Zekaria 3 - Ebibulia 2001

Omurangi omu kubonekerwakwe nabona Omukuhani Nyamukuru

¹ Omu kubonekerwa okundi Omukama akanyoleka Yoshua Omukuhani Nyamukuru ayemeleire omu maisho g'omumalaikawe. Yoshua ogwo Sitani akaba amwemeleire aha mukono gwa bulyo kwija kumutoijera.

² Omukama agambira Sitani ati, “Iwe Sitani, Omukama nakakukabukire! Omukama aronkire Yerusalemu nakakukabukire! Tolikumanya okwo ogu ali kichumukulira ky'omuliro?”

³ Aho Yoshua akaba ayemeleire omu maisho g'omumalaika, ajwete emyendo y'enziro zingi muno.

⁴ Omumalaika yagambira abamwemeleire omu maisho ati, “Mumujure ebijwaro ebyo ebitokoire muno.” Amara agambira Yoshua ogwo ati, “Leba, nakwiyaho entambara zawe, nyije nkujweke ebijwaro ebirungi muno.”

⁵ Nanye nagira nti, “Bamute ekilemba kilikwera omu mutwe.” Kityo bamuta ekilemba kilikwera omu mutwe bamujweka n'ebijwaro. Omumalaika w'Omukama akaba ayemeleireho.

⁶ Ahanyuma omumalaika w'Omukama agambira Yoshua ati,

⁷ “Omukama w'amahe nagamba ati: K'orakora ebyo ndikwenda okekomya n'ebyo ndikukuragira, aho oragendelera kulebelera Rwensinga yange na nyarubuga zayo. Mara aho ndahuliraga enshara zawe nk'okwo ndikuhulira enshara z'abamalaika abandi omu maisho.

⁸ Mbwenu iwe Yoshua Omukuhani Nyamukuru, hulira iwe na batahi bawe abakushuntama omu maisho, kuba bantu b'okumanywaho ebirungi: Leba naija kuboleka omukozi wange, Itagi.

⁹ Aha ibare elyo ntaire omu maisho ga Yoshua, ibare limoi elina embaju mushanju, ninyija kulibaijaho ebihandiko. Alikugamba Mukama w'amahe. Kandi ensi egi ndigigarulira entambara zayo omu kiro kimoi.

¹⁰ Kir'ekyo, inywena muligira emilembe; buli omoi alyeta mutahiwe kushuntama hamoi aha muzabibugwe anga aha mutinigwe. Alikugamba Mukama w'amahe.”