Zekaria 1 - Ebibulia 2001

Omukama nayeta abantube kumugarukira

¹ Omu mwezi gwa munana gw'omwaka gwa kabili Omukama Dario aliire engoma, Omukama Ruhanga akagambira Omurangi Zekaria eya Berekia, Berekia eya Ido, ati,

² “Omukama akanigalira muno bash'enkurw'inywe.

³ Orw'ekyo obagambiire oti, Omukama w'amahe nagamba ati, Mungarukire nanye ndabagarukira. Alikugamba n'inye Omukama w'amahe.

⁴ Mutashusha bashwenkurw'inywe abo abarangi aba mbere bagambiire muno bati, Omukama w'amahe nagamba ngu mulekere emize yanyu n'ebigiro bibi. Kyonkai tibampuliire anga kumpuliliza. Alikugamba Mukama.

⁵ Bashwenkurw'inywe balihai? Isi abarangi baturaho ebiro byona?

⁶ Kyonkai ebigambo byange n'ebiragiro byange ebyo nahangiire abairu bange abarangi tibyagobeleire ahali bashwenkurw'inywe? Ahanyuma bakechuza bagamba bati: Okwo Omukama w'amahe ayenzire kutukora aha rw'ebyo tulikukora n'ebyo tulikugira, nikwo atukozire.”

Omurangi omu kubonekerwakwe nabona efarasi

⁷ Aha kiro kya makumi gabili na binai ky'omwezi gwa ikumi na gumoi, ogwetwa Shebati, gw'omwaka gwa kabili Omukama Dario agiire aha ngoma, Omukama Ruhanga agambira Omurangi Zekaria eya Berekia, Berekia eya Ido; ebyo nibyo Zekaria alikubarura ati,

⁸ “Omu kiro kangiire kugira nti mbonekerwa omumalaika akubiire efarasi netukura! Abaire ayemeleire omu miti y'emirama omu ruhanga orufundagataine. Efarasi ezindi: Elikutukura, eya mpuura n'elikwera zibaire zimuli enyuma.

⁹ Aho mbaza nti, ‘Rugaba rwange, ebi biki?’ Omumalaika owo mbaire ninfumora nawe angambira ati, ‘Ninyija kukwoleka ekyo bilikumanyisa.’

¹⁰ Kityo omumalaika ayabaire ayemeleire omu miti y'emirama ahorora ati, ‘Aba nibo Omukama atumire kurambura ensi.’

¹¹ Abantu abo bagambira omumalaika w'Omukama ayabaire ayemeleire omu miti y'emirama bati, ‘Ensi twagirambura, leba echuleire yona.’

¹² Ahanyuma omumalaika w'Omukama agamba ati, ‘Waitu Mukama w'amahe, emyaka egi 70 okanigalira Yerusalemu na Yuda; oraikara otabaganyiire kugoba maki?’

¹³ Omukama agarukamu omumalaika owo nabaire ninfumora nawe, amuhorora n'obufura n'ekisha.

¹⁴ Kityo omumalaika wo nabaire ninfumora nawe angambira ati, ‘Yamuza: Omukama w'amahe nagamba ati: Yerusalemu na Sioni nimbabubira okushagulirana.

¹⁵ Kandi ntamirwe muno amahanga agagoijagiire; aha rw'okuba orwo nabaire ntamirwemu kake abantu bange, amahanga ago gakabongera enaku ezishagiireho.

¹⁶ Aha rw'ekyo Omukama nagamba ati: Yerusalemu nagigarukira n'embabazi; Rwensinga yange nimwo erayombekwa, n'omuguha gw'okugipimisa baragulega gurabire Yerusalemu omwo. Alikugamba Mukama w'amahe.

¹⁷ Oshube oyamuze oti: Omukama w'amahe nagamba ati: Ebigo byange birashuba biramukire kimoi, nshube mpumulize Sioni, kandi nshube ndonke Yerusalemu.’ ”

Omurangi omu kubonekerwakwe nabona amahembe

¹⁸ Kananagiire nti amaisho, omu kubonekerwa kwange okundi mbona amahembe ganai!

¹⁹ Mbaza omumalaika owo nabaire ninfumora nawe nti, “Biki ebi?” Amporora ati, “Aga nigo mahembe aganaganagiire Yuda Isiraeli na Yerusalemu.”

²⁰ Ahanyuma Omukama anyoleka abahesi banai.

²¹ Mubaza nti, “Aba baletwaki?” Amporora ati, “Aga nigo mahembe aganaganagiire Yuda, hakaburwa omuntu ow'okwimukya omutwe. Mbwenu abahesi aba baija kutinisa amahanga agaimukize amahembe gago kurwanisa ensi ya Yuda kugitataamya, n'okutera amahembe ago ahansi.”