aḏ d imeḍhar Siḏiṯneɣ Ƹisa Lmasiḥ.

⁸ Ḏ netta iy kenniw ɣa isbedden ɣar uneggaru ataf war ḏaywem itiȓi bu ȓƹib ḏi Nhar nni n Siḏiṯneɣ Ƹisa Lmasiḥ.

⁹ Arebbi ḏayes ttiqeṯ, zzayes iy ḏaneɣ d yusa uȓaɣi a nƹacar Memmis iƹni Siḏiṯneɣ Ƹisa Lmasiḥ.

Ȓmuminin ḏi Kurinṯ ɣarsen lxilaf jarasen

¹⁰ Fa tettareɣ zzaywem ay ayṯma s yisem n Siḏiṯneɣ Ƹisa Lmasiḥ, msefhameṯ ak wayawya ḥima war itiȓi bu lxilaf jarawem. Itxeṣṣa kenniw aḏ tiȓim kif-kif ḏi ȓaƹquȓaṯ nwem ḏ array nwem.

¹¹ Ay ayṯma, arriɣ-d ȓexbar zi ṯeddarṯ n Kluwi tmenɣam jarawem.

¹² Iƹni, ijjen iqqar nec ḏeffareɣ Bulus. Ijjen iqqar nec ḏeffareɣ Apullus. Ijjen iqqar nec ḏeffareɣ Buṭrus. Ijjen iqqar nec ḏeffareɣ Lmasiḥ.

¹³ Lmasiḥ ma ḏayes lfirqaṯ? Lla! Ma ḏ Bulus itwaṣellben x ṣṣalib ƹlaḥsab kenniw? Lla! Ma ṯetwaṭehharem kenniw s waman s yisem inu Bulus? Lla!

^14-15 Tcekkareɣ Arebbi war ṭehhireɣ uȓa ḏ ijjen zzaywem s waman illa Krisbus ḏ Ɣayus ḥima war iqqar ḥadd qa itwaṭehhar s waman ƹlaḥsab isem inu.

¹⁶ (Wah, nec ṭehhareɣ s waman i ȓeḥbab n Stifanus. War ƹqiȓeɣ ca ma ṭehhareɣ i ḥadd nneɣni s waman ktar zeg yina.)

¹⁷ Liʼanna Lmasiḥ war ḏayi d issekk ca ḥima aḏ ṭehhareɣ i yiwḏan s waman; Lla, nec issekk-ayi-d aḏ beccareɣ s Lʼinjil walakin maci s ȓefhameṯ nni n wawaȓen izewwqen. Mayemmi? Bac jjheḏ iy iǧan ḏi ṣṣalib n Lmasiḥ war itbeṭṭiȓ ca.

Lmasiḥ netta ḏ ȓefhameṯ ḏ jjheḏ n Arebbi

¹⁸ Cuf, awaȓ n ṣṣalib netta ḏ ṯubbuhȓiya waha ɣar yinni war inejjmen ca, walakin ɣar neccin inejjmen awaȓ-a netta ḏ jjheḏ n Arebbi.

¹⁹ Liʼanna iqqar Lkitab: <Ȓefhameṯ n yinni itefhamen at heḏmeɣ. Ȓefṭaneṯ n yinni ifeṭṭnen at sfecȓeɣ.>

²⁰ Wenni itefhamen zaƹma, ȓexxu mani iǧa? Amseȓmaḏ n ccariƹa zaƹma, ȓexxu mani iǧa? Lfilasuf n ȓweqṯ-a zaƹma, ȓexxu mani iǧa? Yak Arebbi isbuheȓi ȓefhameṯ n yiwḏan n ddunect-a ṯanita?

²¹ Isbuheȓi-t s ȓefhameṯ n min netbeccar neccin. Mammec? S ȓefhameṯ-a n Arebbi iƹjeb-as aḏ isenjem yinni itamnen, walakin iwḏan n ddunect-a war zemmaren aṯ ssnen s ȓefhameṯ nsen.

²² Niṯni israʼiliyen tettaren lmuƹjizaṯ, ḏ yinni war iǧin zi Ayṯ-Israʼil rezzun ȓefhameṯ,

²³ walakin neccin netbeccar s Lmasiḥ itwaṣellben. Israʼiliyen tneqȓaḍen ḏi manaya, ḏ yinni war iǧin ca zi Ayṯ-Israʼil qqaren qa manaya ḏ ṯubbuhȓiya waha.

²⁴ Walakin i yinni umi d iȓaɣa Arebbi, iƹni israʼiliyen ḏ yinni war iǧin ca zi Ayṯ-Israʼil, Lmasiḥ netta ḏ jjheḏ n Arebbi ḏ ȓefhameṯ nnes.

²⁵ Mayemmi? Liʼanna zaƹma ṯubbuhȓiya n Arebbi nettaṯ ṯsefham ktar zi ȓefhameṯ n bnaḏem, zaƹma ḍḍuƹef n Arebbi netta ijheḏ ktar zi jjheḏ n bnaḏem.

²⁶ Ay ayṯma, fekkareṯ ḏi min tuɣa ṯeǧam qbeȓ wami ḏawem d iȓaɣa i kenniw Arebbi. Maci aṭṭas iḏwem iy ḏi tuɣa ṯeǧa ȓefhameṯ ƹlaḥsab min qqaren yiwḏan. Maci aṭṭas iḏwem kenniw ɣar tuɣa ṯeǧa lmartaba. Maci aṭṭas iḏwem kenniw lʼaṣel nwem tuɣaṯ zeg imeqqranen.

²⁷ Walakin Arebbi ixḍar min iǧan ḏ ṯubbuhȓiya ɣar yiwḏan n ddunect-a ḥima aḏ ifḍeḥ yinni itefhamen zaƹma. Ixḍar Arebbi min iḍeƹfen ḏi ddunect-a ḥima aḏ ifḍeḥ yinni ijehhḏen.

²⁸ Ixḍar Arebbi wenni ɣar iǧa lʼaṣel nnes ḏ amezyan ḏ min itwaƹiffan, ixḍar ḥetta ḏ ṯimesȓayin war iǧin ca bac aḏ isbeṭṭeȓ ṯimesȓayin nni iy iǧan.

²⁹ Mayemmi? Ḥima uȓa ḏ ijjen n bnaḏem war iteftaxar ca zzaṯ i Arebbi.

³⁰ U netta ḏ ssabab iy zi ṯeǧam kenniw ḏi Ƹisa Lmasiḥ. Iggi-ṯ Arebbi netta ḏ ȓefhameṯ nneɣ, iƹni netta ḏayes ṣṣulḥ nneɣ ḏ uṣeffi nneɣ ḏ ufekki nneɣ.

³¹ Falihaḏa, mamc iqqar Lkitab: