Zekaria 14 - Ebibulia 2001

Yerusalemu n'amahanga

¹ Leba, ekiro ky'Omukama eky'eiramu kili haihi, orwo balibagabira ebyo mwanyagirwe.

² Ndihuruza amahanga gona gatere Yerusalemu. Ekigo kilikwatwa, amaju ganyagwe, n'abakazi bahambwe. Enusu y'ekigo balitwarwa omu buzahe, kyonkai abasigaire baliikaramu.

³ Aho Omukama alitabara arashane n'amahanga ago, nk'okwo arashana aha kiro ky'endashana.

⁴ Kiro kyonene ekyo alyemelera aha Ibanga ly'Emizeituni elilebangaine na Yerusalemu rubaju orw'oburuga izoba. Eibanga ly'Emizeituni elyo lilibeganukamu kabili kwema oburugaizoba kugya obugwaizoba, lilitaishuranwa oruhanga ruhango muno. Enusu y'eibanga elyo elisikukira amagyaruguru, kandi enusu esikukire amagyaifo.

⁵ Oruhanga orwo omugati y'amabanga gange nimwo mulisingirwa mukarwijura, nangu n'omwanya gukaburamu, kulemwa kugoba Yasoli, nk'okwo babaire barwijwire aha rw'omusisi omu makiro g'Omukama Uzia owa Yuda. Nirwo Omukama Ruhanga wanyu alija n'abamalaika bona.

⁶ Kir'ekyo talibaho mbeho anga ruho.

⁷ Gulikara guli mushana (ekiro ekyo Omukama wenkai niwe alikukimanya). Teliba nyemishana, kandi tikiliba kiro, kuba n'omu bwaigoro guliba mushana.

⁸ Kir'ekyo amaizi g'oburora galigera nigaruga Yerusalemu. Enusu yago egye omu nyanja y'oburugaizoba, n'obundi bugye omu nyanja ey'obugwaizoba. Biliba bityo omu kyanda n'omu musenene.

⁹ Omukama niwe aliba mukama w'ensi yona. Kwema kir'ekyo aliba Mukama omoi n'eibara balimweta elyo limoi.

¹⁰ Ensi yona kwema Geba kugoba Rimoni obugyaifo bwa Yerusalemu elihinduka ruhita. Kyonkai Yerusalemu elikara eiguru mbali eli kubandiza aha Kihigi kya Benjamini kuturuka aha Kihigi ky'Enshonda mbali habaire hali ekihigi ekya karai, n'okwema aha Munara gwa Hananeli kugoba aha majungiro g'edivai g'Omukama.

¹¹ Abantu balitur'omwo, kuba omuraamo guliba guhoire. Yerusalemu nayo elitura omu milembe.

¹² Amahanga gona agatura garashanisa Yerusalemu, Omukama alibateza ekibundo eki: Balijunda emibili bakyayemeleire, amaisho gabajundire omu binonko, n'endimi zibajundire omu kanwa.

¹³ Kir'ekyo Omukama alibakangaranisa, buli omoi akwate mutahiwe omukono, kyonkai bazingirangane entomi.

¹⁴ Nangu n'aba Yuda balirwanisa aba Yerusalemu, kandi eitunga ly'amahanga gona agataine Yerusalemu: Ezahabu, efeza n'ebijwaro, lilishorozibwa hamoi litali like.

¹⁵ Ekibundo nk'eki kilitera efarasi, enyumbu, engamia, endogobe, n'ebitunganwa byona byona ebilishangwa bili omu nsi ezo.

¹⁶ Ahanyuma buli muntu alihunga aha mahanga gona agaliba gatabalire Yerusalemu, buli mwaka aragyaga Yerusalemu kufukamira Omukama Ruhanga w'amahe n'okushemeza ekiro kikuru ky'ensisira.

¹⁷ Kandi eihanga lyona lyona kaliliba litagiire Yerusalemu kufukamira Omukama Rugaba w'amahe, tibaligwisa njura.

¹⁸ Abamisiri baije baburwe kugyayo, abo baliterwa ekibundo eky'Omukama ateza amahanga agatagya Yerusalemu kushemeza kiro kikuru kya nsisira.

¹⁹ Eki kiliba kibonabonyio kya Misiri n'amahanga gona agaliburwa kugya Yerusalemu kushemeza ekiro kikuru ekyo.

²⁰ Kir'ekyo ekengere z'efarasi zilihandikwaho ziti, “Ehongeirwe Omukama.” N'enyungu za Rwensinga y'Omukama ziliba nk'epakuli omu maisho ga alutare.

²¹ Kandi buli nyungu omuli Yerusalemu na Yuda baligihongera Omukama w'amahe. Abaraijaga kutamba ebitambo bazikwatega bazichumbiremu enyama y'ekitambo kyabo. Mara kwema kir'ekyo omuli Rwensinga y'Omukama w'amahe baliba batakitundiramu.