Yoshua 18 - Ebibulia 2001

Okwatwa kw'ensi esigaire

¹ Enteko yona y'Abaisiraeli eteranira Shilo. Bateraho Eihema ly'Omuterano. Ensi bagitwara.

² Hakaba hasigairweho enganda mushanju omu Baisiraeli ezabaire zitakahairwe busika bwazo.

³ Aho Yoshua abaza Abaisiraeli ati, “Muraberahai n'okuzebeera? Mutahe omu nsi ey'Omukama Ruhanga wa baisheinywe abatungire mugilye.

⁴ Mumpe abantu bashatu buli ruganda, mbatweke bagye batere eramani ensi eyo mwakwenzire kulya, bashube bagaruke owange.

⁵ Baragibegana emigabo mushanju. Yuda araikara omu nsiye rubaju orwa kasi, baijukuru ba Yozefu omu nsi yabo rubaju orwa bikara.

⁶ Mutere eramani yayo omu bichweka byayo mushanju mugindetere, mbitekere enshoga omu maisho g'Omukama Ruhanga waitu.

⁷ Abalevita tibaina mugabo muli Isiraeli, aha rw'okuba obukuhani bw'Omukama nibwo busika bwabo. Kandi Gadi na Rubeni n'enusu y'oruganda rwa Manase batwete obusika obwabo buseli bwa Yorudani oburugaizoba obwo Musa omwiru w'Omukama yabahaire.”

⁸ Aho abantu abo baimukya bagenda, Yoshua ashuba abaragira orwo bagiire kutera eramani y'ebichweka ebyo ati, “Mugende hona mwate ensi egyo, mushube mugaruke owange. Ahanyuma ndateeka enshoga omw'ibara lyanyu omu maisho g'Omukama omuli Shilo.”

⁹ Aho abantu bagenda barambura ensi bagyata, batera n'eramani okwo bagyata omu bichweka mushanju n'ebigo babihandika, bagaruka Shilo owa Yoshua.

¹⁰ Yoshua ali Shilo ateeka enshoga omw'ibara lyabo omu maisho g'Omukama. Abeganira Abaisiraeli ensi, buli ruganda omugabo gwabo.

Ensi eyo Benjamini yagabiirwe

¹¹ Omushondo gw'oruganda rwa Benjamini nk'okwo amahiga garwo gali nirwo rwabandize. Gukaba guli omugati y'oruganda rwa Yuda n'orwa Yozefu.

¹² Orubaju rwa bikara orubibi rwabo rukaba nirwema Yorudani, nirutemba omu ndakwakwa ya Yeriko. Aho rutemba rurabire omu mabanga obugwaizoba, rulekelera omw'irungu lya Betiaveni.

¹³ Kwema aho ruraba rubaju orwa kasi omu bwolekera bwa Luzu omu ndakwakwa ya Luzu, niyo Beteli. Rushuba rusoka rugiire Atarotiadari aha ibanga elili kasi, eifo ya Betihoroni.

¹⁴ Rwehota rugiire obugwaizoba kwolekera kasi. Kwema eibanga elili kasi elyolekeraine na Betihoroni, rugya rulekelera Kiriatibaali, niyo Kiriatiyearimu, ekigo ky'ab'oruganda rwa Yuda. Oru nirwo rubaju rw'obugwaizoba.

¹⁵ Rubaju orwa kasi nirutandikira aha mpelero ya Kiriatiyearimu, mara rugendelera kimoi rugoba Efuroni aha Nchuro ya Nefutoa.

¹⁶ Aho rusongoka rurabire aha rubaju rw'eibanga elilebangaine n'Oruhanga rwa Refaimu, rusongokera omu Ruhanga rwa Hinomu, kasi omu ndakwakwa y'Abayebusi, rukwata amagyaifo rugya Enirogeli.

¹⁷ Ruhendera rubaju orwa bikara rwolekera Enishemeshi, rugoba Geliloti ekigo ekilebangaine n'obutemba bwa Adumimu. Rusokera aha Ibare lya Bohani mutabani wa Rubeni;

¹⁸ rurabamu rugoba bikara omu ndakwakwa ya Betaraba, rusoka rugoba Araba.

¹⁹ Aho ruraba bikara omu ndakwakwa ya Betihogila; rulekelera mbali ensi elikutaha omu Nyanja y'Omwonyu. Rubaju orwa kasi nzindo ya Yorudani. Oru nirwo rubibi rwa kasi.

²⁰ Yorudani nirwo rubibi rwayo rw'oburugaizoba. Obu nibwo busika bw'oruganda rwa Benjamini nk'okwo amahiga garwo gali, orubibi aha rundi obuzingora.

²¹ Ebigo by'oruganda rwa Benjamini nk'okwo amahiga gabo gali ni Yeriko, Betihogila, Emekezizi;

²² Betiaraba, Zemaraimu, Beteli;

²³ Avimu, Para, Ofura;

²⁴ Kefaramoni, Ofuni na Geba. Ebigo 12 n'ebyaro byabyo.

²⁵ Gibeoni, Rama, Beeroti;

²⁶ Mizipe, Kefira, Moza;

²⁷ Rekemu, Irupeeli, Tarala;

²⁸ Zela, Haelefu na Yebusi (niyo Yerusalemu); Gibea na Kiriati yearimu. Bigo 14 hamoi n'ebyaro byabyo. Obu nibwo busika bw'oruganda rwa Benjamini nk'okwo amahiga garwo gali.