Zekaria 4 - Ebibulia 2001

Omurangi omu kubonekerwakwe nabona ekinara

¹ Omumalaika olinya owo nabaire ninfumora nawe agaruka ansisimura, nk'omuntu ayasisimurwa omu turo.

² Ambaza ati, “Nobonaki?” Mushubamu nti, “Nimbona ekinara eky'ezahabu nshai, eiguru kinaho epakuli, kandi kiliho etara mushanju, buli emoi eina eminwa mushanju y'entambi.

³ Aha mbaju zakyo haliho emizeituni ebili, ogumoi rubaju orwa bulyo n'ogundi aha rwa bumosho.”

⁴ Mbaza omumalaika ogwo owo ndikufumora nawe nti, “Rugaba rwange, ebi nibimanyisaki?”

⁵ Na wenene ambaza ati, “Tolikumanya nibimanyisaki?” Mugarukamu nti, “Chei, Rugaba rwange!”

⁶ Ahanyuma angambira ati, “Leba ekigambo eky'Omukama alikutuma ahali Zerubabeli ati: Eby'olikwija kukora tolikwija kubikora aha rwa mani gawe, kandi ti aha rw'obushobora bwawe, shana aha rw'amani n'obushobora bwa Mwoyo wange. Alikugamba Mukama w'amahe.

⁷ Wab'ohai iwe ibanga lihango? Zerubabeli arakuhindura ruhita. Araleta eibare ly'engundu, abantu nibazina akanyahwera bakwese, ‘Nilikagiire omugisha! Nilikagiire omugisha!’ ”

⁸ Omukama ashuba angambira ati,

⁹ “Emikono ya Zerubabeli niyo yayombekire omusingi gwa Rwensinga egi, kandi emikonoye egyo niyo eligimaliliza. Aho nirwo mulimanya okwo Omukama w'amahe niwe abantumireho.

¹⁰ Abantu bayenanukire aha rw'okuba elyombeka niligenda mpora. Kyonkai orwo barabona okwo Zerubabeli yagendeleza elyombeka elyo lya Rwensinga barashemelerwa.” “Etara ezi mushanju nigo maisho mushanju g'Omukama agaraba omu nsi yona nigaleba ebigilimu.”

¹¹ Ahanyuma namubaza nti, “Emizeituni elinya ebili eli rubaju orwa bulyo n'orwa bumosho orw'ekinara nemanyisaki?”

¹² Nshuba mubaza omurundi gwa kabili nti, “Isi amatagi gabili ag'emizeituni agali orubaju orw'ebomba z'ezahabu eibili ezilikurabwamu amajuta zina makuruki?”

¹³ Ambaza ati, “Tolikumanya eky'ebi bilikumanyisa?” Mushubamu nti, “Chei, Rugaba rwange.”

¹⁴ Aho angambira ati, “Ezi nkorwamajuta ibili ezemelera aha rubaju rw'Omukama w'ensi yona.”