Yoshua 8 - Ebibulia 2001

Okukwatwa n'okusilika kwa Ai

¹ Omukama agambira Yoshua ati, “Otatiina mara otahwahwana. Okwate abaisherukare bona, oimukye ogye Ai. Omukama wa Ai namunaga omu mikono yawe, n'abantube, n'ekigo n'ensiye.

² Okore Ai n'omukama wayo nk'okwo wakozire Yeriko n'omukama wayo. Shana eminyago y'ekigo ekyo n'ebitunganwa bibulimu mugitware. Ekigo mukizimbire mukyemire enyuma.”

³ Aho Yoshua aimukya n'abaisherukare bona agya Ai. Aronda abaisherukare emanzi 30,000 abatweka omu kiro.

⁴ Abaragira ati, “Inywe muhunire ekigo mukyemire enyuma, mutakigya harai muno kandi inywena mwikare mwetekatekire,

⁵ Inye n'abantu bona abo nyinabo turagoba aha kigo. Kabarashohora kututera nk'orwa mbere turabairuka.

⁶ Turabaihya omu kigo batuhondere kuba nibaija kugamba bati, ‘Batwiruka nk'orwa mbere.’ Kityo turabairuka,

⁷ aho mwimuke mbali muraba muhunire, mukwate ekigo Omukama Ruhanga wanyu arakinaga omu mikono yanyu.

⁸ Kamuramara kukikwata, mukichumike omuliro nimukora nk'okwo Omukama yaragira; nanye nikwo ndikubaragira.”

⁹ Aha rw'ekyo Yoshua abaragira kugya omu maisho, bagya mbali barazimba, barara omugati ya Beteli na Ai obugwaizoba bwa Ai. Kyonkai kir'ekyo Yoshua arara omu mbaga.

¹⁰ Yoshua aimuka bwankya karai, ahuruza embaga, agyebembera n'abagurusi ba Isiraeli bagiire Ai.

¹¹ Abaisherukare abo yabaire ainabo batemba, bagoba ekigo omu maisho, basisira rubaru orwa bikara bya Ai. Omugati yabo n'ekigo hakaba halimu oruhanga.

¹² Yoshua akwata abaisherukare 5,000 abateeka, abaragira kuzimba omugati ya Beteli na Ai bwolekera obugwaizoba bw'ekigo.

¹³ Aho bateka eihe lyona elyabaire lili rubaju orwa bikara by'ekigo n'abalinzi ab'enyuma ababaire bali obugwaizoba bw'ekigo ekyo. Kyonkai kir'ekyo Yoshua arara omu ruhanga.

¹⁴ Omukama wa Ai kayaboine byaba bityo wenene n'embagaye yona y'abanyakigo barahuka, bagenda karai aha busoka obwolekeraine na Araba, kukwatangana na Isiraeli omu ndashana, kyonkai tiyamanyire okwo haliho abamuzimbiire enyuma y'ekigo.

¹⁵ Yoshua na Isiraeli yona beshushanisa abalikusingwa, bairuka batwetwe ogw'eirungu.

¹⁶ Nikwo abantu bona ababaire bali omu kigo bahurura kubabinga. Babinga Yoshua babaihya aha kigo.

¹⁷ Taliho muntu yasigaire mu kigo kya Ai anga Beteli, atashohoire kubinga Isiraeli. Basiga ekigo kirangaire.

¹⁸ Aho Omukama agabira Yoshua ati, “Imukya eichumu ely'okwete olyolekeze Ai, enshonga ninyija kugikunaga omu mikono.” Yoshua aimukya eichumu elyo yabaire akwete alyolekeize ekigo.

¹⁹ Ababaire bahunire bajumbuka mbali babaire bali. Kayaimukize ati omukono bairuka, bataha omu kigo bakibunda. Barahuka bakichumika omuliro.

²⁰ Aho abantu ba Ai kabakebukire babona omwika gw'ekigo kilikuhya niguchunkera aha iguru; baburwa obwirukiro, aha rw'okuba abantu ababaire bairukire omw'irungu nabo bakakubuka babinga abo ababaire bababingire.

²¹ Yoshua na Isiraeli yona kababoine abahunire okwo bakwata ekigo n'okwo omwika gw'ekigo kilikuhya gulikuchunka, bahinduka baita abantu ba Ai.

²² Abaisiraeli abandi baruga omu kigo kubatera; batanga aba Ai embaju zona. Babaita bona, taliho yahungire n'omoi.

²³ Kyonkai omukama wa Ai bamukwata obunyangaro bamuletera Yoshua.

²⁴ Abaisiraeli kabamazire kwita abanyansi bona ba Ai omu kangaratete k'eirungu mbali babaire bababingire bagaruka Ai. Bona aba Ai kuhika ow'enzindo bakaitwa embanda.

²⁵ Kir'ekyo abafire bona omuli Ai abashaija n'abakazi bakagoba 12,000.

²⁶ Yoshua orwo yaimukize eichumu tiyagwisize mukono, kuhika orwo yabaisire hakabamaraho.

²⁷ Ebitunganwa byonkai n'eminyago y'ekigo nibyo Abaisiraeli batwete nk'okwo Omukama yabaire aragiire Yoshua.

²⁸ Aho Yoshua ayokya Ai, agihindura ndaara, esigara amatongo ebiro byona na mambwenu.

²⁹ Ahanika omukama wa Ai aha muti kugoba bwaigoro. Kalyaizire kutobera Yoshua aragira kabahanantura omutumbigwe bakagunaga aha kihigi ky'ekigo omu kishasi. Bagutumaho entumiro mpango y'amabare gakyabaho na kir'eki.

Amateka nigashomwa aha Ibanga lya Ebali

³⁰ Yoshua ayombekera Omukama Ruhanga wa Isiraeli ealutare aha Ibanga lya Ebali.

³¹ Nikwo na Musa omwiru w'Omukama yabaire aragiire Abaisiraeli N'omu Kitabo ky'Amateka ga Musa kikahandikwa kiti, “Altare y'amabare ag'omuntu atagobizeho kikwato kya kyoma.” Bagihongeraho Omukama ebihongo by'okwokibwa, batamba n'ebihongo by'emilembe.

³² Aho honene omu maisho g'Abaisiraeli, Yoshua ahandika aha amabare ekopi y'aMateka ga Musa ago wenene Musa yabaire ahandikire.

³³ Isiraeli yona, omufuruki n'omuzarwa kumoi, n'abagurusi babo n'abakuru, n'abaramuzi babo, bemelera embaju zombili z'Esanduku y'Endagano omu maisho g'abakuhani Abalevita ababaire bagishutwire. Enusu bemelera omu maisho g'Eibanga lya Gerizimu n'enusu omu maisho g'Eibanga lya Ebali nk'okwo Musa omwiru w'Omukama yabaire aragiire obubere abakuhani abo kuha Abaisiraeli omugisha.

³⁴ Ahanyuma ashoma Amateka gona: Omugisha n'omuraamo bibulimu, nk'okwo byahandikirwe omu Kitabo ky'Amateka.

³⁵ Taliho kigambo na kimoi ahali byona ebyo Musa yaragiire ebyo Yoshua atashomeire nteko yona ya Isiraeli, abakazi, abana nangu n'abafuruki bona abaturagamu.