Yoshua 24 - Ebibulia 2001

Yoshua nagamba n'abantu ahali Shekemu

¹ Yoshua ahuruza enganda zona za Isiraeli, azihikanisiza Shekemu. Ayeta abagurusi, abakuru b'enganda, abaramuzi n'abakuru ba Isiraeli, baija omu maisho ga Ruhanga.

² Yoshua agambira abantu bona ati, “Omukama Ruhanga wa Isiraeli nagamba ati, ‘Baisheinywe orwa mbere baturaga buseli bwa Efurati: Tera ishe Aburahamu na Nahori; kandi bakoleraga baruhanga abandi.

³ Aho isheinywe Aburahamu mwihya buseli bw'Omwiga, murabya omu nsi yona ya Kanaani, muha n'oruzaro rungi. Muha Isaka;

⁴ kandi Isaka muha Yakobo na Esau. Esau muha ensi y'amabanga ga Seiri, kyonkai Yakobo n'abanabe bagya Misiri.

⁵ Aho ntuma Musa na Aroni, nteza Misiri ebibundo ebyo nakoziremu, ahanyuma inywe mbaihyayo.

⁶ Baisheinywe mbaihya Misiri, bagoba aha Nyanja. Abamisiri baija babingire baisheinywe n'amagali n'ab'efarasi babagobya aha Nyanja Rutuku.

⁷ Kabantakiire, omugati yabo n'ababisha babo ntamu omwilima, nabamiza enyanja, yababunda. Ebyo nakozire Misiri nimubimanya. Mwatura omw'irungu ebiro bingi.

⁸ Aho nabaleta omu nsi y'Abaamori, abaturaga buseli bunu bwa Yorudani. Barashana na inywe, mara mbanaga omu mikono yanyu, mulya ensi yabo, mbasilikya orwo mulikugitahamu.

⁹ Balaki eya Sipori, omukama wa Moabu, aimuka arashanisa Isiraeli. Atumaho Balaamu eya Beori kubaraama;

¹⁰ kyonkai Balaamu tinamwikiliize; aha rw'ekyo yabaha omugisha, kityo nabaihya omu mikonoye.

¹¹ Mwashabuka Yorudani, mwaija Yeriko; abantu ba Yeriko babarashanisa. Abaamori, Abaperizi, Abakanaani, Abahiti, Abagirigashi, Abahivi n'Abayebusi nabanaga omu mikono yanyu.

¹² Orwo mulikutaha Kanaani nasindikamu enwa zabingamu abakama bombili b'Abaamori. Timwababingisize mbanda anga buta.

¹³ Nkabaha ensi eyo mutachwazikiire, n'ebigo ebyo mutayombekire mwabituramu. Nimulya ezabibu z'emizabibu eyo mutabyaire, n'ezeituni z'emiti eyo mutalimire.’ ”

¹⁴ “Mbwenu aha rw'ekyo mutine Omukama, mumukolere n'obwesigwa n'amazima. Munage baruhanga abo bashw'enkurw'inywe bafukamiraga Mesopotamia na Misiri; mukolere Omukama wenkai.

¹⁵ Kamutalikwenda kumukolera, kir'eki muronde owo murakolera: Baruhanga abo bashw'enkurw'inywe bafukamiraga Mesopotamia, anga baruhanga b'Abaamori abo mulikutura omu nsi yabo. Kyonkai inye omu bwange n'eka yange, turakolera Omukama.”

¹⁶ Ahanyuma embaga emuhorora eti, “Nikikabure ichwe kusigaho Omukama kufukamira baruhanga abandi,

¹⁷ aha rw'okuba Omukama Ruhanga waitu niwe yatwihire Misiri na batat'enkurw'ichwe omu bwiru. Amahano g'amaani ago yakozire tukagabona. Yatulinda omu rugendo rwona orwo twakagenzire, n'omu mahanga gona ago twakarabiremu.

¹⁸ Akabinga amahanga gona tulebire, n'Abaamori abaturaga omu nsi egi. Aha rw'ekyo naichwe kwakwo turakolera Omukama kuba ni Ruhanga waitu.”

¹⁹ Kyonkai Yoshua agambira embaga ati, “Haliho orwo mutashobore kukolera Mukama, aha rw'okuba wenene ni Ruhanga Omutakatifu, Ruhanga aina eibuba, atabagarulire ntambara anga mafu ganyu.

²⁰ Kamulikumusigaho mukakolera baruhanga ab'abanyamahanga, nawe arabahinduka ababonabonyie abasilikye, okwo yabakoleire ebirungi.”

²¹ Abantu bagambira Yoshua bati, “Chei, turakolera Omukama.”

²² Yoshua abagambira ati, “Kyaruga kanwa kanyu okwo mwarondaho Omukama kumukolera.” Bagamba bati, “Kyaruga omu kanwa kaitu.”

²³ Yoshua abagambira ati, “Aho munage baruhanga abanyamahanga abo mwinabo, omutima gwanyu mugwolekeze Omukama Ruhanga wa Isiraeli.”

²⁴ Abantu bamugambira bati, “Omukama Ruhanga waitu n'iwe turakolera, turamuhulira.”

²⁵ Kityo kir'ekyo Yoshua akora endagano n'embaga, abateraho ebiragiro n'emigenzo ahali Shekemu.

²⁶ Ahandika ebigambo ebi omu Kitabo ky'Amateka ga Ruhanga. Akwata eibare lihango alisimba ahansi y'omwaloni haihi n'ahatakatifu h'Omukama.

²⁷ Ashuba agambira abantu bona ati, “Leba eibare eli lilitujulira, aha rw'okuba lyahulira ebigambo byona eby'Omukama yatugambira. Aha rw'ekyo Ruhanga wanyu kamulimwetonga alibakomeeka.”

²⁸ Kityo Yoshua arazage embaga, buli muntu agaruka omu busikabwe.

²⁹ Ebyo kabyahoire, Yoshua eya Nuni, omwiru w'Omukama, afa aina emyaka 110.

³⁰ Bamuziika omu busikabwe omuli Timunatisera, omu mabanga ga Efuraimu, bikara by'eibanga lya Gaashi.

³¹ Abaisiraeli bakolera Omukama ebiro byona bya Yoshua n'ebiro byona eby'abagurusi abatwireho kushaga Yoshua, ababoine byona eby'Omukama yakoleire Abaisiraeli.

³² Amagufa ga Yozefu ago Abaisiraeli baihire Misiri gakaziikwa Shekemu omu nsi eyo Yakobo yaguzire ahali batabani ba Hamori ishe Shekemu ebichweka 100 by'efeza. Ensi egyo ekasikwa baijukuru ba Yozefu.

³³ Eleazari mutabani wa Aroni afa, bamuziika Gibea omu mabanga ga Efuraimu, omu kigo ekyo babaire bahaire Finehasi omutabani.