Yoshua 7 - Ebibulia 2001

Obufu bwa Akani

¹ Abaisiraeli tibagizire bwesigwa aha bintu ebyabaire bihongirwe. Akani eya Karimi, Karimi eya Zabudi Zabudi eya Zera ow'oruganda rwa Yuda, aina ebyo yaihireho. Omukama anigalira muno Isiraeli.

² Yoshua ayema Yeriko atuma abantu Ai. Ai kigo ekyataine Betiaveni, oburugaizoba bwa Beteli. Abagambira ati, “Mugende munyomoize ensi.” Abantu abo bagenda banyomoza Ai.

³ Bagaruka ahali Yoshua, bamugambira bati, “Abaisherukare batagenda bona, shana nka 2,000 anga 3,000 bonkai babe nibo bagenda bakatera Ai. Otatwekayo bona kubalemesa bushai, kuba namwo abantu bamwo bake.”

⁴ Abaisherukare nka 3,000 bagyayo, kyonkai aba Ai babasinga.

⁵ Baitaho abantu makumi gashatu na mukaga, bababinga kwema aha kihigi babagobya Shebarimu, babatemera aha busoka; Abaisiraeli bahukuka emitima.

⁶ Aho Yoshua atagura emyendoye, ajumara ahansi omu maisho g'Esanduku y'Omukama kugoba bwaigoro, hamoi n'abagurusi ba Isiraeli. Betuumulira echuchu aha mitwe.

⁷ Yoshua agamba ati, “Yo, waitu Mukama Ruhanga, oshaabuliireki abantu aba Yorudani kutunaga omu mikono y'Abaamori kutusilikya? Kyakumazire katwakutwire buseli bwa Yorudani!

⁸ Waitu Mukama, ngambeki orwo Abaisiraeli bairuka ababisha babo bhakabatera emigongo?

⁹ Abakanaani n'abanyansi bamwo bona nibaija kuhulira ekigambo eki batuzingore, batusilikye batumare omu nsi. Orakoraki kulinda ekitinwa kyawe ekikuru kityo?”

¹⁰ Omukama agambira Yoshua ati, “Imuka! Kubaki wajumara ahansi oti?

¹¹ Abaisiraeli bafakaire bachwa endagano yange eyo nabaragiire. Batwete ebihongo, baiba mara babeiya, babiteranisize n'ebyabo.

¹² Aha rw'ekyo tibashobora kusinga babisha babo. Nibabairuka aha rw'okuba babaire b'okusilika. Tingendelere kwikara na inywe eminyago eyo mwinayo kamutagitambire kitambo kya kwokibwa.

¹³ Imuka ohasilire embaga mara ogambe oti, ‘Mweshemeze aha rwa bukeire Omukama Ruhanga wa Isiraeli nagamba ati, “Halimu Abaisiraeli abaina eminyago ehongirwe, kityo timushobora kusinga babisha banyu kuhika orwo murataishura eminyago egyo eyo mwinayo.”

¹⁴ Aha rw'ekyo bwankya babalete kuhonderana n'enganda zanyu. Oruganda orw'Omukama ararondamu rwije omu maisho kuhonderana n'ebika byarwo. N'ekika eky'ararondamu kije omu maisho kuhonderana n'amaka okwo gali. Eka eyo ararondamu eije omu maisho, ab'eka egyo baije nibahonderana.

¹⁵ Omuntu arakwatwa aina eminyago etangirwe bamwokye, n'eby'ainabyo byona aha rw'okuba achwire endagano y'Omukama, mara akozire eihano yagora Isiraeli.’ ”

¹⁶ Kityo Yoshua aimuka bwankya karai, ahuruza Isiraeli oruganda aha rundi; oruganda rwa Yuda rukwatwa.

¹⁷ Ayeta ebika byarwo, ekika ky'Abazera kikwatwa. Ayeta ekika ky'Abazera omuntu ah'ondijo, Zabudi akwatwa.

¹⁸ Ayeta omutungogwe omuntu ah'ondijo, Akani eya Karimi, Karimi eya Zabudi, Zabudi eya Zera ow'oruganda rwa Yuda akwatwa.

¹⁹ Aho Yoshua agambira Akani ati, “Mwana wange, ohe Omukama Ruhanga wa Isiraeli ekitinwa omuhaisilize, mara aha ongambire eky'okozire, otakinshereka.”

²⁰ Akani amuhorora ati, “Eky'amazima, inye nfakaliire Omukama Ruhanga wa Isiraeli; mara ekyo nkozire niky'eki:

²¹ Kamboine omu minyago ebebo nungi eya Babiloni n'ekilo nka ibili z'efeza n'omuti gw'ezahabu nk'enusu kilo nabyegomba nabitwara. Mbishelekire omw'itaka omwange omw'ihema. Efeza eli ahansi yabyo.”

²² Yoshua atuma entumwa ziruka zigiire omw'ihema, zishanga okwo ebebo agishelekirekwo mwonene.

²³ Babiihyamu babimutwalira omu maisho g'Abaisiraeli bona. Babihumuza ahansi omu maisho g'Omukama.

²⁴ Aho Yoshua na Isiraeli yona bakwata Akani eya Zera, n'efeza, n'ebebo, n'omuti gw'ezahabu n'abatabani n'abahara, n'enteze, n'endogobe n'entaama, n'eihemalye n'ebindi byona ebyo yabaire ainabyo, babatwara omu Ruhanga rwa Akori.

²⁵ Yoshua amubaza ati, “Kubaki otwisire kubi? Kir'eki Omukama nakubonesa enaku.” Isiraeli yona emuteza amabare, n'aba wenene babokya n'omuliro.

²⁶ Bamutuumaho entuumo mpango y'amabare ekyaliho na kir'eki. Aho Omukama ahwa ekinigakye ekingi. Aha rw'ekyo kuhika mwaha omwanya ogwo gwetwa Ruhanga rwa Akori.