Zekaria 5 - Ebibulia 2001

Omurangi omu kubonekerwakwe nabona ekitabo kilikuharara

¹ Omu kubonekerwa kwange nshuba naga amaisho; kugya kugira nti mbona ekitabo nikiharara.

² Omumalaika ambaza ati, “Nobonaki?” Muhorora nti, “Nimbona ekitabo nikiharara, oburai bwakyo mita, kandi obukika bwakyo 4 1/2 mita inai n'enusu.”

³ Ahanyuma angambira ati, “Ogu muraamo ogulikwija kubaho gukamaraho ensi yona. Kwema mbwenu omuntu wena wena araiba araitwa; kandi buli omoi alikunahira ebishuba nawe baramwita, nk'okwo omuraamo gulikugamba.

⁴ Omukama w'amahe nagamba ati, ‘Ndasindika omuraamo ogwo gutahe omw'omushuma, gutahe n'omw'omuntu alikunahira ebishuba omw'ibara lyange; gwikaremu, mara gugisilikye, gumaliireho kimoi emiti n'amabare.’ ”

Omurangi omu kubonekerwakwe nabona omukazi ali omu kikapu

⁵ Ahanyuma omumalaika owo nabaire nfumoire nawe aija, angambira ati, “Naga amaisho olebe ekyo ekilikushohora okimanye.”

⁶ Mubaza nti, “Kiki?” Amporora ati, “Kikapu nikyo kilikushohora; nikimanyisa obufu bw'ensi yona.”

⁷ Ekifundikizo kyakyo ky'eibati kakyafundwirwe, mbona omukazi akishuntamiremu.

⁸ Omumalaika ogwo agamba ati, “Ogu ni Bufu.” Ashuba amufutika omu kikapu, amara atera ekifundikizo ky'eibati n'obwo busikizi bwakyo afundikira ekikapu ekyo.

⁹ Aho naga amaisho, kugira nti mbona abakazi babili nibaija. Baina amapapa nigahutwa omuyaga, nigashusha ag'orwonkante. Bakwata ekikapu ekyo bakyeleeza eiguru omu rwerwerwe.

¹⁰ Ahanyuma mbaza omumalaika owo nabaire ninfumora nawe nti, “Ekikapu nibakitwara nkahai?”

¹¹ Yangarukamu ati, “Nibakitwara Shinari kukyombekerayo rwensinga. Orwo Rwensinga egyo elihwa, baligitamu ekikapu ekyo bakiketere.”