Yoshua 6 - Ebibulia 2001

Okusingwa kwa Yeriko

¹ Yeriko yaikaraga ekingirwe omunda n'aheru kutanga Abaisiraeli. Taliho yashohoraga anga kutahamu.

² Omukama agambira Yoshua ati, “Leba, Yeriko naginaga omu mikono yawe, omukama wayo n'abaisherukare emanzi.

³ Abashaija inywena muzingore ekigo omurundi gumoi. Mugire mutyo ebiro mukaga.

⁴ Abakuhani mushanju bakwate amakondere mushanju g'amahembe g'empaya z'entaama bebembere Esanduku. Aha kiro kya mushanju muzingore ekigo emirundi mushanju, abakuhani nibatera amakondere.

⁵ Orwo baratera eikondere ly'eihembe ly'empaya y'entaama orurai, mukahulira okwo lyataga, aho abantu bona batemu orusharo rw'amani, eboma y'ekigo eshesheke ahansi, kandi buli mwisherukale ayasize mbali araba ali atahe omu kigo.”

⁶ Kityo Yoshua eya Nuni ayeta abakuhani abagambira ati, “Mushuture Esanduku y'Endagano, abakuhani mushanju bakwate amakondere g'amahembe g'empaya z'entaama, bebembere Esanduku y'Omukama.”

⁷ Ashuba ati, “Mugye omu maisho muzingore ekigo, kandi abaisherukare n'ebikwato byabo by'endashana bahingure bebembere Esanduku y'Omukama.”

⁸ Orwo Yoshua yamazire ati kuragira atyo embaga, abakuhani mushanju abaina amakondere mushanju g'amahembe g'empaya z'entaama bebembera Esanduku y'Omukama nibatera amakondere, Esanduku ebahondeire.

⁹ Abaisherukare n'ebikwato byabo by'endashana bagenda bebembeire abakuhani ababaire nibatera amakondere ago, kandi abalinzi b'enyuma baija bahondeire Esanduku, oku amakondere nigajuga.

¹⁰ Kyonkai Yoshua aragira embaga ati, “Mutaashana kandi amaraka ganyu gatahulirwa; ekigambo kitabaruga mu kanwa, kuhika ekiro ekyo ndabagambira kutamu orusharo, aho nirwo murayashana.”

¹¹ Abaragira kuzingora Esanduku y'Omukama mara kugizingoza ekigo omurundi gumoi. Bataha omu rusisira bararamu.

¹² Aho Yoshua aimuka bwankya karai, abakuhani bashutura Esanduku y'Omukama.

¹³ Abakuhani mushanju bakwete amakondere mushanju g'amahembe g'empaya z'entaama bebembera Esanduku y'Omukama bagenda nibatera amakondere obutaleka. Abakwete ebikwato by'endashana bagenda babebembeire; abalinzi ab'enyuma bagenda bahondeire Esanduku y'Omukama, aho amakondere nigajuga obutaleka.

¹⁴ Aha kiro kya kabili bazingora ekigo omurundi gumoi, bagaruka omu rusisira. Nikwo bagizire batyo ebiro mukaga.

¹⁵ Aha kiro kya mushanju baimuka karai omu mambya, bazingora ekigo omu migilire yonene yonene emirundi mushanju. Ni kir'ekyo kyonkai orwo bazingore ekigo emirundi mushanju.

¹⁶ Omurundi gwa mushanju abakuhani kabamazire kutera amakondere, Yoshua agambira embaga ati, “Tamu orusharo, aha rw'okuba Omukama yabatunga ekigo.

¹⁷ Ekigo n'eminyago yona ely'omwo mugihongere Omukama ekitambo ky'okwokibwa; Rahabu wenkai omumalaya n'ab'ainabo omwe bona nibo bararokoka aha rw'okuba akasheleka entumwa ezo twabaire tutumire.

¹⁸ Kyonkai mwelinde eminyago ey'okuhongera Omukama ekihongo ky'okwokibwa, mutaija mukashangwa mwagihongire mukagira eyo mwaihyaho mukaletera Isiraeli enaku omu rusisira ekasilika.

¹⁹ Kyonkai ebikwato byona eby'efeza n'eby'ezahabu, n'eby'omulinga n'eby'ekyoma, ebyo bitakatifu by'okuhongera Omukama. Bibiikwe omuli buhanika y'Omukama.”

²⁰ Aho embaga etamu orusharo, amakondere gajuga. Abantu kuhulira bati amakondere batamu orusharo ruhango, eboma eshesheka ahansi, abaisherukare buli omoi ayasiza mbali yashangirwe ali, bataha omu kigo bakikwata.

²¹ Basilikya kimoi kimoi byona ebyabaire bili omu kigo, abashaija n'abakazi, abato n'abakuru, ente, entaama n'endogobe; babasilikisa obwogi bw'embanda.

²² Yoshua agambira abashaija ababili ababaire banyomoize ensi egyo ati, “Mutahe omw'omumalaya, mwihyemu omukazi ogwo n'abe bona nk'okwo mwamunahiliire.”

²³ Kityo batahamu, baihyamu Rahabu na ishe na nyina na banyanya n'abandi abe bona; babateka aha rusisira rwa Isiraeli.

²⁴ Bokya ekigo na byona ebyabaire bikilimu, shana ebikwato by'efeza n'eby'ezahabu, n'eby'omulinga n'eby'ekyoma. Ebyo babita buhanika omw'Omukama.

²⁵ Yoshua arokora Rahabu omumalaya n'eka ya ishe n'abaabo bona. Rahabu atura Isiraeli kuhika kir'eki, ahakuba akasheleka entumwa ezo Yoshua yabaire atumire kunyomoiza Yeriko.

²⁶ Omu biro ebyo Yoshua arahira ati, “Alyombeka buhya ekigo eki kya Yeriko Omukama nakamuraame. Kugya kutaho ekitebe kyakyo, alitamba omuzigaijogwe. Kugya kukitamu ebihigi, alitamba mainukage.”

²⁷ Kityo Omukama aba na Yoshua, eiranga lya Yoshua ligoba ensi yona.