Yoshua 23 - Ebibulia 2001

Ehotuba ya Yoshua narazage embaga

¹ Ebiro kabyabaire byahingwire bingi orwo Omukama yabaire yahaire Abaisiraeli emilembe batakirashana na babisha babo ababaire babataine, Yoshua akura agurusha.

² Ayeta Isiraeli yona: Abagurusi abebembezi, abaramuzi n'abakuru babo, abagambira ati, “Mbwenu nakura nagurusha.

³ Kandi mukabona byona eby'Omukama Ruhanga wanyu yakoleire amahanga aga gona aha rwanyu, kuba n'iwe yabarashaniraga.

⁴ Amahanga agakyasigaire munu ensi zago nzishondeire enganda zanyu obusika, kumoi n'ensi z'amahanga ago nasingire kwema Yorudani oburugaizoba kugoba aha Nyanja Mpango ya Mediterania obugwaizoba.

⁵ Omukama Ruhanga wanyu alisinga ababisha banyu babairuke, mulye ensi yabo, nk'okwo yabaraganisize!

⁶ Aha rw'ekyo mugume muno, mukwate mara mukore byona ebihandikirwe omu Mateka ga Musa. Amateka ago mutaliziza kugashobya.

⁷ Amahanga aga agakyasigaire munu mutalyetaba nago orwo mulikutura nago. Baruhanga babo mutalibagamba mabara anga kunahira buso bwabo, anga kubakolera, anga kubafukamira.

⁸ Ekikuru mwekwate Omukama Ruhanga wanyu nk'okwo mukakora na kir'eki.

⁹ Aha rw'okuba Omukama akabinga amahanga gahango againa amani, kandi taliho muntu yashoboire kukwatangana na inywe na mambwenu.

¹⁰ Omuntu omoi alibinga abantu 1,000, aha rw'enshonga Omukama Ruhanga wanyu n'iwe abarashanira nk'okwo yabaraganisize.

¹¹ Aha rw'ekyo mwelinde muno mugonze Omukama Ruhanga wanyu.

¹² Kamwakushuba enyuma mukaterana n'ensigalira z'amahanga aga agakyabasigairemu, mukasiigirana nago, mukashemera na bakazi babo na bonene bakashemera n'abanyu,

¹³ mumanyire kimoi okwo Omukama Ruhanga wanyu ataligendelera kubinga mahanga mu nsi yanyu. Galibahindukira mutego, gababere mbarashuka, gahinduke nkoni y'okubatera embaju, gabe mahwa g'okubakoza omu maisho, mulemwe musilike omu nsi nungi egi ey'Omukama Ruhanga wanyu abatungire.”

¹⁴ “Mbwenu akanya kagoba, naija kufa nk'abandi bona. Inywena buli omoi namanya aha mutima n'omu mwoyo okwo Omukama Ruhanga wanyu abatungire ebirungi byona ebyo yabaraganisize; bigobeleire byona ahali inywe, taliho na kimo ekibuzireho.

¹⁵ Nk'okwo ebirungi byona eby'Omukama Ruhanga wanyu yabaraganisize bigobeleire ahali inywe, nikwo alibateza enaku zona hakabasilikya omu nsi nungi egi eyo yabatungire

¹⁶ kamulichwa endaganoye eyo yabahangiire, mukagenda mukakolera baruhanga abandi, mukabafukamira nirwo alibanigalira muno, mukasilika bwangu omu nsi nungi eyo abatungire.”