Zekaria 6 - Ebibulia 2001

Omurangi omu kubonekerwakwe nabona amagali ganai

¹ Omu kubonekerwa kwange nshuba naga amaisho; kugya kugira nti mbona amagali ganai nigaruga ahagati y'amabanga gabili g'omulinga.

² Egali eya mbere ekaba nekururwa efarasi zilikutukura. Eya kabili nekururwa ezilikwiragura.

³ Eya kashatu nekururwa ezilikwera. Eya kanai nekururwa efarasi za runyai.

⁴ Aho mbaza omumalaika wonabaire ninfumora nawe nti, “Rugaba rwange, ebi biki?”

⁵ Omumalaika amporora ati, “Efarasi ezi nizija kuturuka kugya omu nsi zona, zaruga aha Mukama w'ensi yona.

⁶ Egali elikukururwa efarasi ezilikwiragura negya omu nsi ya bikara. Ezilikwera nizigya omu nsi y'obugyaizoba. Eza runyai nizigya omu nsi ya kasi.”

⁷ Efarasi ezo kazaturukire zikaba nizilibalibwa kugenda kugya kurambura ensi. Omumalaika azigambira ati, “Iroko murambure ensi.” Kityo zigenda zirambura.

⁸ Ahanyuma angambira n'eiraka lihango ati, “Efarasi ezigire bikara, Babiloni, zichuleize ekiniga ky'Omukama omu nsi egyo.”

Yoshua najwekwa orukinga

⁹ Aho Omukama angambira ati,

¹⁰ “Omu bazahe abarugire Babiloni oihyemu Helidai, Tobiasi na Yedaya; kiro kyonene ekyo okwate omuhanda ogye omwa Yosia eya Zefania.

¹¹ Bakuhe efeza n'ezahabu, ozikoze orukinga, orujweke Yoshua Omukuhani Nyamukuru, mutabani wa Yehozadaki aha mutwe.

¹² Omugambire oti, ‘Omukama w'amahe nagamba ati: Omuntu alikwetwa Itagi naija kuramuuka mbali ali mara ayombeke buhya Rwensinga y'Omukama.

¹³ Niwe aragyombeka. Kandi arakunirwa nk'omukama, abandare aha nketo, atware. Kandi aha nketoye harabaho Omukuhani, mara bombili nibaija kushobokeranganwa kurungi bagir'emilembe.’ ”

¹⁴ Orukinga ruraikara Rwensinga, rube kaijukiro ka Helidai, Tobiasi, Yedaya, na Yosia eya Zefania.

¹⁵ “Abali harai baraija bajune kwombeka buhya Rwensinga y'Omukama. Orwo eramara kushubwamu muramanya okwo Omukama w'amahe niwe abantumireho. Ebi byona birabaho bityo kamuragira omuhuliro nyantayuga aha by'Omukama Ruhanga wanyu alikubaragira.”