Yoshua 2 - Ebibulia 2001

Yoshua natweka abanyomozi omuli Yeriko

¹ Yoshua eya Nuni ayemire Shitimu, atuma abashaija babili omu kyama, nagamba ati, “Mugende muhenjuze ensi egyo okukiraho Yeriko.” Bagenda bataha omw'omumalaya eibaralye Rahabu, bashura omwo.

² Abantu bagambira omukama wa Yeriko bati, “Abaisiraeli baija omu nsi yaitu omu kiro kuginyomoza.”

³ Aho omukama wa Yeriko atuma ahali Rahabu ati, “Olete abashaija abaizire omwawe, kuba baizire kunyomoza ensi.”

⁴ Kyonkai omukazi hakaba yabakwete bombili yabashelekire. Ahorora ati, “Mazimakwo abashaija omwange baiziremu, kyonkai timanyire mbali barugire,

⁵ kandi orwo ekihigi kibaire kyaija kukingwa aha kailima, bashohora. Mbali bagire tindikuhamanya. Mubabinge bwangu mwakubakwata.”

⁶ Kyonkai wenene omukazi hakaba abataire aha butara, abashwekire ebishagate bya kitani ebyo yabaire ayaliireho.

⁷ Kityo abantu bakwata omuhanda gwa Yorudani, babahondera kubabinga, bagoba aha byambu. Abababingire kabashohoire bati ekihigi kikingwa.

⁸ Kababaire batakabyamire, Rahabu atemba mbali bali aha butara,

⁹ abagambira ati, “Nimanya okwo Omukama abahaire ensi egi, n'okwo mulikututinisa, Abanyansi bona kabalikubabona bajugumba.

¹⁰ Aha rw'okuba tuhuliire okwo Omukama yayomize Enyanja Rutuku omu maisho ganyu orwo mwabaire nimuruga Misiri, n'ebyo mwakozire abakama bombi b'Abaamori Sihoni na Ogi buseli bwa Yorudani; abo mwasilikize kimoi kimoi.

¹¹ Orwo twahuliire tutyo twajugumba emitima, obumanzi bwatuhwa, buli muntu abatina ahakuba Ruhanga wanyu n'iwe Ruhanga omw'iguru n'omu nsi.

¹² Mbwenu aho munnahilire obuso bw'Omukama nk'okwo nabakorage na inywe nikwo murakorage eka ya tata. Kandi mumpe akamanyiso akalikwo,

¹³ mukize tata na mawe, banyanyazi na barumuna bange na bona ababakweteho, mutukize tutafa.”

¹⁴ Abashaija abo bamugambira bati, “Nitwikiliza kubafera, k'oraba otagambire kyotwakora. Orwo Omukama araba yatuhaire ensi egi turakukolera obwesigwa.”

¹⁵ Aho abasongoza omuguha, abarabya omw'idirisha aha rw'okuba enjuye ekaba eyombekirwe omu boma y'ekigo, omu boma y'ekigo nimwo yaturaga.

¹⁶ Abagambira ati, “Mugende omu mabanga, abababingire bataija bhakabatanganwa. Mweshelekeyo ebiro bishatu kuhika orwo abo baragaruka; aho ahanyuma mukwate omuhanda gwanyu mugende.”

¹⁷ Abashaija abo bamugambira bati, “Ichwe turaba tutaina ntambara aha rw'ekinahiro eki ekyo watunahiza.

¹⁸ Orwo turataha omu nsi egi okome akahuzi aka akalikutukura aha idirisha elyo waturabyamu; mara ohikanise sho na nyoko na banyanyoko n'omutungo gwa sho gwona.

¹⁹ Kaharagira omuntu araruga omwawe akashohora, akagenda omu mbarabara, araba ayeisize; tigube mushango gwaitu; kyonkai ow'oinawe omwawe k'araitwa, ogwo obwambabwe butururuukire.

²⁰ Kyonkai k'oragamba ekikorwa kyaitu eki, aho turaba tutaina ntambara aha rw'ekinahiro ekyo watunahiza.”

²¹ Kandi abagambira ati, “Okwo mwangambira bibe bityo.” Aho abarazage bagenda. Akoma akahuzi kalikutukura aha idirisha.

²² Bagenda bagoba omu mabanga, baikarayo ebiro bishatu kuhika orwo ababaire bababingire bagarukire. Bhakabahiga hona omu muhanda kyonkai tibababoine.

²³ Aho abashaija bombili baruga omu mabanga, bashabuka, bagoba Yoshua eya Nuni, bamubarulira byona ebyabagwireho.

²⁴ Bamugambira bati, “Mazima Omukama anagire ensi yona omu mikono yaitu; kandi okukiraho abanyansi bamwo bona nibatutina muno.”