Zekaria 7 - Ebibulia 2001

Omukama natamwa okusiiba okw'obugobya

¹ Aha kiro kya kanai ky'omwezi gwa mwenda, nigwo gwa Kisilevu, omu mwaka gwa kanai Omukama Dario ali aha ngoma, Omukama Ruhanga akangambira ekigambo inye Zekaria omurangi.

² Omu biro ebyo aba Betheli bakaba batumire Sharezeri na Regemeleki n'abashaija babo Rwensinga kushaba aha Mukama omugisha.

³ Kandi kubaza abakuhani ba Rwensinga y'Omukama w'amahe n'abarangi bati, “Tugendelere kuchura aha rw'okukambuka kwa Rwensinga, n'okusiiba omu mwezi gwa katanu nk'okwo tutura nitugira emyaka nyingi?”

⁴ Ahanyuma Omukama angambira ati,

⁵ “Ogambire abanyansi bona n'abakuhani oti, Orwo mukachura mukasiiba omu mwezi gwa katanu n'ogwa mushanju, emyaka egi musiiba kumpa ekitinwa?

⁶ Isi orwo mulya mukanywa, timuba nimwelira nimwenywera?

⁷ Ebi tibyo Omukama yagambaga omu kanwa k'abarangi abahingwire orwo Yerusalemu yabaire ekyatwirwe abantu, eina emilembe, ebigo bigili embaju zona, abantu batwire kichweka kya kasi n'ahansi y'amabanga omu ruhita?”

Okuburwa omuhuliro kukarugwamu obuzahe

⁸ Omukama ashuba angambira kugambira abantu nti,

⁹ “Omukama w'amahe nagamba ati: Muramuze amazima, buli muntu agilire mutahiwe ekisha n'obuganyizi.

¹⁰ Entumbwa, enfuuzi, omufuruki, anga omunaku, mutababonesa naku. Omuli inywe hatabaho muntu ayagonza kukora kubi mutahiwe.”

¹¹ Kyonkai bakanga kuhulira basika amabega, baigara amatwi batahulira.

¹² Emitima yabo bagigumanganisa yashusha enyondobare ngu batahulira mateka na bigambo eby'Omukama w'amahe yabatumireho Mwoyowe omu kanwa k'abarangi abayebembeire. Nikyo yabatamirwe muno.

¹³ Omukama w'amahe nagamba ati, “Nk'okwo nabesire bakanga kumpulira, nikwo nabo banyesire nkanga kubahulira.

¹⁴ Nkasindika akazimu kabatatamiza omu mahanga gona ago batamanyaga. Nikwo ensi kugisigaho ekaba ndaara, ekabura ow'okugitahamu n'ow'okugirugamu. Eyabaire eli nsi nungi yahinduka irungu.”