Zekaria 13 - Ebibulia 2001

¹ “Kir'ekyo halitabuka enchuro aha rw'oruganda rwa Daudi n'abanyansi ba Yerusalemu ey'okubogya amafu n'obuhagare.

² Kiro kyonene ekyo, inye, Omukama w'amahe, omu nsi egi ndichwamu ebihuuku n'amabara gabyo, biliba bitakijukwa. Kwakwo ndichwamu abarangi n'okuronkwa kufukamira ebihuuku.

³ Kahalizoka omurangi ondijo, ishe na nyina balimugira bati, ‘Noija kufa iwe, kuba nogamba ebishuba nojuliza Omukama.’ Kandi k'aliranga, ishe na nyina abamuzaire balimutera eichumu.

⁴ Kiro kyonene ekyo buli murangi k'aliranga eby'aliba abonekeirwe alikwatwa enshoni. Kandi talijwara bebo elikubaba kubeiya bantu.

⁵ Shana aligira ati, ‘Inye timba murangi, mba mulimi; kwema obusigazi eitaka nilyo liba itunga lyange.’

⁶ Kandi k'omuntu alimubaza ati, ‘Ezo enkoju ezikuli aha mugongo okazihyahai?’ Alihorora ati, ‘Nkahutalira omwa batahi bange.’ ”

Omuhango gw'okwita omushumba wa Ruhanga

⁷ Omukama w'amahe nagamba ati, “Iwe mbanda iwe sisimuka orwane n'omushumba wange, okwatangane n'omukono gwange gwa bulyo. Tera omushumba, entama zitataame; nanye obwana bwazo nimbutera.

⁸ Omu nsi yona abantu babili omu bashatu balifa basilike, owa kashatu niwe alihonoka.

⁹ Owa kashatu ogwo ndimuta omu muliro, mujugute okw'omuntu ajuguta efeza, mwokye omu muliro nk'okwo bokya ezahabu. Aho alintakira, nanye ndimuhorora. Ndigamba nti, ‘Ogu muntu wange,’ na wenene aligira ati, ‘Omukama niwe aba Ruhanga wange.’ ”