Yoshua 22 - Ebibulia 2001

Yoshua nagarurayo enganda z'oburugaizoba

¹ Yoshua ayeta Abarubeni n'Abagadi n'enusu y'oruganda rwa Manase,

² abagambira ati, “Mukwete byona ebyo Musa omwiru w'Omukama yabaragiire, nanye ebyo mbaragira mumpulire.

³ Ebiro byona ebi timukataishukaine na barumuna banyu Abaisiraeli. Emihango y'Omukama Ruhanga wanyu nimugigobesheleza n'obwegendeleza,

⁴ mara ahaire barumuna banyu abo emilembe nk'okwo abaraganisize. Aha rw'ekyo mushube owanyu omu nsi eyo Musa omwiru w'Omukama yabahaire buseli bwa Yorudani, nigwo mushondo gwanyu.

⁵ Mwegendeleze kugobesheleza emihango n'Amateka ebyo Musa omwiru w'Omukama yabaragiire, kugonza Omukama Ruhanga wanyu n'okukora eby'arayenda. Mumwekwate, mumukolere n'omutima gwanyu gwona n'omwoyo gwanyu gwona.”

⁶ Yoshua abaha omugisha abarazage. Bagya omu maka gabo.

⁷ Enusu y'oruganda rwa Manase Musa hakaba abahaire omugabo omuli Bashani. Kandi enusu endijo Yoshua hakaba abahaire omugabo yabatanisa na barumuna babo buseli bwa Yorudani obugwaizoba. Ka Yoshua yabaraizege kugya omu maka gabo, abaha omugisha

⁸ abagambira ati, “Mushube omu maka ganyu n'eitunga lingi, n'ebitunganwa bingi muno, efeza, ezahabu, omulinga, ekyoma n'ebijwaro bingi. Eminyago y'ababisha banyu mugibegane na barumuna banyu.”

⁹ Kityo Abarubeni n'Abagadi n'enusu y'oruganda rwa Manase bagaruka omu maka gabo. Bataishukana n'Abaisiraeli ahali Shilo omu nsi ya Kanaani bagya Gileadi, ensi yabo eyo baliire nk'okwo Omukama yabaire ahangire omu kanwa ka Musa.

Alutare omuli Yorudani

¹⁰ Kabagobire bwatana Yorudani omuli Kanaani, Abarubeni n'Abagadi n'enusu y'oruganda rwa Manase bombekaho ealutare mpango.

¹¹ Abaisiraeli abandi bahulira nibagamba bati, “Abarubeni n'Abagadi n'enusu y'oruganda rwa Manase bombekire ealutare bwatana Yorudani owaitu Kanaani.”

¹² Kuhulira batyo, enteko yona y'Abaisiraeli ehurulira Shilo kugya kubatabalira.

¹³ Aho Abaisiraeli batuma Finehasi mutabani wa Eleazari omukuhani, aha Barubeni n'Abagadi n'enusu y'oruganda rwa Manase omuli Gileadi.

¹⁴ Agendaho n'abatwazi ikumi, omoi kuruga buli ihiga omu nganda za Isiraeli, nibo bagurusi b'amahiga ago.

¹⁵ Bagoba Abarubeni n'Abagadi n'enusu y'oruganda rwa Manase omuli Gileadi, bafumora nabo bati,

¹⁶ “Enteko yona y'Omukama nebaza eti, ‘Mukozire ihanoki ahali Ruhanga wa Isiraeli? Orwo mwombekire ealutare mushengire Omukama. Timukili ba wenene.

¹⁷ Obufu obwo twakozire tuli Peori nibumara. Leba n'enyatano titukagigizire. Mara enteko yaitu Omukama akagiteza ekibundo.

¹⁸ Mbwenu Omukama timukimuliho? Mara kamulikumushenga kir'eki, bukeire nanigalira enteko yona ya Isiraeli.

¹⁹ K'ensi yanyu eraba ehagaire mutalikushobora kufukamiramu, mukwate omuhanda mwije mbali eihemalye lili. Mutwenze ensi, nawe mutashenga Mukama anga kutuhinduka kwombeka ealutare okwo ealutare y'Omukama Ruhanga waitu eliho.

