Zefania 3 - Ebibulia 2001

Obufu bwa Yerusalemu n'okuchungurwa kwayo

¹ Yerusalemu yagwerwa, ekigo ekishengi mara ekihagare, ekigo ekibonesa abantu bamwo enaku.

² Tikihulira iraka lya Mukama, akihana tikikunda. Tikyesiga Mukama, kandi tikishaba bujuni ahali Ruhanga wakyo.

³ Abakuru bamwo bakyema omunda bakisindika nk'entare; abaramuzi bamwo nibashusha emishega ya bwaigoro, elya etaraizeho kantu.

⁴ Abarangi bamwo bantu ba ndilyo, nibagobeza banu; abakuhani bamwo bahagaza ebitakatifu, bachwa Amateka.

⁵ Omukama akisingiiremu aba murungi, takora kubi. Buli bwankya obutosha akolera abantube amazima, kyonkai omubi takwatwa nshoni.

⁶ Omukama nagamba ati, “Amahanga ngasilikize, ebigo byago by'eboma byakambuka. Embarabara zabyo nzisire, tizikirabwamu muntu. Ebigo by'amahanga bihindukire ndaara, tibinamu muntu, taliho alikubituramu.

⁷ Nkagamba nti, ‘Mazima eihanga lyange lirantina, nte nimbahana nibakunda; ebyo nabaragiire byona tibalibyebwa.’ Kyonkai kandi baba nirwo bashagulirana, bajangukira kimoi.”

⁸ Omukama nagamba ati, “Orw'ekyo mulinde, ekiro ekyo ndimuka nk'omujulizi nkakomeeka amahanga. Namaliliire kuteranisa amahanga n'engoma kuzimaliraho ekiniga, kubabonabonyia limoi limoi. Ensi elisosotoka yona, ezire ekiniga kyange, aha rw'enshonga y'okububira eihanga lyange.

⁹ Ndihindura amahanga bashabe ahali inye nyenkai, tibalishaba ahali baruhanga abandi. Balimpulira bona.

¹⁰ Abantu bange abahweleire omu mahanga, baliruga buseli bw'emiga ya Etiopia bandetere ebihongo.

¹¹ Kiro ekyo timulishonara, aha rw'ebyo mwakozire munshengire; batahi banyu ab'eikuru abekuza ndibaita. Muliba mutakyema aha Ibanga litakatifu kunshenga.

¹² Kuba ndibasigamu abantu abafura ab'obwetohya. Balihungira aha Mukama.

¹³ Abalisigara omuli Isiraeli tibalikora kubi, mara tibaligamba bishuba, kandi tibaligobeza muntu. Baligoshoka bagire emilembe, mara talibaho wa kubatinisa.”

Oruhoya rw'ebyera

¹⁴ Hoya muno inywe bantu ba Sioni; tungika eiraka iwe Isiraeli! Mushemelerwe nimushanduka n'omutima gwona, inywe bantu ba Yerusalemu!

¹⁵ Omukama yalekeire kubabonabonyia, n'ababisha banyu yababingire. Omukama wa Isiraeli, Omukama asingiire omuli inywe; timulishuba kutina kabi kona kona.

¹⁶ Aha kiro kilinya, baligambira Yerusalemu bati, “Iwe Sioni, otatina, otachundwa mikono.

¹⁷ Omukama Ruhanga wawe, asingiire omuli iwe, niwe mwisherukare akurashanira akasinga. Omukama alikushemelerwa akugonze buhya; alikwebuga nahoya n'eiraka lihango,

¹⁸ nk'okwo bagira aha magenyi.” Omukama nagamba ati, “Ndibaihya omu biyengo, kityo baliba batakibikuheza.

¹⁹ Amakiro galija, orwo ndibonabonyia ababonesa banu enaku, nkarokora abalema, n'abazahe nkabagarura omuka. Ndibaihyaho enshoni bakunirwe, ensi yona elibasingiza.

²⁰ Amakiro galija orwo ndibagarura omuka. Amakiro galija orwo ndibateranisa hamoi; mbahe eibara n'ekitinwa omu mahanga gona; mubone okwo nashuba kubagoshora.” Omukama nikwo alikugamba.