Zekaria 12 - Ebibulia 2001

Okurokoka kwa Yerusalemu bukiro obulija

¹ Eki kigambo ky'Omukama ayatonzire eiguru n'ensi, akatonda n'omuntu akamutamu omwoyo, yagambire ahali Isiraeli, ati,

² “Leba, Yerusalemu ndi haihi kugihindura kikompe ky'edivai, amahanga gona agagyataine gaginywe gagende nigataratara. Orwo Yerusalemu elibundwa na Yuda kutyo.

³ Kir'ekyo Yerusalemu ndigihindura ibare elilisikilira amahanga gona. Abalilishutura bona balyehutaza kubi. Amahanga gona omu nsi galyema hamoi kutera ekigo ekyo.

⁴ Kiro kyonene ekyo buli farasi ndigikangaranisa, kandi agikuubire murarure. Kyonkai ab'oruganda rwa Yuda ndibalinda, orwo ndihumisa efarasi zona z'abanyamahanga.

⁵ Nirwo enganda za Yuda zilitekeleza ziti, ‘Abanyansi ba Yerusalemu Omukama w'amahe, Ruhanga wabo, niwe mani gabo.’ ”

⁶ “Kir'ekyo enganda za Yuda ndizishushanisa oruguhyo orulikumengeta omuliro omu nkwi, ndibashushanisa enkanzi elikurabagira omu biba by'engano. Omuliro ogwo guliraba obulyo n'obumosho gwokye amahanga gona agataine Yerusalemu. Nawe Yerusalemu yonene elikara okwo ekatura n'abanyansi bamwo.”

⁷ “Kandi inye, Omukama, ndibanza nyememu amahe ga Yuda gasinge endashana, ekitinwa ky'ab'oruganda rwa Daudi n'eky'abanyansi ba Yerusalemu kitalija kikakira eky'oruganda rwa Yuda orwo.

⁸ Kir'ekyo ndikwata engabo ngikingire abanyansi ba Yerusalemu. Nangu omujege muno kushaga bona aliba nka Daudi, n'oruganda rwa Daudi rulishusha inye Ruhanga, ruliba nk'omumalaika wange arwebembera.

⁹ Kir'ekyo nditaho amani kwita amahanga gona agatabalira Yerusalemu.”

¹⁰ “Oruganda rwa Daudi n'abanyansi ba Yerusalemu ndibagiza embabazi zingi muno n'ekihika kingi ky'okushoma enshara. Kabalileba owo bachumita balimuchulira nk'okwo omuntu achulira omwanawe omumoimoi; bamuchulire muno nk'okwo omuntu achulira omwanawe w'omuzigaijo.

¹¹ Kir'ekyo omuli Yerusalemu balichura muno nk'abachuliire Hadadirimoni omu Ruhita rwa Megido.

¹² Ensi elichura yona: Buli ka elichura yonkai; oruganda rwa Daudi rulichura rwonkai, n'abakazi babo balichura bonene bonkai. Ab'oruganda rwa Natani balichura bonkai, n'abakazi babo balichura bonene bonkai.

¹³ Oruganda rwa Levi rulichura rwonkai, n'abakazi babo balichura bonene bonkai. Oruganda rwa Shimei rulichura rwonkai, n'abakazi babo balichura bonene bonkai.

¹⁴ N'enganda zona ezasigara, buli rumoi rulichura rwonkai, n'abakazi babo balichura bonene bonkai.”