Zekaria 10 - Ebibulia 2001

Omukama nashubiza abantube kubarokora

¹ Mushabe Omukama enjura omu kirumo ky'etoigo, mugishabe Omukama alete endabyo, niwe agigwisiza abantu, akameleza buli omoi obunyasi mbali alisiza.

² Ebihuuku bigamba ebitaina nshonga, n'embandwa zibona ebishuba. Abarota barota ebiroto by'ebishuba, n'ebyo bagamba kumaramara abantu tibigiramu kantu. Orw'ekyo abantu batamanga nk'entama; okuburwa omushumba kubateza enaku.

³ Omukama nagamba ati, “Abashumba mbatamirwe muno, kandi abebembezi ndibabonabonyia. Aha rw'okuba inye, Omukama w'amahe, ninshasibwa obuhyo bwange bw'entaama, nirwo ruganda rwa Yuda; ndibahindura farasi z'endashana, babe kyebugo kyange.

⁴ Omu ruganda rwa Yuda nimwo haliruga eibare ly'epembe, rulirugwamu emambo y'eihema, batabukwemu obuta bw'endashana, na buli mutwazi alirug'omwo.

⁵ Bemire hamoi balishusha abaisherukare omu ndashana, bajungilire omubisha omu shabo omu mbarabara z'ekigo. Balirashana enshonga Omukama aliba ayemire nabo, babuze n'amagezi abalikugendera aha farasi.

⁶ Ndigumisa oruganda rwa Yuda, ndirokora oruganda rwa Yozefu. Ndibagarura aha rw'okuba nimbagilira embabazi, balishush'oti nkaba ntakabatamwaga. Mba Mukama Ruhanga wabo mara ndabahororaga.

⁷ Aho Efuraimu alishusha omwisherukale emanzi, alishemelerwa nk'anyoire edivai. Abanabe kabalibona batyo balishanduka, Omukama aliba byera byabo.

⁸ Ndibatigisa mbashoroze, enshonga nkabachungura, kandi baliba bangi nk'obwa karai.

⁹ N'orwo nabanaganagiire omu mahanga, omu nsi ezo za harai baranyijuka. Balitura n'abana babo mara baligaruka.

¹⁰ Ndibaihya omu nsi ya Misiri mbagarure omuka, mbashoroze mbaihye Asiria. Ndibaleta omu nsi ya Gileadi na Lebanoni, balemwe bafundemu baburwe obwikaro.

¹¹ Baliraba omu nyanja y'enaku, amayengo g'enyanja ngatere ngabutamye, na Naili elyoma egobe okuzimu. Eikuru lya Asiria lilifutikwa, na Misiri alirugwaho enkoni y'obukama.

¹² Ndibagumisa mbe mani gabo, mara balinyebuga.” Alikugamba Mukama.