Yoshua 9 - Ebibulia 2001

Abagibeoni nibalemba Yoshua

¹ Abakama bona aba buseli bwa Yorudani omu mabanga n'aha muteleka gw'omwegego gw'Enyanja Mpango bwolekera Lebanoni, nibo Abahiti, Abaamoni, Abakanaani, Abaperizi, Abahivi n'Abayebusi kabahuliire ekigambo ekyo,

² bahurura bona hamoi kurashanisa Yoshua na Isiraeli.

³ Kyonkai abanyansi ba Gibea kabahuliire ebyo Yoshua yabaire akozire Yeriko na Ai,

⁴ bonene aha bwabo bashara amagezi. Bagenda batekateka embanda, bakwata egunia zikuru bazita aha ndogobe zabo n'enfulebe z'edivai ezakuzire mara zitagukire kandi zishoneleire.

⁵ Omu maguru bajwara enkaito zihwelire mara ziteire ebiraka, batamu emyendo mikuru kandi entanda zabo zona zomangaine mara zihumpire.

⁶ Bagoba Yoshua omu rusisira omuli Giligali, bamugambira n'Abaisiraeli bati, “Twaruga ensi y'aharai; mbwenu tukore endagano na inywe.”

⁷ Kyonkai Abaisiraeli bagambira Abahivi bati, “Shana nimutura haihi mutwataine, aho twakukora tutai endagano na inywe?”

⁸ Bagambira Yoshua bati, “Ichwe tuli bairu bawe.” Yoshua ababaza ati, “Muli bahai, mara mwaruga nkahai?”

⁹ Bamuhorora bati, “Ichwe abairu bawe twaruga harai muno, aha rw'enshonga y'eibara ly'Omukama Ruhanga wawe. Twahuliire amakuruge na byona ebyo yakozire Misiri;

¹⁰ n'abakama babili b'Abaamori aba buseli bwa Yorudani: Sihoni omukama wa Heshiboni na Ogi omukama wa Bashani abaturaga Ashitaloti.

¹¹ Abagurusi baitu n'abanyansi baitu bona batugambiire bati, ‘Mukwate entanda mugende mubabuganganwe’, mubagambire muti, ‘Tuli bairu banyu, mbwenu tukore hamoi endagano.’

¹² Emikate egi ntanda yaitu, tukaruga nayo omuka ekyatagata orwo twaimukize kwija kunu, kyonkai mbwenu leba yahumpire, n'okwomangana yayomangaine.

¹³ Kandi ezi enfulebe z'edivai zikaba zili zihya orwo twazijwize, leba zatobokire. Emyendo egi n'enkaito zaitu bitagukire aha rw'orugendo rurai muno.”

¹⁴ Kityo Isiraeli balya entanda z'Abahivi abo batabalize Mukama k'abahabura.

¹⁵ Yoshua akundangana nabo, akora endagano kutabaita; n'abatwazi b'embaga babanahilira.

¹⁶ Kababaire bamazire ebiro bishatu bakozire nabo endagano, bahulira okwo babaire bali batani babo nibabatura haihi.

¹⁷ Abaisiraeli baimukya, bagoba ebigo byabo aha kiro kya kashatu. Ebigo ebyo ni Gibeoni, Kefira, Beroti na Kiriatiyearimu.

¹⁸ Abaisiraeli tibabaisire aha rw'okuba abatwazi b'embaga bhakaba babanahilire obuso bw'Omukama Ruhanga wa Isiraeli. Aho embaga yona eyeboroboitera abatwazi abo.

¹⁹ Kyonkai abatwazi bona bagambira embaga bati, “Ichwe tubanahiliire obuso bw'Omukama Ruhanga wa Isiraeli, mbwenu aho titushobora kubakoraho.

²⁰ Ekyo turabakora niky'eki: Tutabaita, Omukama ataija akatunigalira aha rw'enshonga y'ekinahiro ekyo tubanahiliire.”

²¹ Kandi bashuba babagambira bati, “Mutabaita.” Kityo Abahivi bata nibashenyera Abaisiraeli bona enkwi n'okubatahira amaizi nk'okwo abatwazi babagambire.

²² Yoshua abeta ababaza ati, “Mutubeiyeireki muti, ‘Ichwe tubali harai muno,’ okwo mutwataine?

²³ Mbwenu aha rw'ekyo mwaraamwa, n'abandi muliikara muli bairu, mutahire Rwensinga ya Ruhanga wange amaizi mugishenyere n'enkwi.”

²⁴ Bamuhorora bati, “Okukora tutyo ichwe abairu bawe bakatugambira emalimali okwo Omukama Ruhanga wawe yabaire aragiire omwiruwe Musa kubaha ensi egi yona, n'abanyansi bamwo kubasilikya. Aha rw'ekyo tubatinire mutatwita. Nikwo kugira tutyo.

²⁵ Mbwenu leba tuli omu mikono yawe, otukore okwo orayenda.”

²⁶ Kyonkai Yoshua abaihya omu mikono y'Abaisiraeli tibabaisire.

²⁷ Kyonkai kir'ekyo Yoshua abaragira kuta nibashenyera embaga enkwi n'okugitahira amaizi; kandi kutahira na ealutare y'Omukama amaizi n'okugishenyera enkwi mbali eli, aho Omukama yaronzire kuba niho afukamirwa. Na kir'eki emilimo egyo nibagikora.