²⁰ Akani mutabani wa Zera akafakara yatwara eminyago eyabaire eragiirwe kusilikibwa, aho Omukama yagilira enteko yona ya Isiraeli ekiniga. Akani tiyafire wenkai aha rw'obufubwe obwo?’ ”

²¹ Aho Abarubeni n'Abagadi n'enusu y'oruganda rwa Manase bahorora abagurusi b'enganda za Isiraeli bati,

²² “Ruhanga Rushoborabyona, Ruhanga Omukama! Rushoborabyona Ruhanga Omukama! Namanya, na Isiraeli nayo emanye. Kakuraba kuli kushenga anga kuburwa okwesiga aha Mukama, mutwite.

²³ Katuraba tubuzirwe omuhuliro aha Mukama tukombeka ealutare eyaitu kugyokezaho ebitambo anga kugihongaho emyaka anga ebihongo by'emilembe, Omukama wenene atwehoroze.

²⁴ Chei, tubikozibwe obutini. Twagira tuti biro ebilija baijukuru banyu baligambira baijukuru baitu bati, ‘Inywe nimushasibwaki aha Mukama Ruhanga wa Isiraeli?

²⁵ Manya Yorudani niyo yahindwire rubibi kututaishurana na inywe. Inywe Barubeni n'Abagadi timwina mugabo aha Mukama.’ Kityo baijukuru banyu bakutangire baijukuru baitu kufukamira Omukama.

²⁶ Nikyo tugambiire tuti, ‘Mbwenu aho twombeke ealutare. Ti ya kwokezaho bitambo anga kutambiraho,

²⁷ kyonkai ebe kabonero ahali ichwe na inywe ako baijukuru baitu balimanyiraho okwo mazimakwo tulikufukamira Omukama omu maisho g'Eihemalye Elitakatifu, tumuleteire ebihongo by'okwokibwa n'ebitambo n'ebihongo by'emilembe, baijukuru banyu batalija bakagambira baijukuru baitu biro ebilija bati: Timwina mushondo aha Mukama.’

²⁸ Kandi tutekeleize tuti makiro agalija kabalitugambira batyo anga bhakaba nikwo bagambira baijukuru baitu, baligamba bati, ‘Mulebe ekopi ya ealutare y'Omukama, eyo batat'enkurw'ichwe bayombekire, ti ya kuhongeraho bihongo bya kwokibwa anga bitambo, kyonkai ebe kabonero ahali ichwe na inywe.’

²⁹ Nikikabure kushenga Omukama, kulekera kumugumaho tukombeka ealutare y'ebihongo by'okwokibwa n'eby'emyaka anga ebitambo, tukasigaho ealutare y'Omukama Ruhanga waitu eyemeleire omu maisho g'Ekiikarokye.”

³⁰ Finehasi omukuhani n'abakuru b'enteko: Abagurusi b'amahiga g'enganda za Isiraeli abo yabaire agenzire nabo, kabahuliire ebyo Abarubeni n'Abagadi n'Abamanase bagambire, babona bilige.

³¹ Finehasi agambira Abarubeni n'Abagadi n'Abamanase ati, “Mbwenu twamanya okwo Omukama asingiire omuli ichwe, aha rw'okuba timumugokeire, mara mwarokora Isiraeli aha kibonabonyiokye.”

³² Aho Finehasi n'abakuru baruga omu Barubeni n'Abagadi omuli Gileadi, bagaruka Kanaani omu Baisiraeli, babatwalira empororo.

³³ Ebaruro egyo eshemelera Abaisiraeli, nabo bahaisiliza Ruhanga, baba batakigamba bya kubatera, kusilikya nsi y'Abarubeni n'Abagadi eyo baturagamu.

³⁴ Altare egyo Abarubeni n'Abagadi bagyeta Kabonero, nibagamba bati, “Kabonero omugati yaitu okwo Omukama n'iwe Ruhanga.”